Plis loportinite pour loue Zeova
1. Ki nouvo laranzman ki pou ed nou “loue Zeova en kantite”?
1 An Mars sa lannen, in annan en nouvo laranzman e sa in donn bann proklanmater loportinite pour fer 30 erdtan konman pionye asistan sak mwan Mars, Avril e pandan sa mwan ki sirveyan rezyonal pou pe vizit bann kongregasyon. Si sirveyan pou la pour de mwan, bann proklanmater ki fer laplikasyon pour fer 30 erdtan i kapab swazir enn ant sa de mwan pour fer pionye asistan. Tou pionye asistan i kapab asiste an antye sa renyon ki i fer avek bann pionye ordiner e spesyal. Zis mazinen! Sa i vedir ki si nou pa kapab fer 50 erdtan, nou kapab kantmenm sa, “loue Zeova en kantite” konman pionye asistan 30 erdtan kat fwa par an.—Ps. 109:30; 119:171.
2. Ki byenfe bann ki fer pionye asistan pandan vizit sirveyan pou gannyen?
2 Pandan vizit sirveyan rezyonal: La aprezan, bokou plis frer ek ser pou kapab fer pionye asistan pandan vizit sirveyan e benefisye avek lankourazman kanmarad apre ki zot in pres avek li. (Rom. 1:11, 12) Bokou pionye asistan pou anvi pran en zour konze pandan lasemenn pour kapab pres avek sirveyan rezyonal. Sa bann ki travay pandan lasemenn i kapab demann li pour pres avek zot Sanmdi ouswa Dimans. An plis ki sa, eski pa i pou vreman ankourazan pour bann pionye asistan asiste sa renyon ki pou ganny fer avek bann pionye ordiner ek spesyal?
3. Akoz sezon Memoryal i en bon moman pour fer pionye asistan?
3 Pandan Mars ek Avril: Bann proklanmater ki ti profit byen sa laranzman pour fer pionye asistan 30 erdtan pour en mwan pandan sezon Memoryal oparavan pou annan sa sans pour “rann glwar Bondye” plis ankor, pa i vre! (Ebr. 13:15) Mars ek Avril i de bon mwan pour fer plis dan predikasyon konman pionye asistan. Sak lannen pandan sa bann mwan nou partisip dan en kanpanny eksitan pour envit lezot pour asiste Memoryal. Deplis, lefet ki bokou pe fer plis dan predikasyon pandan sezon Memoryal, nou kapab pres avek diferan proklanmater. Apre Memoryal, nou pourswiv lentere sa bann ki ti asiste e nou ankouraz zot pour vin asiste diskour spesyal. Eski ou leker pou motiv ou pour profit sa bann loportinite pour fer pionye asistan?—Lik 6:45.