Fer plan konmela menm pour fer plis dan predikasyon
1. Ki loportinite nou gannyen sak sezon Memoryal e ki nou kapab fer konman preparasyon?
1 Sak sezon Memoryal nou ganny en nouvo loportinite pour “loue Zeova en kantite.” (Ps. 109:30) Eski ou pou fer plis dan predikasyon pandan mwan Mars pour demontre ou lapresyasyon pour Bondye, sa Enn ki’n fer sa ranson posib? La i lemoman pour konmans prepar ou.—Prov. 21:5.
2. Ki mannyer ou ek lezot ti reazir kan zot ti tann sa lanons ki lakantite erdtan pour fer pionye asistan pandan mwan Avril ti’n diminyen?
2 Pionye asistan: Lannen pase bann kongregasyon ti vreman eksite kan zot ti aprann ki lakantite erdtan pour fer pionye asistan pandan mwan Avril ti’n diminyen. En frer ti ekrir: “Mon ankor pe lekol e i difisil pour mwan fer pionye ordiner. Mon pou ranpli sa form pour fer 30 erdtan me mon pou esey fer 50 erdtan pour mwan Avril.” En ser ki travay a plen tan ti ekrir: “Trant erdtan pou fasil pour fer!” Kan sa lanons ti ganny fer, en ser 80-z-an ki ti fer pionye lontan, ti dir: “Sa i sa moman ki mon ti pe espere! Zeova ti konnen ki fer pionye ti sa pli bon moman dan mon lavi!” Kant a bann frer ek ser ki zot sirkonstans pa ti permet zot fer pionye, zot ti esey fer plis dan predikasyon.
3. Ki rezon nou annan pour mazin fer pionye asistan pandan mwan Mars, Avril ek Me?
3 Mwan Mars pou en bon mwan pour fer pionye asistan vi ki nou pou kapab fer 30 oubyen 50 erdtan parey lannen pase. An plis ki sa, nou pou kapab partisip dan en kanpanny spesyal ki pou konmanse Sanmdi le 17 Mars pour envit bann dimoun pour vin Memoryal le 5 Avril. Bokou dimoun pou sitan kontan ki zot in fer plis dan predikasyon ki zot pou anvi fer 50 erdtan konman pionye asistan pandan mwan Avril ek Me osi.
4. Ki mannyer nou kapab fer plis dan predikasyon e avek ki rezilta?
4 Pandan lot Ladorasyon an Fanmir, akoz ou pa koz lo ki mannyer sak manm fanmir pou kapab fer plis dan predikasyon pandan sa sezon Memoryal? (Prov. 15:22) Demann Zeova pour beni ou zefor. (1 Zan 3:22) Si ou fer plis dan predikasyon, ou pa pou zis ganny plis loportinite pour loue Zeova me ou lazwa pou osi ogmante.—2 Kor. 9:6.