Annou devoue pour fer sa ki byen!
1 Anmezir ki sezon Memoryal 2003 i aprose, nou annan en kantite rezon pour nou “devoue pour fer sa ki byen.” (1 Pyer 3:13, NW ) Rezon pli enportan ki nou annan pour nou devoue pour fer sa ki byen i akoz sakrifis ranson Zezi Kri. (Mat. 20:28; Zan 3:16) Konsernan sa, zapot Pyer ti ekrir: “Zot in ganny delivre dan zot mannyer viv initil . . . pa par mwayen bann lobze ki perdi valer, konman lor oubyen larzan, me par disan presye Kris, ki’n ofer limenm konman en lanyo san defo e san okenn tas.” (1 Pyer 1:18, 19) Rekonesans pour sa lekspresyon lanmour ekstraordiner i motiv nou pour reste okipe dan fer sa ki byen, rekonnet ki Zezi “i’n donn son prop lavi pour nou, pour delivre nou dan tou mal e pirifye nou konman en pep ki apartenir a li, en pep zele pour fer dibyen.”—Tit 2:14; 2 Kor. 5:14, 15.
2 Kan nou fer sa ki fer Bondye plezir, nou rezwir en bon relasyon avek li e ganny son latansyon ranpli avek lanmour. Pyer ti osi fer resorti ki: “Si en dimoun i oule viv en lavi, agreab e war bann zour ere, . . . I devre aret fer sa ki mal e pratik sa ki byen. I devret rod lape e fer lape. Parski lizye Senyer i fikse lo bann zis, E son zorey i ouver pour ekout zot lapriyer.” (1 Pyer 3:10-12) Dan sa letan danzere, i vreman en benediksyon pour konnen ki Zeova pe vey lo nou e i pare pour azir dan nou faver, ‘pour prezerv [nou] parey son kannet lizye.’—Det. 32:10; 2 Kron. 16:9.
3 Kantmenm zot ti fer fas avek bokou leprev, bann premye Kretyen ki Pyer ti adres son let, ti ranpli avek en gran lantouzyasm ek devouman ki pa ti kapab ganny detrir, e zot ti fer otan ki posib pour pres sa bon nouvel. (1 Pyer 1:6; 4:12) I menm parey avek pep Bondye ozordi. Menm si nou pe viv dan en “letan difisil,” lapresyasyon pour labonte Zeova i pous nou pour fer lavolonte Bondye avek devouman. (2 Tim. 3:1; Ps. 145:7) Annou konsider serten bon travay ki nou kapab fer pandan sa sezon Memoryal.
4 Envit Lezot pour asiste Memoryal: En fason ki nou kapab montre nou lapresyasyon pour ranson, sa kado ekstraordiner, se pour asiste komemorasyon annyel lanmor Zezi, ki pou ganny fer sa lannen Merkredi, le 16 Avril, apre soley kouse. (Lik 22:19, 20) Lannen pase, avek 94,600 kongregasyon ki ti ganny raporte partou dan lemonn, nou ti annan en total lasistans 15,597,746! Konpare avek son lannen avan, sa ti fer en ogmantasyon plis ki 220,000 dimoun.
5 Konbyen ki pou asiste sa lannen? I pou depan bokou lo nou zefor entans pour ankouraz lezot pour rasanble ansanm avek nou. Ou kapab konmans fer en lalis tou dimoun ki ou pou anvi envite. Premye lo lalis i devret ou manman, papa, frer, ser oubyen zanfan. Si ou annan en msye oubyen en madanm ki pa Temwen, dir li ki ou ti ava vreman kontan ki i vin avek ou. En mari ki pa Temwen ti dir ki i ti asiste Memoryal lannen pase akoz i ti vwar konman son prezans ti vreman enportan pour son madanm. Apre ou kapab azout lo ou lalis bann lezot manm fanmiy, vwazen, koleg travay, oubyen kanmarad lekol. Fer sir ki ou envit ou bann etidyan Labib.
6 Apre ki ou’n fer ou lalis, progranm en letan pour ou personnelman donn en lenvitasyon avek sak dimoun. Servi bann fey lenvitasyon Memoryal. Pour ed bann dimoun rapel kan e kote sa komemorasyon pou deroule, ekrir byen kler landrwa ek ler lo sa fey lenvitasyon. Anmezir ki le 16 Avril i aprose, vizit oubyen telefonn bann ki lo ou lalis pour rapel zot sa levennman enportan. Annou ed otan dimoun ki posib pour asiste sa lokazyon vreman sakre.
7 Ed bann ki asiste Memoryal: Sa zour swar Memoryal i toultan en lokazyon eksitan. Nou annan sa loportinite pour swet labyenveni bann dimoun ki pa abitye asiste nou bann renyon. Depandan lo sirkonstans kot ou pe reste, fer laranzman pour ariv boner e reste ziska en pe tar. Pran linisyativ pour fer konnesans avek bann nouvo ki dan lasistans. Montre ou amikal e zantiy.—Rom. 12:13.
8 Eski serten ki’n asiste Memoryal i kapab ganny ede pour fer plis progre spirityel atraver en letid Labib? Esey fer ou mye pour ganny non ek ladres nenport viziter ki pa pe aktyelman ganny vizite, pour ki ou kapab kontinyen ed zot. Si zot ganny ede avek lanmour, serten i kapab progrese ziska pour vin en proklanmater non batize avan Memoryal lannen prosenn. Kan nou pe vizit bann ki’n asiste Memoryal, envit zot pour sa diskour spesyal ki pou ganny fer le 27 Avril.
9 Eski ou kapab fer Pionye Asistan pandan Sezon Memoryal? Sak lannen nou devouman pour Zeova i motiv nou pour donn tou sa ki nou kapab dan predikasyon pandan bann mwan aktivite teokratik spesyal. Lannen pase Sesel ti annan 29 proklanmater ki ti fer pionye asistan pandan mwan Mars e 10 an Avril. Deplis, sa 224 proklanmater ki ti met rapor an Mars ti fer en mwayenn 12.5 er-d-tan dan servis. En zefor inifye ki tou dimoun dan bann kongregasyon i fer pour pres sa bon nouvel avek devouman pandan sezon Memoryal i kapab prodwir bann bon rezilta.
10 Dan en lot parti lemonn, en kongregasyon avek 107 proklanmater ek 9 pionye ordiner ti raporte ki Avril ti “en mwan eksepsyonnel” pour zot. I ti annan 53 proklanmater ki ti pe fer pionye asistan, enkli tou bann ansyen ek asistan ministeryel. Konman ki bann ansyen ti ogmant sa lantouzyasm pour fer pionye asistan sa mwan? Byen davans zot ti konmans devlop lantouzyasm dan bann frer ek ser e ankouraz otan proklanmater ki posib pour antreprann sa servis. I ti annan plizyer randevou predikasyon ki ti ganny organize diferan ler pandan lazournen pour adapte avek tou proklanmater dan kongregasyon. En lanfaz spesyal ti ganny mete lo temwannyaz par telefonn, sirtou pour bann ki malad.
11 En ser 86 an, ki pa kapab marse akoz problenm lasante, ti met son non pour fer pionye asistan. I ti fer detrwa er-d-tan temwannyaz par telefonn dan bomaten pandan ki i ti asize atab dan lakwizin. Apre i ti repoz en pe, e plitar retournen pour fer ankor en pe temwannyaz. En dimoun ki i ti kontakte ti’n perdi son msye ek son de garson adolesan dan lanmor pandan sa de dernyen lannen e i pa ti konpran akoz ki Bondye i permet sitan keksoz mal arive. En bon temwannyaz ti ganny donnen, e en letid Labib ti konmanse. Fer temwannyaz par telefonn aswar e lezot moman i en fason efikas pour kontakte bann dimoun ki reste dan bann batiman oubyen landrwa ki ou pa kapab ganny akse avek. I osi permet bann proklanmater kontakte bann dimoun ki pa kot zot pandan lazournen.
12 Bann ansyen ti konklir zot rapor par dir: “Nou’n pas en moman merveye e nou apresye bann privilez ek benediksyon ki Zeova in fer posib pour sakenn ant nou.” Avek en bon plan, ou kongregasyon osi i kapab rezwir sa bann tel benediksyon.
13 Esey ki tou Proklanmater i partisip dan Predikasyon: Nou lanmour pour Bondye ek nou vwazen i motiv nou pour servi tou lokazyon sak mwan pour partaz sa bon nouvel avek lezot. (Mat. 22:37-39) Bann sirveyan Letid Liv kongregasyon ek zot asistan i devret fer zot mye pour ed bann dan zot group pour partisip dan predikasyon sak mwan. En bon fason pour fer sa se par fer bann laranzman davans pour travay avek serten dimoun an partikilye dan group. Fer sa byen boner dan lemwan e pa esper lafen lemwan pour ou konmanse. Sa pou donn ou plis loportinite pour ed bann ki dan ou group.
14 Eski i annan proklanmater dan ou group letid liv ki malad, ki trouv li vreman difisil pour partisip dan minister? Si serten i reste kazern oubyen zot pa kapab sorti kot zot, nou kapab konpran ki zot loportinite pour prese i limite. Me kan zot profit loportinite ki zot annan pour les zot lalimyer briye, zot kapab motiv bann ki vwar zot bon travay pour devlop en lentere senser pour laverite. (Mat. 5:16) Bann sirveyan letid liv i devret fer sir ki sa bann tel dimoun i konnen ki zot kapab raport menm zis 15 minit predikasyon dan en mwan. Vi ki zot kapab raport sa letan ki zot pase pour rann temwannyaz, sa i ankouraz sa bann proklanmater fidel, e i anmenn bokou satisfaksyon ki rann zot zwaye. I osi ede pour asire ki sa rapor mondyal bann aktivite pep Bondye i egzakt.
15 Bann Zenn ki servi zot Letan pour fer sa ki byen! I vreman ankourazan pour vwar bann zenn Kretyen servi zot lafors ek lenerzi dan servis Zeova! (Prov. 20:29) Si ou zenn, konman ou kapab demontre ou devouman pour Zeova pandan sa bann mwan aktivite spesyal?
16 Si ou pa ankor vin en proklanmater dan kongregasyon, akoz ou pa fer zefor pour vin enn? Demann ou lekor sa bann kestyon swivan: ‘Eski mon annan en konnesans debaz lo laverite Labib? Eski mon anvi partisip dan servis Rwayonm? Eski mon annan en bon kondwit? Eski mon kapab demontre mon lafwa par koz avek lezot konsernan bon nouvel? Eski mon leker i motiv mwan pour fer sa?’ Si ou kapab reponn wi pour sa bann kestyon, alor koz avek ou paran lo ou dezir pour vin en proklanmater. Ou paran i kapab apros enn bann ansyen lo komite servis.
17 Si ou deza en proklanmater sa bon nouvel, eski ou kapab profit ou vakans lekol pour ogmant ou partisipasyon dan predikasyon? Avek en bon progranm ek lasistans paran ek lezot, plizyer zenn ki batize in kapab fer pionye asistan. Si sa pa posib, alor annan sa determinasyon pour ogmant ou partisipasyon dan predikasyon. Etablir en lobzektif pour ou menm. Apard ki sa lobzektif pour pas en serten kantite er-d-tan dan predikasyon, etablir en lobzektif ki relye avek kalite ou minister. Petet ou kapab fer zefor pour partaz omwen en verse Labib kot sak lakour, amelyor kalite ou bann retourn vizit, konmans en letid Labib, elarzi ou minister pour enkli temwannyaz par telefonn oubyen lezot laspe dan servis. Ki ou panse lo sa lobzektif pour anmenn en vwazen, kanmarad lekol, oubyen ou fanmiy ansanm avek ou pour Memoryal sa lannen? Partisip plennman dan sa bann aktivite teokratik pou vreman satisfezan e pou sirman ankouraz lezot dan kongregasyon.—1 Tesa. 5:11.
18 Ed bann Nouvo pour progrese: Pandan lannen servis ki’n pase, en mwayenn 255 letid Labib ti ganny kondwir sak mwan Sesel. Avek letan, plizyer parmi sa bann etidyan pou progrese ziska dedikasyon ek batenm. Parkont, avan ki zot atenn sa lobzektif, nou bezwen ed zot pour kalifye konman bann proklanmater sa bon nouvel. Sa i en pa enportan pour ansenny bann nouvo pour vin disip Kris. (Mat. 9:9; Lik 6:40) Eski ou annan en etidyan Labib ki pare pour pran sa pa?
19 Si ou pa asire konsernan progre ou etidyan, rod lasistans ou sirveyan letid liv oubyen sirveyan servis. Petet ou kapab envit li pour asiste sa letid. Sa bann frer i annan bann bon leksperyans ki zot kapab servi pour evalye progre spirityel sa etidyan. Zot kapab annan bann sizesyon ki pou ed sa etidyan kontinyen fer progre spirityel.
20 Kan ou etidyan i eksprim sa lentere pour vin en proklanmater e ou santi ki i kalifye, koz avek sirveyan prezidan. I pou aranze ki de ansyen i ganny en diskisyon avek ou ek sa etidyan pour vwar si i kalifye oubyen non, par servi sa lenformasyon lo paz 98-9 dan liv Notre ministère. (Vwar Latour Veyer, 15 Novanm, 1988, paz 17.) Si sa etidyan i ganny aprouve pour vin en proklanmater, ou devret konmans form li deswit. Dek ki i met en rapor servis, kongregasyon pou ganny enformen ki sa etidyan i en proklanmater non batize. Nou swete ki plizyer milye nouvo proklanmater, zenn konman vye, i kapab ariv a sa staz enportan dan zot devlopman spirityel pandan sa bann mwan aktivite spesyal.
21 En bon Progranm i ede pour fer plis dibyen: Si nou plàn byen davans, sa pou kontribye pour fer nou reisi dan nou bann aktivite teokratik pandan sa sezon Memoryal. (Prov. 21:5) I annan plizyer keksoz ki bezwen latansyon bann ansyen.
22 Pour ed kongregasyon akonpli otan ki zot kapab dan predikasyon, bann ansyen i devret fer laranzman pratik pour organiz bann randevou predikasyon toudilon lasemenn e dan wikenn. Sirveyan servis i devret pran linisyativ pour fer sa bann laranzman. Eski randevou adisyonnel i kapab ganny organize boner dan bomaten, tar apremidi, oubyen boner aswar? Kongregasyon i devret ganny enformen sa bann laranzman. I kapab itil si sa progranm i ganny afise lo bord lenformasyon.
23 Bann ansyen i devret fer sir ki bann laranzman pour Memoryal i ganny fer byen boner avan le 16 Avril. Sa i enkli fer laranzman avek lezot kongregasyon ki pou servi menm Lasal Rwayonm, netwayaz Lasal, swazir bann ki pou dan servis lakey ek bann ki pou pas lanblenm, e osi pour ganny sa bann lanblenm. Kongregasyon i devret ganny enformen ler ek landrwa kot Memoryal pou ganny fer e okenn sanzman dan progranm renyon pour sa semenn. Si nou seryezman okip sa bann keksoz i pou permet ki komemorasyon i ganny ‘fer byen e avek lord.’—1 Kor. 14:40.
24 Bann sef fanmiy i kapab servi en moman dan zot letid fanmiy pour diskite konman lafanmiy i kapab partisip dan aktivite kongregasyon pandan sezon Memoryal. Eski ou fanmiy antye i kapab fer pionye asistan? Oubyen, eski lafanmiy i kapab siport enn oubyen plizyer manm fanmiy pour fer pionye? Si sa pa posib, etablir bann lobzektif pour ki tou dimoun dan lafanmiy i pas plis letan dan predikasyon. Eski i annan en manm fanmiy ki pli zenn, ki avek en pti gin lankourazman ek led i kapab kalifye pour vin en proklanmater non batize? Ki kantite dimoun ou fanmiy i kapab envite pour asiste Memoryal sa lannen? En bon plan pou anmenn bokou rekonpans ek lazwa pour ou fanmiy.
25 Profit plennman sa Letan ki reste: Kan i ti ekrir bann Kretyen premye syek, zapot Pyer ti rapel zot ki sa letan ki zot ti pe viv ladan i irzan akoz lafen sistenm Zwif ti pe aprose. (1 Pyer 4:7) Ozordi, tou levidans i endike ki lafen sa sistenm ki nou pe viv ladan i pros. Sak zour, lafason ki nou viv i devret demontre ki nou annan sa konviksyon. Konman bann serviter devoue Zeova, nou devret konsantre lo sa travay irzan pour anons sa bon nouvel.—Tit 2:13, 14.
26 La i en letan pour nou devoue e pour nou azir! Reflesir lo sa ki Zeova in fer pour ou, pour ou fanmiy, e pour kongregasyon. Kantmenm nou pa kapab zanmen repey li pour tou sa bann keksoz ki’n anmenn byenfe pour nou, nou kapab ador Zeova avek tou nou leker. (Ps. 116:12-14) Zeova pou beni nou zefor senser ki nou fer. (Prov. 10:22) Fotespere nou tou nou “devoue pour fer sa ki byen” pandan sa letan spesyal kot i annan plis aktivite, “pour ki, dan tou, Bondye i ganny glorifye par Zezi Kri.”—1 Pyer 3:13, NW; 4:11.
[Bwat lo paz 3]
Lasistans Memoryal partou dan Lemonn
1999 14,088,751
2000 14,872,086
2001 15,374,986
2002 15,597,746
[Bwat lo paz 4]
Lekel ou pou envite pour Memoryal?
□ Ou manman, papa, ser, frer, oubyen zanfan ek lezot manm fanmiy
□ Bann vwazen ek dimoun ki ou konnen
□ Koleg travay ek kanmarad lekol
□ Bann vizit ek etidyan Labib
[Bwat lo paz 5]
Ed bann ki asiste Memoryal
□ Ofer en lakey byen amikal
□ Fer bann retourn vizit
□ Ofer zot en letid Labib
□ Envit zot pour sa diskour spesyal
[Bwat lo paz 6]
Ki ou bann Lobzektif pour sa sezon Memoryal?
□ Ed en dimoun ki ou’n envite asiste Memoryal
□ Kalifye konman en proklanmater sa bon nouvel
□ Pas en serten kantite letan dan predikasyon
□ Amelyor en serten laspe ou minister
□ Servi konman en pionye asistan