Proklanm bann Keksoz merveye Zeova
1. Kwa ki pous nou pour proklanm bann mervey Zeova?
1 “I pour ou, O Zeova, grander ek pwisans ek labote ek siperyorite ek dinite; akoz tou keksoz dan lesyel e lo later i pour ou.” (1 Kron. 29:11) Ki lefe nou lanmour ek lapresyasyon pour Zeova i annan lo nou? I pous nou pour ‘proklanm bann keksoz merveye konsernan sa enn ki’n apel nou pour sorti dan fernwanr pour vin dan son lalimyer merveye.’ (1 Pyer 2:9) Nou pa kapab aret koz avek lezot lo nou gran Bondye! Pandan mwan Mars, Avril, ek Me nou pour ganny bann gran loportinite pour proklanm bann mervey Zeova.
2. Ki kanpanny spesyal ki’n ganny organize pour anons Memoryal e lekel ki kapab pran par?
2 Kanpanny spesyal pour anons Memoryal: Lendi le 2 Avril, nou pou met lanfaz lo bann mervey Zeova par komemor Repa Senyer. En lenvitasyon spesyal pour sa levennman enportan pou ganny distribye partou dan lemonn antye konmansman le 17 Mars ziska le 2 Avril. Tou dimoun i ganny ankouraze pour partisip plennman. Sa i kapab en moman apropriye pour bann nouvo konmans proklanm sa bon nouvel si zot kalifye. Si ou annan bann letid Labib oubyen zanfan ki kapab kalifye, pran linisyativ pour koz avek bann ansyen.
3. Ki nou kapab dir pour envit dimoun pour Memoryal?
3 Sa kanpanny i parey sa enn ki ti ganny fer pour Lasanble Distrik “Delivrans i pros!” Bann kongregasyon pou ganny ase lenvitasyon pour ki sak proklanmater i kapab ganny 50 kopi e sak pionye 150 kopi. Gard zot prezantasyon kourt, petet ou kapab dir: “Sa i ou lenvitasyon pour en levennman enportan ki pe vini, ki ganny fer tou le lannen. Ou pou ganny byen akeyir. Bann detay i lo sa lenvitasyon.” Byensir, si sa met lakour i annan kestyon, pran letan pour reponn zot. Sa lartik lo Repa Senyer dan liv Ki Labib i dir ki ganny trouve dan lezot lenformasyon lo paz 206 i kapab ed ou lo sa kote. Dan wikenn, nou pou ofer bann magazin resan ansanm avek sa lenvitasyon spesyal. Gard kontak avek bann ki montre lentere, e fer laranzman pour retournen.
4. Ki mannyer bann lenvitasyon spesyal pour Memoryal pou ganny distribye?
4 Kan i posib, sa lenvitasyon spesyal i devret ganny donnen avek sa met lakour personnelman. Pour sa rezon, mark tou lakaz kot napa personn e esey retourn plitar. Bann kongregasyon ki annan en bon pe lenvitasyon ki reste pou kapab kit zot kot lakour bann absan dernyen semenn avan Memoryal me pa avan. Fer sir ki ou bann retourn vizit, letid Labib, fanmiy, koleg travay, vwazen ek lezot dimoun ki ou konnen i ganny en lenvitasyon.
5. Akoz nou devret konmans fer nou plan pour fer pionye asistan la konmela?
5 Pionye asistan: Eski ou kapab proklanm plis bann mervey Zeova par fer pionye asistan pandan mwan Mars, Avril, ek Me? Pour fer sa ou pou bezwen aziste ou progranm toulezour. (Efe. 5:15-17) Ou kapab asire ki fer zefor pour fer plis dan servis Zeova pou anmenn lazwa ek benediksyon Zeova. (Prov. 10:22) Vi ki sezon Memoryal pe aprose, la i sa moman pour konmans fer ou plan.—Prov. 21:5.
6. Ki nou kapab aprann atraver leksperyans en ser 90 zan ki ti fer pionye asistan lannen pase?
6 En ser aze 90 zan ti vreman kontan sa privilez pour fer pionye asistan lannen pase. I ti dir: “Menm si mon kontan okip mon zarden e mon ti anvi konmans plante, mon ti realize ki mon ti bezwen annan en priyorite. Avek en dezir pour met lentere Rwayonm premye, mon ti deside pour fer pionye asistan an Mars.” Eski i ti ganny beni pour son zefor? I dir, “Mon santi mwan pli pros avek kongregasyon, e sa in fer mwan vin pli pros avek Zeova.” Eski nou kapab egzamin nou priyorite e fer bann sanzman neseser parey sa ser?
7. Eski i difisil pour fer pionye asistan?
7 Pour arive ganny 50 er-d-tan pour pionye asistan pa sitan difisil parey ou krwar. Konsider ou bann aktivite toulezour dan lapriyer, fer en progranm, e apre not li lo ou progranm aktivite spirityel. Ou ki konn ou sirkonstans personnel pli byen. Si ou annan problenm lasante e napa bokou lafors, petet ou kapab partisip dan predikasyon pour detrwa er-d-tan sak zour. Si ou travay oubyen lekol, petet ou kapab fer pionye asistan par partisip dan predikasyon dan apremidi apre ler travay oubyen dan wikenn.
8. Kwa ki ti permet en koup pour fer pionye?
8 Bokou in nobou fer pionye asistan an fanmiy. Dan bann lannen ki’n pase en koup ti ezite pour pran pionye asistan akoz zot ti santi ki zot sirkonstans pa ti permet zot fer sa servis. Ki zot ti fer? “Nou ti priy Zeova pour ed nou akonpli sa ki nou ti anvi fer ansanm tou sa letan.” Avek en bon plan zot ti arive akonpli zot lobzektif. Zot ti azoute: “I ti gou. Nou ti rezwir en kantite benediksyon ansanm. Nou sizere ki zot eseye. Si nou’n fer li, petet ou osi ou pou kapab fer li.”
9. Ki ou kapab fer pandan ou prosen letid fanmiy pour prepar pour sa bann mwan aktivite spesyal ki pe vini?
9 Akoz zot pa met en pe letan dekote pandan letid lafanmiy pour konsider konman zot tou zot kapab ogmant zot aktivite predikasyon pandan sa bann mwan ki pe vini? Menm si lafanmiy antye pa kapab fer pionye asistan, petet zis enn pou kapab avek led ek korperasyon larestan manm fanmiy. Si non, posibleman ou fanmiy i kapab met en lobzektif pour pas plis letan dan predikasyon pandan sa bann mwan aktivite spesyal.
10. Akoz nou devret koz avek lezot lo nou dezir pour fer pionye asistan pandan sa sezon Memoryal?
10 Ed Kanmarad: Ler ou annan lantouzyasm ou kapab pous lezot pour annan menm santiman. Koz lo ou dezir pour fer pionye asistan, i kapab ankouraz lezot pour pran sa servis. Anplis, bann ki’n fer pionye dan lepase pour kapab donn ou bann sizesyon ki pou ed ou pour aranz ou progranm ki ou ava arive akonpli ou lobzektif. (Prov. 15:22) Si ou kapab fer pionye asistan, akoz ou pa envit en lot proklanmater, petet enn ki annan menm sirkonstans avek ou pour zot fer sa aktivite agreab ansanm?
11. Ki mannyer bann ansyen i kapab kree lantouzyasm pour fer pionye asistan dan bann mwan ki pe vini?
11 Bokou ansyen in fer bann laranzman neseser pour partisip dan sa form servis spesyal. (Ebr. 13:7) Sirman sa i en lankourazman pour bann kongregasyon! Zot osi kree lantouzyasm par zot konversasyon avek lezot. Detrwa mo ankourazan oubyen serten sizesyon ki nou kapab aplike petet i egzakteman sa ki serten i bezwen pour motiv zot pour fer pionye asistan. I tre probab ki sirveyan servis pou organiz bann randevou predikasyon anplis, pour ki tou dimoun pou kapab zwenn group pour prese menm apre travay oubyen lekol. Sa bann laranzman pou ganny anonse regilyerman. I pou osi fer sir ki i annan ase teritwar ek bann piblikasyon pour prezante.
12. Ki ou kapab fer si ou pa kapab fer pionye asistan?
12 Menm si sirkonstans pa permet ou fer pionye asistan, ou kapab ankouraz bann ki’n pran sa servis e ou kapab priy pour zot. (Prov. 25:11; Kol. 4:12) Petet ou pou kapab fer laranzman pour sorti avek zot dan predikasyon en zour anplis pandan lasemenn oubyen pas en pti pe plis letan ki labitid dan predikasyon.
13. Ki lobzektif ki’n ganny mete pour Sesel e ki mannyer ou kongregasyon i kapab kontribye pour akonpli sa lobzektif?
13 Lobzektif pour Pionye asistan an Avril i 40: Maksimonm pionye asistan ki nou ti gannyen Sesel an Avril 2000 ti 34. Alors, en lobzektif rezonnab pour sa mwan Avril ki pe vini i 40 pionye asistan. Nou pour kapab fer li si an mwayenn 1 dan sak 6 proklanmater dan sak kongregasyon i fer pionye asistan. Byensir, dan serten kongregasyon i pou annan plis proklanmater ki zot sirkonstans pour permet zot fer pionye asistan. Me en tel lobzektif kongregasyon i kapab fasilman ganny atenn dan laplipar kongregasyon. Zis mazin sa leksitasyon ki sa pou anmennen dan kongregasyon e lefe pozitif ki sa pou annan lo sa travay predikasyon dan ou teritwar!
14. Akoz Avril i en bon mwan pour fer pionye asistan?
14 Akoz Avril i en bon mwan pour fer pionye asistan? Memoryal pou ganny selebre konmansman sa mwan, e sa pour donn nou ase letan pour retourn vwar bann ki pou’n asiste. Nou pou ofer bann magazin, avek bi pour plas liv Ki Labib i dir lo bann retourn vizit e konmans letid Labib. Alors, fer pionye asistan an Avril pou donn en kantite loportinite pour konmans bann letid Labib. Mwan Avril i annan senk Sanmdi avek en konze piblik, ki fer li pli fasil pour bann ki travay e bann ki lekol pour pran sa servis.
15. Akoz nou devret gard antet ki letan i kourt anmezir ki sezon Memoryal i aprose?
15 Sak sezon Memoryal ki pase i anmenn nou en lannen pli pros avek lafen sa sistenm. Sa letan ki reste pour koz avek lezot lo nou gran Bondye i vreman kourt. (1 Kor. 7:29) Enn fwa ki sa sezon Memoryal in pase, sa bann loportinite presye ki’n donn nou pour loue nou Papa dan lesyel pou’n ale pour touzour. Alor, annou konmans met nou pare depi la konmela pour ki nou kapab fer nou mye pandan mwan Mars, Avril, ek Me pour proklanm bann mervey Zeova!
[Bwat lo paz 4]
Eski nou kapab annan 40 Pionye asistan an Avril?
◼ Analiz ou priyorite
◼ Diskit bann lobzektif an fanmiy
◼ Koz avek lezot lo ou plan