Kontinyen koz lo bann Travay merveye Zeova
1. Ki serten travay merveye Zeova ki ou pli apresye?
1 Napa personn ki kapab ganny konpare avek nou gran Bondye, Zeova! David ti ekrir: “Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou.” (Ps. 40:5) Bann travay merveye Zeova i enkli liniver ki i’n kree, Rwayonm Mesyanik, labonte leker ki i’n demontre anver son pep, ek kanpanny predikasyon atraver lemonn. (Ps. 17:7, 8; 139:14; Dan. 2:44; Mat. 24:14) Lanmour pour Zeova ek lapresyasyon pour tou sa ki i’n fer, i pous nou pour koz lo li avek lezot. (Ps. 145:5-7) Pandan mwan Mars, Avril, ek Me, nou pou annan loportinite pour fer sa ankor plis.
2. Ki mannyer nou benefisye personnelman kan nou fer pionye asistan?
2 Konman Pionye asistan: Eski ou kapab aranz ou progranm pour pas 50 er-d-tan dan predikasyon pandan enn ouswa plis sa bann mwan spesyal? Okenn sanzman ki ou fer dan ou progranm pour fer pionye asistan i pou vo lapenn. (Efe. 5:16) Bokou proklanmater in vwar ki fer pionye asistan in ed zot amelyor kalite zot predikasyon. Zot santi zot pli alez devan laport e servi pli byen Labib. Pas plis letan dan predikasyon i fer li pli fasil pour kontinyen ed bann dimoun ki enterese. Serten ki ti napa en letid Labib oparavan in ganny enn ler zot ti pe fer pionye asistan. Vi ki fer pionye asistan i enplik donn nou letan ek lenerzi pour ed lezot, alor i en aktivite ki anmenn bokou lazwa.—Akt 20:35.
3. Ki mannyer serten in kapab fer pionye asistan malgre bann sitiasyon difisil?
3 Pa vitman dir ki ou sitiasyon pa permet ou pour fer pionye asistan. En ansyen ki ti fer pionye asistan lannen pase i annan de zanfan ek en travay aplentan. Ki mannyer sa frer, ki tre okipe, ti kapab fer pionye asistan? Vi ki i ti travay pandan lasemenn, i ti pas lazournen antye dan predikasyon dan wikenn. I ti konmans donn temwannyaz lo semen dan Sanmdi 7 er bomaten. Plizyer lezot dan kongregasyon ki dan menm sitiasyon ti osi fer pionye, e zot ti siport e ankouraz kanmarad. Dan en lot kongregasyon, en ser 99 an ti deside fer pionye an Me apre ki son fiy ti envit li pour zwenn ansanm avek li pour fer pionye. Lezot dan kongregasyon ti ed sa ser aze pour al port an port ek lo bann letid Labib par pous son wiltyer. I ti osi partisip dan temwannyaz par telefonn, temwannyaz lo semen, e ekrir let. I ti konvenki ki i pa ti fer sa par son prop lafors, me gras a led Zeova.—Iza. 40:29-31.
4. Ki nou kapab konsidere ler nou pe fer en progranm pour fer pionye asistan?
4 Esey fer en progranm ki adapte pli byen avek ou sitiasyon. Sa progranm dan sa nimero Nou Minister Rwayonm i kapab itil. Eski ou travay aplentan ouswa ou al lekol? En progranm ki pou ed ou servi plis bann wikenn i kapab pli itil pour ou. Si ou annan problenm lasante e ou napa ase lafors pour fer lazournen antye dan predikasyon, en progranm ki pou permet ou pas en pti gin letan dan predikasyon sak zour i kapab pli bon pour ou. Koz avek lezot lo ou dezir pour fer pionye asistan. Petet zot pou annan sa menm lobzektif.
5. Ki lobzektif bann zenn i kapab etablir pour mwan Mars, Avril, ek Me?
5 Fason ki bann Zenn i kapab partisipe: Zeova i kontan kan bann zenn i koz avek lezot lo son bann travay merveye. (Ps. 71:17; Mat. 21:16) Si ou zenn e ou’n batize, petet ou kapab fer pionye asistan dan en mwan ki annan vakans lekol. Si ou pa kapab fer pionye asistan, eski ou kapab etablir bann lobzektif pour ogmant ou partisipasyon e amelyor kalite ou predikasyon pandan sa bann mwan? Si ou pe partisip dan predikasyon avek ou paran me ou pa ankor vin en proklanmater, la i en bon moman pour ou esey kalifye. Pa krwar ki ou bezwen en eksper pour reponn bann kestyon baze lo Labib ouswa ki ou bezwen konn otan keksoz parey bann adilt ki’n batize. Eski ou konpran bann lansennyman debaz dan Labib? Eski ou swiv bann standar moral dan Labib? Eski ou ti a kontan ganny idantifye konman en Temwen Zeova? Alor, koz lo la avek ou paran. Zot kapab fer laranzman pour zwenn avek bann ansyen pour vwar si ou ranpli bann kondisyon.—Vwar liv Notre ministère, paz 98-9.
6. Ki mannyer nou kapab ed bann etidyan Labib pour vin bann proklanmater sa bon nouvel?
6 Ed lezot pour prese: Bann etidyan Labib ki pe progrese i kapab kalifye konman proklanmater pandan sa bann mwan spesyal ki pe aprose. Si ou annan en etidyan Labib ki pe fer bon progre, rod led avek ou sirveyan letid liv ouswa avek sirveyan servis. Enn ant zot i kapab akonpanny ou lo sa letid pour vwar progre sa etidyan. Si sa etidyan i kalifye e i anvi vin en proklanmater, sirveyan prezidan i kapab fer laranzman ki de ansyen i rankontre ou ek sa etidyan. (Vwar Latour Veyer le 15 Novanm, 1988, paz 17, an Angle ouswa Franse.) Enn fwa ki sa etidyan in ganny aksepte, konmans form li dan predikasyon toudswit.
7. Ki mannyer bann proklanmater iregilye ek inaktif i kapab ganny ede?
7 Bann sirveyan letid liv i devret donn latansyon spesyal bann inaktif ouswa bann iregilye dan zot group. Envit zot pour travay avek ou dan predikasyon. Si zot in inaktif pour en kantite letan, i byen si de ansyen i premyerman koz avek zot pour vwar si zot kalifye. (Vwar Kwen Kestyon dan Nou Minister Rwayonm Novanm 2000.) Devouman kongregasyon pandan sa bann mwan spesyal i kapab motiv zot pour partisip ankor regilyerman dan predikasyon.
8, 9. Ki bann ansyen i kapab fer pour kree lantouzyasm pour sa aktivite spesyal?
8 Prepar konmela menm pour plis Aktivite: I pou byen si bann ansyen i konmans kree lantouzyasm dan kongregasyon pour fer pionye asistan konmela menm. Ou pou kapab fer bokou par ou bann komanter ankourazan ek ou bon legzanp. (1 Pyer 5:3) Konbyen proklanmater ki ti fer pionye asistan lannen pase dan kongregasyon? Eski sa lannen nou kapab depas sa kantite? Bann sirveyan letid liv ek zot asistan i devret rod fason pour ankouraz tou dimoun dan group pour fer plis. Sirveyan servis i kapab organiz plis randevou predikasyon. Fer kongregasyon konn bann laranzman davans. Fer sir ki bann proklanmater kalifye i ganny dezinyen pour pran group e ki bann randevou predikasyon i konmans e fini aler. (Vwar Kwen Kestyon dan Nou Minister Rwayonm Septanm 2001.) Sirveyan servis i devret osi fer laranzman ki i annan sifizaman teritwar, magazin, ek piblikasyon.
9 Lannen pase, bann ansyen dan en kongregasyon ti konmans ankouraz bann frer ek ser byen davans pour fer pionye asistan. Serten sa bann ansyen ti fer laplikasyon. Zot ti organiz plis randevou predikasyon—enn 5:30 bomaten pour temwannyaz lo semen, en lot 3:00 apremidi pour bann ki sorti lekol, e enn trwazyenm 6:00 diswar pour bann ki sorti travay. Deplis, trwa randevou predikasyon ti ganny organize dan bann Sanmdi. Kongregasyon ti reazir e 66 ti fer pionye asistan an Avril!
10. Ki mannyer bann fanmiy i kapab prepare pour fer plis?
10 Akoz ou pa met letan dekote pandan ou prosenn letid fanmiy pour etablir bann lobzektif pour bann mwan ki pe vini? Si tou dimoun i korpere e zot fer en bon plan, serten ouswa zot tou dan lafanmiy i kapab fer pionye asistan. Si sa pa posib, etablir bann lobzektif pour ogmant kantite letan ki ou pase dan predikasyon ouswa soutenir bann randevou adisyonnel. Fer li vin size ou lapriyer avek ou fanmiy. Ou kapab asire ki Zeova pou beni ou bann zefor.—1 Zan 3:22.
11. (a) Ki keksoz merveye ki sakrifis Kris ti akonpli? (b) Ki ler ek landrwa Memoryal pou ganny obzerve?
11 Travay pli merveye Bondye: Donn son Garson konman en ranson pour nou i pli gran lekspresyon lanmour Zeova. (1 Zan 4:9, 10) Sa sakrifis i fourni baz pour liber limanite avek pese ek lanmor. (Rom. 3:23, 24) Sa nouvo lalyans ti ganny konfirmen par disan ki Zezi in verse. I osi fer li posib pour bann imen enparfe ganny adopte konman bann garson Bondye avek lespwar pour dirize dan Rwayonm lesyel. (Zer. 31:31-34; Mark 14:24) Pli enportan, lobeisans parfe Zezi i glorifye non Zeova. (Det. 32:4; Prov. 27:11) Dimans le 4 Avril apre soley kouse, Memoryal lanmor Kris pou ganny obzerve partou dan lemonn.
12. Ki mannyer bann ki enterese i kapab benefisye ler zot asiste Repa Senyer?
12 Komemorasyon Repa Senyer i glorifye bann travay merveye Zeova. Sa diskour pou ogmant lapresyasyon pour sa ki Zeova in fer pour fourni sa ranson. Bann dimoun enterese dan lasistans pou kapab obzerv lezot travay merveye Bondye. Zot pou kapab vwar linite e profon lanmour ki Zeova in ansenny son pep pour demontre. (Efe. 4:16, 22-24; Zak 3:17, 18) Kan en dimoun i asiste Memoryal sa i kapab fer en gran lefe lo son panse. Alor nou anvi ki otan dimoun i prezan sa zour.—2 Kor. 5:14, 15.
13, 14. Lekel ki nou devret envit Memoryal, e konman?
13 Envit lezot pour asiste Memoryal: Konmans prepar en lalis bann ki ou pou envite la konmela. Lo ou lalis i devret annan bann manm fanmiy ki pa Temwen, vwazen, dimoun ki ou konnen dan travay ouswa kot lekol, bann etidyan Labib dan lepase e konmela, ek tou bann retourn vizit. Bann sirveyan letid liv i devret enkli bann proklanmater inaktif lo zot lalis.
14 Servi bann lenvitasyon Memoryal, e ekrir ler ek landrwa Memoryal lo la. Oubyen ou kapab servi sa lenvitasyon lo paz deryer Latour Veyer le 1 Avril, 2004, ouswa Réveillez-vous! le 22 Mars, 2004. Anmezir ki le 4 Avril i aprose, rapel bann ki lo ou lalis, swa an personn ouswa par telefonn.
15. Ki mannyer nou kapab demontre lospitalite zour Memoryal?
15 Zour Memoryal: Esey ariv boner zour Memoryal. Demontre lospitalite par akey bann nouvo. (Rom. 12:13) Ou annan en responsabilite spesyal anver ou bann envite. Fer zot santi alez, e entrodwir zot avek lezot dan kongregasyon. Petet ou kapab ed zot pour ganny en plas obor ou. Si zot napa en Labib ouswa en liv kantik, fer laranzman ki zot swiv avek ou ouswa avek en lot dimoun. Apre Memoryal, fer ou disponib pour reponn okenn kestyon ki zot kapab demande. Si serten i la pour premye fwa, demann zot si zot ti pou kontan konn plis konsernan Parol Bondye ek son plan. Ofer pour fer en letid Labib avek zot.
16. Kwa ki kapab ganny fer pour ed bann ki ti asiste Memoryal pour progrese spirityelman?
16 Kontinyen ed bann ki ti asiste Memoryal: Semenn apre Memoryal, bann ki ti asiste i kapab bezwen plis led. Sa i enkli bann ki ti’n deza pe asiste bann renyon regilyerman me ki aprezan pa pe tro asosye avek kongregasyon. Bann ansyen pou fer atansyon ki sa bann dimoun pa ganny oubliye. Zot pou rode akoz sa bann dimoun in aret progrese spirityelman. Zot pou fer sa bann dimoun konpran akoz nou bezwen reste vizilan dan sa letan ki nou pe viv. (1 Pyer 4:7) Ed tou dimoun pour vwar byenfe ki nou gannyen ler nou obeir sa konsey Labib pour asosye regilyerman avek pep Bondye.—Ebr. 10:24, 25.
17. Akoz nou devret kontinyen koz lo bann travay merveye Zeova?
17 Bann travay Zeova i tro merveye pour nou konpran li konpletman menm si nou viv pour touzour. (Zob 42:2, 3; Ekle. 3:11) Alors, i pou toultan annan keksoz pour nou loue li. Sa sezon Memoryal nou kapab demontre nou lapresyasyon pour bann travay merveye Zeova par fer en zefor spesyal pour fer plis dan predikasyon.
[Latab lo paz 5]
Eski ou kapab fer Pionye Asistan par servi enn sa bann Progranm?
Mars Dim Len* Mar* Mer* Zed Van San Total Mwan
Sak Zour 2 1 1 1 1 1 5 51
De Zour 0 5 0 5 0 0 0 50
Zis Wikenn 5 0 0 0 0 0 8 52
Wikenn ek de
Zour Lasemenn 2 0 0 2 0 2 6 50
Avril Dim Len Mar Mer Zed* Van* San Total Mwan
Sak Zour 2 1 1 1 1 1 5 50
De Zour 0 0 0 0 5 5 0 50
Zis Wikenn 5 0 0 0 0 0 8 52
Wikenn ek de
Zour Lasemenn 2 0 0 2 0 2 6 50
Me Dim* Len* Mar Mer Zed Van San* Total Mwan
Sak Zour 2 1 1 1 1 1 4 51
De Zour 0 5 0 0 0 0 5 50
Zis Wikenn 3 0 0 0 0 0 7 50
Wikenn ek de
Zour Lasemenn 2 0 0 2 0 2 5 51
* Senk dan en mwan