Eski ou pou fer pionye asistan?
1. Akoz sezon Memoryal i en bon letan pour fer plis dan predikasyon?
1 Sezon Memoryal i en bon letan pour fer plis dan nou minister. I en letan kot nou reflesir lo sa gran lanmour Zeova ki i ti demontre par donn son Garson konman en ranson pour nou. (Zan 3:16) Sa i fer nou lapresyasyon ek sa dezir pour koz lo Zeova ensi ki sa ki i pe fer pour limanite ogmante. (Iza. 12:4, 5; Lik 6:45) I osi en letan kot nou partisip dan en kanpanny spesyal pour envit bann ki nou konnen ek lezot dimoun dan teritwar pour vin asiste Memoryal avek nou. Apre Memoryal, nou fer zefor pour devlop plis lentere bann ki asiste. Eski ou pou fer plis dan predikasyon pandan mwan Mars, Avril oubyen Me?
2. Kwa ki fer Mars sirtou en bon mwan pour fer pionye asistan?
2 Fer Mars en mwan spesyal: Mars pou sirtou en bon mwan pour fer pionye asistan. Bann ki pou fer li i kapab swazir pour swa fer 30 erdtan oubyen 50 erdtan. Si vizit sirveyan rezyonal i tonm pandan mwan Mars, bann pionye asistan i kapab asiste sa renyon pour bann pionye ordiner ek pionye spesyal an antye. Kanpanny pour envit dimoun pour Memoryal Mardi le 26 Mars 2013 pou pli long ki dan lepase e i pou konmans le 1 Mars. Deplis, mwan Mars i annan senk wikenn. Alors, akoz ou pa reflesir seryezman pour fer sa mwan enn pli spesyal dan lannen?
3. Konman nou kapab fer plan pour fer plis dan predikasyon?
3 Fer plan konmela menm: La i ler pour revwar ou progranm e vwar kote ou bezwen aziste pour ki ou kapab fer pionye. I enportan pour lafanmir korpere, alor pran letan pandan ou Ladorasyon Fanmir pour diskit bann lobzektif ou fanmir e fer en progranm. (Prov. 15:22) Si ou pa kapab fer pionye asistan, pa dekouraze. Eski ou kapab aziste ou progranm pour ki ou reste pli lontan dan predikasyon zour ou sorti? Eski pandan lasemenn ou kapab sorti en zour an plis ki labitid?
4. Ki byenfe nou pou gannyen par fer plis pandan mwan Mars, Avril ek Me?
4 Anmezir nou fer plis dan predikasyon pandan mwan Mars, Avril ek Me, nou pou ganny plis lazwa ek satisfaksyon akoz nou pe servi Zeova e pe donn lezot. (Zan 4:34; Akt 20:35) Pli enportan ankor, nou zefor ek leta lespri sakrifis pou fer Zeova rezwir.—Prov. 27:11.