“Pres Parol Bondye plennman”
1 Kan ou senserman apresye en keksoz ki ou’n resevwar ki bon, pa ou montre li par ou latitid ek aksyon? Byensir! An sa ki konsern labonte ek lanmour fidel ki Zeova i demontre anver bann imen, remark konman zapot Pol ti reazir. I ti dir avek en lavwa for: “Annou rann gras Bondye pour son gran don.” Ki sa “gran don” i enkli? Parmi tou ‘bann gran lagras ki Bondye’ in akord nou, sa pli gran manifestasyon son lagras ti sa don son prop garson konman en ranson pour nou pese.—2 Kor. 9:14, 15; Zan 3:16.
2 Eski Pol ti eksprim son lapresyasyon zis par parol? Pa ditou! Dan en kantite fason i ti montre son lapresyasyon profon. I ti vreman enterese avek byennet spirityel son bann konpanyon Kretyen e i ti oule fer sa ki i ti kapab pour ed zot benefisye o maksimonm atraver labonte leker Bondye. Konsernan son bann konpanyon Kretyen, Pol ti dir: “Akoz nou lafeksyon pour zot nou ti pare pour anons zot non selman Levanzil Bondye me osi donn menm nou prop lavi pour zot akoz nou lanmour pour zot ti gran.” (1 Tesa. 2:8) Anplis ki ed bann ki ti deza form parti kongregasyon pour protez zot delivrans, Pol ti kontinyen pres sa bon nouvel san arete, i ti vwayaz bokou distans lo later e lo lanmer pour trouv bann “ki ti dan dispozisyon neseser pour lavi eternel.” (Akt 13:48, NW ) Lapresyasyon profon ki Pol ti annan pour tou sa ki Zeova ti’n fer pour li, ti pous li “pour anons parol Bondye plennman.”—Kol. 1:25, NW.
3 Eski nou lapresyasyon pour tou sa ki Zeova in fer pour nou pa pous nou pour ofer lasistans spirityel avek bann ki bezwen led dan nou kongregasyon? (Gal. 6:10) Eski nou pa ganny motive pour partisip otan ki posib dan sa travay predikasyon pour pres sa bon nouvel Rwayonm dan nou teritwar an antye?—Mat. 24:14.
4 En Loportinite pour montre Lapresyasyon: Sak lannen Memoryal lanmor Zezi i donn nou en loportinite spesyal pour montre lapresyasyon pour sa ki Zeova ek Zezi in fer pour nou. Sa i pa zis en lot renyon oubyen senpleman en levennman ki ganny obzerve toulezan. Zezi ti dir: “Kontinyen fer sa an mon memwar.” (Lik 22:19, NW ) Memoryal lanmor Zezi i en lokazyon pour medit lo sa kalite dimoun ki Zezi i ete. I en letan pour rekonnet ki ozordi i vivan e aktif, avek laglwar ek rwayote ki i ti gannyen akoz son lavi fidel ek son sakrifis. Sa komemorasyon i osi en loportinite pour montre nou soumisyon anver lotorite Kris anmezir ki i diriz bann zafer ek aktivite kongregasyon Kretyen. (Kol. 1:17-20) Tou pep Bondye i devret respekte sa laranzman e asiste Memoryal lanmor Kris. Sa lannen i pou ganny fer apre soley kouse Zedi le 28 Mars, 2002.
5 Apre tou sa bann zefor ki ti ganny fer avan komemorasyon Memoryal lannen pase, nou ti annan en maksimonm 601 lasistans Sesel. Konman lasistans pou ete sa lannen? En kantite pou depan lo ‘nou travay dir ek zefor entans,’ pour ed otan dimoun ki posib pour asiste.—1 Tim. 4:10.
6 Apard ki asiste Repa Senyer, nou kapab ogmant nou aktivite predikasyon. San dout, en kantite frer ek ser pou fer pionye asistan pour en mwan oubyen plis. Sa de dernyen lannen, nou’n annan an mwayenn 25 proklanmater ki’n fer pionye asistan pandan mwan Memoryal. Eski ou kapab aranz ou progranm afen ki ou rezwir sa privilez pour fer pionye sa lannen? I pou en bon fason pour ou montre ou lapresyasyon senser pour sa kado merveye Bondye, sakrifis Kris. Ou kapab asire ki Zeova pour beni ou, parey sa bann leksperyans swivan i montre.
7 En ser ki pe travay aplentan ti ekrir konsernan son leksperyans kan i ti fer pionye Mars lannen pase: “Nou Minister Rwayonm Fevriye 2001 ti ankouraz tou dimoun ki zot sirkonstans i permet zot pour fer pionye asistan pandan peryod Memoryal. Lefe ki Mars ti annan senk Sanmdi, sa ti al byen avek mon progranm. Alor mon ti deside pour donn mon laplikasyon.” Kan sa mwan ti konmanse, i ti etabli en lobzektif pour esey konmans en letid Labib kot lakour. Eski i ti reisi? Wi, letan i ti pe fer son 52 zyenm er-d-tan temwannyaz pour sa mwan. Ki son konklizyon? “I annan bann benediksyon merveye kan nou fer zefor ekstra.”
8 Ki benefis ki en fanmiy ki ti fer pionye ansanm ti gannyen? En fanmiy kat dimoun ki ti fer servis pionye an Avril lannen pase ti dir ki i en mwan ki zot pou toultan mazinen. Sa manman ti dir: “Lefe ki nou ti ansanm dan predikasyon, nou ti annan en pwenn-vi pozitif sak zour. Pandan dinen nou ti koz lo nou bann aktivite dan servis e sa ti vreman agreab.” Sa garson ti dir: “Mon ti kontan travay avek papa dan predikasyon pandan lasemenn, lefe ki i normalman okipe dan son travay profann.” Sa papa ti azoute: “Konman sef fanmiy, mon ti vreman kontan ki nou ti pe travay ansanm dan sa aktivite pli enportan dan nou letan.” Eski ou fanmiy i kapab fer pionye ansanm? Akoz zot pa fer en diskisyon an fanmiy e vwar si i posib pour ou fanmiy antye fer pionye pandan sa peryod Memoryal?
9 Eski nou kapab fer Mars vin nou meyer Mwan? Boner dan lannen 2000, Nou Minister Rwayonm ti poz sa kestyon: “Eski nou kapab fer Avril 2000 vin nou meyer Mwan?” Ki ti rezilta? En kantite nouvo rikord ti ganny etablir. Pour sa mwan ti annan en total 34 pionye asistan. Anplis ki sa, nou ti annan nouvo rikord dan er-d-tan, plasman bann magazin, ek retourn vizit. Eski ou mazin sa lantouzyasm ki ti annan dan ou kongregasyon par sa aktivite spirityel entans pandan sa mwan spesyal? Eski nou kapab fer plis sa lannen? Si tou dimoun i fer en gran zefor Mars 2002 i kapab vin “Nou meyer Mwan.” Akoz Mars?
10 I annan de rezon akoz ki Mars i devret en mwan spesyal pour aktivite. Premyerman, Memoryal pou ganny fer alafen Mars, e sa i donn nou ase letan okonmansman sa mwan pour envit otan dimoun ki posib pour asiste sa levennman. Dezyenmman, sa lannen, Mars i annan senk wikenn konplet, alor i pou pli fasil pour bann ki annan en travay profann oubyen pour bann zanfan ki al lekol fer pionye asistan. Akoz ou pa konmans fer en progranm, an servan sa kalandriye dan sa sipleman? Fer pionye i kapab pli fasil ki ou pe mazinen. Par egzanp, par fer 8 er-d-tan dan predikasyon sak wikenn, ou pou bezwen selman 10 er-d-tan anplis pandan larestan sa mwan pour ariv 50 er-d-tan.
11 Ki bann ansyen i kapab fer pour ed tou dimoun dan kongregasyon pour “pres parol Bondye plennman”? Atraver renyon ek bann konversasyon personnel batir lantouzyasm dan lezot. Kondikter Letid Liv Kongregasyon ek zot bann asistan i kapab pran linisyativ pour koz avek bann dimoun dan zot group e ofer lasistans personnel. Enn de pti mo lankourazman oubyen serten sizesyon pratik i kapab sifi. (Prov. 25:11) En kantite frer ek ser pou vwar ki avek serten pti azisteman dan zot progranm, zot kapab rezwir sa privilez pour servi konman pionye asistan. Dan en kantite kongregasyon, laplipar ansyen ek bann asistan ministeryel ek zot madanm i demontre en bon legzanp par fer pionye ansanm pandan sa peryod Memoryal. Sa in ankouraz en kantite proklanmater pour zwenn zot. Akoz limitasyon fizik oubyen lezot sirkonstans, serten proklanmater pa kapab fer pionye, me zot kapab ganny ankouraze pour demontre zot lapresyasyon par fer otan ki zot kapab dan minister ansanm avek lezot dan kongregasyon.
12 Rezilta i depan lo bon planifikasyon delapar bann ansyen. Bann randevou pour predikasyon i devret ganny progranmen dan bann letan ki konvenab pandan lasemenn. Si i posib, sirveyan servis pou deziny bann frer kalifye davans pour diriz tou randevou pour predikasyon. Bon preparasyon pou esansyel afen ki sa bann randevou pa depas 10 a 15 minit, enkli organiz bann group, deziny teritwar, e pronons en lapriyer. (Vwar Kwen Kestyon dan Nou Minister Rwayonm Septanm 2001.) En progranm aktivite pour sa mwan i devret ganny anonse klerman avek kongregasyon e ganny met lo bord lenformasyon.
13 I devret annan ase teritwar pour travay. Sirveyan servis i devret rankontre bann frer ki okip bann teritwar pour fer laranzman pour travay dan bann teritwar ki pa ganny kouver souvan. Lanfaz i devret ganny mete pour vizit bann lakour kot nou pa souvan rankontre bann dimoun, temwannyaz lo semen, dan bann magazen e rann temwannyaz aswar. Kot i apropriye, serten proklanmater i kapab ganny ede pour fer temwannyaz par telefonn.
14 Ed zot pour rekonmans prese: Eski i annan okenn proklanmater dan ou kongregasyon ki nepli aktif dan predikasyon? Bann tel proklanmater i ankor form parti kongregasyon e zot bezwen led. (Pson. 119:176) Lefe ki lafen sa vye monn i tre pros e nouvo monn i pre pour arive, nou annan bon rezon pour esey fer tou sa ki nou kapab pour ed bann ki inaktif. (Rom. 13:11, 12) Pandan sa trwa lannen ki’n pase, apepre 6 dimoun in aksepte led e zot in rekonmans prese. Ki nou kapab fer pour ed plis ankor pour reganny zot lanmour ek konfyans ki zot ti annan okonmansman?—Ebr. 3:12-14.
15 Konsey bann ansyen pou diskite konman zot kapab ed sa bann ki’n vin inaktif pandan sa detrwa lannen. (Mat. 18:12-14) Sekreter i devret revwar kart bann proklanmater e not tou bann ki inaktif. En zefor spesyal i devret ganny fer atraver vizit pastoral pour fourni lasistans. Petet en ansyen i anvi vizit en serten proklanmater akoz i konn sa proklanmater byen, oubyen i kapab demann lezot proklanmater pour ede. I kapab ki sa proklanmater ki ti etidye avek sa enn ki inaktif, i pare pou ed li dan sa letan ki i bezwen led. Fotespere, ki en kantite ki’n vin inaktif pou ganny motive pour konmans pres Parol Bondye ankor. Si zot kalifye, napa pli bon moman pour zot rekonmanse pandan sa peryod Memoryal.—Vwar Kwen Kestyon dan Nou Minister Rwayonm Novanm 2000 pour plis detay.
16 Eski lezot i kalifye pour prese? Zeova pe kontinyen beni son pep par anmenn “bann keksoz dezirab sorti dan tou nasyon.” (Aga. 2:7) Sak lannen i annan en kantite ki kalifye konman bann proklanmater non batize. Lekel zot? Bann zanfan ki zot paran i Temwen Zeova osi byen ki bann etidyan Labib ki pe fer progre. Konman nou konnen si zot kalifye pour vin proklanmater sa bon nouvel?
17 Bann Zanfan ki zot Paran i Temwen Zeova: En kantite zanfan in akonpanny zot paran dan temwannyaz port-an-port pour plizyer lannen, menm si zot pa ankor konmans servi konman proklanmater non batize. Petet Mars i en bon letan pour zot konmanse. Konman ou konnen si ou zanfan i kalifye? Dan liv Organisés pour bien remplir notre ministère, paz 100, i dir ki kan “en zanfan i egzanpler dan son kondwit e i anvi e kapab eksprim son lafwa par koz avek lezot lo sa bon nouvel.” Si ou panse ki ou zanfan i kalifye, koz avek en ansyen ki lo Komite Servis Kongregasyon.
18 Bann Etidyan Labib ki kalifye: Apre ki en etidyan Labib in ganny konnesans e i pe asiste renyon pour enpe letan, i kapab anvi vin en proklanmater Rwayonm. Si ou pe kondwir letid avek en tel etidyan, konsider sa bann kestyon: Eski i pe fer progre, an akor avek son laz ek abilite? Eski i’n konmans partaz son lafwa dan en fason enformel avek lezot? Eski i’n pran sa “natir nouvo”? (Kol. 3:10) Eski i kalifye konman en proklanmater non batize dapre bann kriter dan liv Notre Ministère paz 98-100? Si wi, ou devret kontakte Komite Servis Kongregasyon afen ki bann laranzman i kapab ganny fer pour de ansyen ganny en diskisyon avek ou ek sa etidyan. Si i kalifye, sa de ansyen pou enform li ki i kapab konmans partisip dan predikasyon.
19 Me konsernan Avril ek Me? Sa de mwan pou osi spesyal pour ogmant aktivite dan predikasyon. Bann ki’n fer pionye asistan an Mars i kapab osi fer li ankor an Avril oubyen Me, oubyen tou le de. Pandan Avril ek Me nou pou donn priyorite prezantasyon magazin Latour Veyer ek Réveillez vous! Ki lefe sa de magazin in annan lo lavi bann dimoun ki lir zot? Sa bann magazin in zwe en gran rol pour akonpli sa bann ogmantasyon merveye ki’n arive partou dan lemonn. En zefor spesyal pou ganny fer pandan Avril ek Me pour ofer bann magazin avek otan dimoun ki posib. Fer en progranm konmela menm pour partisip plennman.
20 Avek sa kantite aktivite predikasyon ki’n ganny progranmen, eski ou bezwen ogmant lakantite magazin ki ou gannyen dan kongregasyon? Pandan lannen servis, nou ti prezant Latour Veyer ek Réveillez-vous! dan bann Sanmdi, ki ti nou Zournen Magazin. Parkont, lefe ki en kantite proklanmater pou partisip dan servis pionye asistan e ki nou tou nou pou prezant magazin pandan de mwan plen, petet i pou neseser pour ogmant lakantite magazin ki nou rekomande avek kongregasyon. Si i leka, silvouple enform sa dimoun ki okip magazin dan ou kongregasyon oplivit posib. E anmenmtan, sa dimoun ki okip piblikasyon i devret fer sir ki i annan sifizaman trak Eski ou ti a kontan konn plis lo Labib? pour tou dimoun servi.
21 En kantite in eksprim zot lapresyasyon pour sa kwen dan Nou Minister Rwayonm ki annan pour tit “Ki pour dir lo bann Magazin.” Eski ou’n servi byen sa provizyon par aprann konman pour prezant bann magazin? Akoz ou pa servi en parti dan ou letid Labib an fanmiy sak semenn pour egzers sa bann prezantasyon?
22 Profit omaksimonm sa Peryod Memoryal: Parey zapot Pol, annou montre Zeova ki kantite nou apresye “son gran don” par nou partisipasyon konplet dan sa aktivite spirityel ki’n ganny progranmen pour sa peryod Memoryal. Sa i enkli (1) asiste sa pli gran levennman enportan pour sa lannen, komemorasyon Repa Senyer, Zedi le 28 Mars, 2002; (2) ed bann ki’n vin inaktif pour reganny ‘zot premye lanmour’ (Rev. 2:4; Rom. 12:11); (3) ed nou zanfan e okenn etidyan Labib ki kalifye pour vin bann proklanmater non batize; e (4) partisip plennman dan sa travay predikasyon, menm fer pionye asistan an Mars oubyen lezot mwan apre.—2 Tim. 4:5.
23 I nou lapriyer senser ki nou tou nou partisip plennman pour pres sa bon nouvel Rwayonm pandan sa peryod Memoryal, alor annou demontre nou lapresyasyon pour tou sa ki Zeova in fer pour nou.
[Bwat lo paz 6]
Progranm personnel Predikasyon pour Mars 2002
Dimans Lendi Mardi Merkredi Zedi Vandredi Sanmdi
1 2
Zournen Magazin
3 4 5 6 7 8 9
Zournen Magazin
10 11 12 13 14 15 16
Zournen Magazin
17 18 19 20 21 22 23
Zournen Magazin
24 25 26 27 28 29 30
MEMORYAL Zournen Magazin
APRE
SOLEY KOUSE
31
Eski ou kapab progranm en total 50 er-d-tan pour pionye asistan an Mars?