‘Anons plennman Levanzil Bondye’
1. Ki bon nouvel nou bezwen proklanmen?
1 Dan en lemonn kot i pa fasil tann bon nouvel, nou annan sa privilez pour ‘anons plennman Levanzil lagras Bondye.’ (Akt 20:24) Sa i enplik fer dimoun konnen ki sa “bann dernyen zour” pou byento ganny ranplase par nouvo lemonn drwat Bondye, kot “lemonn ansyen [pou’n] disparet.” (2 Tim. 3:1-5; Rev. 21:4) Sa letan personn pa pou malad. (Iza. 33:24) Bann dimoun ki nou ti kontan ki’n mor pou sorti dan zot tonbo e zot pou reini avek zot fanmir ek zanmi. (Zan 5:28, 29) Later antye pou vin en zoli paradi. (Iza. 65:21-23) Sa i zis detrwa legzanp ki kalite bon nouvel nou bezwen proklanmen!
2. Akoz sezon Memoryal i en bon loportinite pour anons sa bon nouvel?
2 Nou pou ganny bon loportinite pour anons sa bon nouvel pandan mwan Mars, Avril ek Me. Pandan sa bann mwan, bon kondisyon letan e lefet ki i pou pli tarde pour fernwanr fer dan bokou pei, sa pou permet bokou pas plis letan dan predikasyon. E levennman pli enportan diran lannen, Memoryal, pou ganny obzerve dan lemonn antye apre soley kouse Sanmdi le 22 Mars. La i lemoman pour konmans fer preparasyon pour fer plis dan predikasyon.
3. Kwa ki kapab ed nou ogmant nou partisipasyon dan predikasyon konman en fanmir?
3 Pionye asistan: Eski ou kapab aranz ou plan pour fer pionye asistan pour enn, de, oubyen pour sa trwa mwan? Akoz ou pa pran en pe letan dan ou prosen letid fanmir pour konsider sa? Avek bon korporasyon, enn oubyen plis dan fanmir i kapab fer pionye asistan. (Prov. 15:22) Met tousala dan lapriyer e ou ava vwar konman Zeova pou beni ou zefor. (Prov. 16:3) Menm si personn pa kapab fer pionye asistan, tou dimoun dan lafanmir i kapab annan lobzektif spesifik pour ogmant zot partisipasyon dan predikasyon, par travay ansanm avek sa bann ki kapab fer pionye asistan.
4. Ki mannyer nou kapab aranz nou progranm pour fer pionye asistan si nou travay aplentan?
4 Menm si ou travay aplentan, si ou fer en bon progranm petet ou pou kapab fer pionye asistan. Petet ou kapab servi en pe letan pandan ou brek midi pour prese. Oubyen ou kapab rod en teritwar personnel obor kot ou reste oubyen kot ou travay e partisip dan predikasyon pour enn erdtan oubyen plis avan ouswa apre travay. Ou kapab ganny plis letan pour fer pionye asistan si ou anvoy bann aktivite ki pa enportan pour en lot mwan e si pandan wikenn ou pas lazournen antye dan predikasyon. Serten in menm kapab pran enn oubyen de zour vakans pour al predikasyon.
5. Ki mannyer ou kapab ed bann aze oubyen bann ki annan en dezabilite pour fer pionye asistan?
5 Si ou aze, ou annan en dezabilite oubyen ou napa bokou lafors, ou kapab fer pionye asistan si ou pas en ptigin letan tou le zour dan predikasyon. Demann Zeova pour donn ou “sa pisans ki napa son parey.” (2 Kor. 4:7) En ser ti kapab fer pionye asistan a laz 106 an! Avek led son fanmir ki Temwen ek lezot dan kongregasyon, i ti kapab pres portanport, fer bann vizit, asiste bann letid Labib e partisip dan lezot laspe predikasyon. I ti ede pour konmans dis letid Labib. I ti dir: “Ofiramezir ki mon reflesir lo sa gran privilez ki mon’n gannyen pour fer pionye asistan, mon leker i ranpli avek lanmour ek lapresyasyon pour Zeova, son Garson, ek Son bon lorganizasyon. Mon vreman anvi dir ‘mersi Zeova!’”
6. Ki mannyer bann zenn ki’n batize me ki ankor pe lekol i kapab fer pionye asistan?
6 Si ou en zenn ki’n batize e ou ankor lekol, petet ou osi ou kapab fer pionye asistan. Parey sa bann ki travay aplentan, i probab ki laplipar di tan ou pou bezwen al predikasyon dan wikenn. Petet ou osi kapab al dan predikasyon pour enn erdtan oubyen plis serten zour apre lekol. Si i annan vakans lekol pandan sa sezon Memoryal, eski ou kapab servi ou vakans pour partisip dan predikasyon? Si ou ti a kontan fer pionye asistan, koz avek ou paran lo la.
7. Ki bann ansyen i kapab fer pour devlop lantouzyasm pour predikasyon diran sezon Memoryal?
7 Devlop lantouzyasm: Par zot legzanp bann ansyen i kapab fer en kantite pour devlop lantouzyasm kongregasyon. (1 Pyer 5:2, 3) Zot kapab deside pour azout lezot randevou predikasyon pour bann ki pou prese byen boner bomaten, apre lekol oubyen apre travay. Sirveyan servis i devret fer sir ki i annan bann proklanmater kalifye pour pran bann randevou predikasyon, e ki i annan ase teritwar pour travay, osi byen ki magazin ek lezot piblikasyon pour sa bann mwan spesyal.
8. Ki nou aprann avek leksperyans en kongregasyon?
8 Plizyer mwan davans, dan en kongregasyon, bann ansyen ti ankouraz bann frer ek ser pour fer pionye asistan. Tou le semenn zot ti fer kongregasyon konnen ki kantite dimoun ki ti’n ganny aksepte pour fer pionye asistan. Sa ti fer lezot dan kongregasyon asire ki si zot ti oule fer plis dan predikasyon, zot ti pou ganny sa bon sipor. Lezot randevou predikasyon ti ganny mete boner dan bomaten e dan apremidi osi. An rezilta, 53 proklanmater, preski lanmwatye kongregasyon, ti fer pionye asistan!
9. Akoz sezon Memoryal i en bon loportinite pour bann ki kalifye konmans pres sa bon nouvel?
9 Ed lezot pour prese: Kan en nouvo oubyen en zenn i kalifye pour vin proklanmater, zot kapab ganny demande pour travay avek en proklanmater ki eksperyanse. Zot kapab ganny sa loportinite pour fer sa pandan sezon Memoryal, kan bokou dan kongregasyon pou ogmant zot aktivite. Eski ou annan en etidyan ki pe progrese e ki viv an armoni avek standar drwat Zeova? Eski ou annan zanfan ki byen konport zot ki pe fer progre me ki pa ankor vin proklanmater? Si zot in montre sa dezir pour vin proklanmater non batize e ou santi ki zot kalifye, les en ansyen konnen. Sir veyan prezidan pou anvoy de ansyen pour diskit sa ansanm avek ou ek ou zanfan ouswa ou etidyan.
10. Ki bann ansyen i kapab fer pour ed bann ki inaktif?
10 Sa bann mwan pou osi en bon moman pour sa bann ki’n vin inaktif pour rekonmans zot aktivite spirityel avek kongregasyon. Sak sirveyan Letid Liv ek lezot ansyen i devret fer en zefor entans pour vizit bann inaktif e avek lanmour envit bann inaktif pour vin travay avek zot dan predikasyon. Si zot in inaktif pour en bann letan, de ansyen i devret premyerman koz avek zot pour vwar si zot kalifye pour prese.—km 11/00 p. 3.
11. Ki sa pli gran aksyon pour demontre “lagras Bondye?”
11 Preparasyon pour Memoryal: Sa sakrifis i sa pli gran aksyon pour demontre “lagras Bondye.” (Akt 20:24) Plizyer milyon dimoun ki apresye sa dan lemonn antye, pou zwenn ansanm Sanmdi le 22 Mars, apre soley kouse, pour obzerv Memoryal, lanmor Kris. Nou anvi envit e ed tou bann dimoun senser pour asiste sa lokazyon enportan ki met an evidans gran labonte Zeova anver limanite.
12. Lekel ki nou devret envit Memoryal?
12 Fer en lalis tou bann ki ou ti a kontan envite. San dout lo ou lalis ou pou enkli ou fanmir, vwazen, dimoun ki ou konnen kot lekol, landrwa travay, ou bann etidyan, bann ki’n aret etidye ek lezot ki ou vizite regilyerman. Si serten ki ou envite i demann kestyon lo Memoryal, ou kapab vwar li itil pour servi sa lartik Repa Senyer anba lezot lenformasyon lo paz 206-8 dan liv Ki Labib i dir. Sa i kapab permet ou konmans en letid Labib, akoz ou pou ganny loportinite pour entrodwir sa piblikasyon nou servi pour kondwir letid Labib.
13. Konman Zeova ti beni zefor de proklanmater ki ti envit lezot Memoryal?
13 En ser ti fer en lalis 48 fanmir ki i ti anvi envite. Anmezir ki i ti envit zot, i ti rey zot non e i ti ekrir sa zour ki i ti envit zot. Pa i ti kontan kan 26 dimoun ki i ti envite ti vin Memoryal! En frer ki annan en laboutik ti envit enn son travayer, ki avan ti en pret. Sa zonm ti vini e apre i ti dir: “Dan enn erdtan mon ti aprann plis lo Labib ki sa 30 an mon’n pase avek Legliz Katolik.” Deswit apre Memoryal, i ti aksepte en letid dan sa liv Ki Labib i dir.
14. Ki kanpanny ki pou konmanse dan lemonn antye le 1 Mars?
14 Kanpanny: Apartir Sanmdi le 1 Mars ziska le 22 Mars, nou pou distribye en lenvitasyon spesyal pour Memoryal dan lemonn antye. Tou proklanmater pou anvi partisip plennman dan sa kanpanny enportan. I pli byen pour donn sa met lakour en kopi personnelman ki kit li anba laport. Me si teritwar i gran, bann ansyen i kapab deside pour kit lenvitasyon anba laport kot dimoun pa la, dan en fason ki lezot dimoun pa pou remarke. Dan wikenn nou pou osi ofer bann magazin ki nou’n gannyen.
15. Ki mannyer nou kapab prezant sa lenvitasyon?
15 Vi ki nou napa bokou letan pour distribye sa bann lenvitasyon, i byen si nou gard nou prezantasyon bref. Annan en lapros amikal ek lantouzyasm. Ou kapab dir en keksoz koumsa: “Nou pe fer sir ki ou, ou fanmir ek ou bann zanmi i ganny envite pour en levennman enportan ki pou ganny fer le 22 Mars. La en lenvitasyon pour ou. Tou detay i lo sa lenvitasyon.” Sa dimoun ki ou koz avek i kapab demann ou kestyon. Oubyen i kapab aksepte sa lenvitasyon e menm dir ki i pou vini. Not bann ki enterese e fer laranzman pour retournen en lot fwa.
16. Ki leksperyans ki montre lenportans sa kanpanny pour envit dimoun Memoryal dan teritwar?
16 Lannen pase en solda ti vwar sa lenvitasyon anba son laport. I ti deside pour asiste me i ti bezwen demann son serzan permisyon. Kan i ti montre serzan sa lenvitasyon, serzan ti reste trankil e apre i ti dir ki son paran i Temwen e ki i ti abitye asiste renyon avek zot. I pa ti zis donn sa solda permisyon pour ale, me zot ti al Memoryal ansanm!
17. Konman nou montre ki nou pa’n perdi lagras Bondye?
17 Montre lapresyasyon: Anmezir ki sezon Memoryal 2008 i aprose, nou tou annou reflesir lo gran labonte ki Zeova in demontre anver nou. Zapot Pol ti ekrir: “Nou sipliy zot pour pa les perdi sa lagras ki zot in resevwar.” (2 Kor. 6:1) Ki mannyer nou demontre ki nou pa’n perdi lagras Bondye? Pol ti ekrir: “Nou fer tou nou posib pour viv konman bann serviter Bondye.” (2 Kor. 6:4) Alors, nou demontre nou lapresyasyon pour sa kado ki Zeova in donn nou, par nou bon kondwit ek nou devouman pour pres sa bon nouvel. Pandan sa sezon Memoryal nou pou annan sa bon loportinite pour ogmant nou aktivite, e anons plennman Levanzil.
Lekel ki kapab fer pionye asistan?
◼ Fanmir
◼ Bann ki travay aplentan
◼ Bann aze oubyen ki annan en dezabilite
◼ Bann ki al lekol
Kan pe distribye lenvitasyon Memoryal:
◼ Koz dan en fason bref e avek lantouzyasm
◼ Not bann ki enterese e retournen
◼ Ofer magazin dan wikenn