En lobzektif ki vo lapenn pour sa nouvo lannen servis
1. Ki lobzektif nou kapab mazinen pour sa nouvo lannen servis?
1 Nou bezwen etabli bann lobzektif si nou anvi progrese spirityelman. Ki lobzektif personnel ou’n etabli pour sa nouvo lannen servis? En bon lobzektif i pour fer pionye asistan pour en mwan oubyen plis. Vi ki sa aktivite ki gou i normalman bezwen ganny planifye en pti pe letan davans, la i sa bon moman pour konmans fer ou plan. Akoz i bon pour mazin pionye asistan konman en lobzektif?
2. Akoz nou devret mazin fer pionye asistan konman en lobzektif?
2 Rezon pour fer pionye asistan: Fer pionye asistan i permet nou pour fer plezir nou Papa dan lesyel “pli byen ankor” par pas plis letan dan predikasyon. (1 Tesa. 4:1) Anmezir nou reflesir lo tou sa ki Zeova in fer pour nou, nou leker i motiv nou pour koz avek lezot lo li. (Ps. 34:1, 2) Zeova i remarke e apresye bann sakrifis personnel ki nou fer pour ki nou kapab fer plis dan predikasyon. (Ebr. 6:10) Nou santi nou zwaye ler nou konnen ki nou pe fer plezir Zeova par nou travay dir.—1 Kron. 29:9.
3, 4. Konman nou benefisye ler nou fer pionye asistan?
3 Normalman, pli ou fer en keksoz, pli ou vwar li pli fasil e pli ou kontan pour fer li. Ler ou pas plis letan dan predikasyon i fer ou pli alez pour koze. Ou pou vin pli kalipa pour konmans en konversasyon e pour byen servi Labib. Pli ou koz lo ou lafwa, pli i pou vin pli for. Bokou dimoun ki pa ti pe kondwir en letid Labib ti kapab konmans enn ler zot ti pe fer pionye asistan.
4 Fer pionye asistan i kapab sa lankourazman ki ou bezwen pour sorti dan en routin kot ou abitye fer keksoz spirityel me ki ou pa ti pe pran plezir ladan. En frer ki ti fer pionye ordiner dan lepase ti santi ki i ti pe pas tro bokou letan dan son travay profann, alors i ti deside pour li fer pionye asistan pour en mwan. I ti dir: “Mon pa ti oule krwar ki mannyer zis sa en mwan ti donn mwan lafors spirityelman! Mon ti fer laranzman pour mwan kontinyen fer pionye asistan e sa ti permet mwan fer pionye ordiner ankor enn fwa.”
5. Si nou santi ki nou pa ase kalifye, ki nou kapab fer pour sirmont sa santiman?
5 Sirmont lobstak: Serten i kapab ezite pour fer pionye asistan akoz zot santi ki zot pa ase kalifye konman proklanmater. Si sa ki pe anpes ou, Zeova i kapab ed ou zis parey i ti ed Zeremi. (Zer. 1:6-10) Menm si Moiz ti “annan lalang lour e i pa ti koz byen,” Zeova ti servi li pour akonpli Son lavolonte. (Egz. 4:10-12) Si ou santi ki ou pa ase kalifye, enplor Zeova pour donn ou kouraz.
6. Ki mannyer i kapab posib pour fer pionye asistan menm si nou annan problenm lasante oubyen en progranm byen sarze?
6 Eski ou ezite pour fer pionye asistan akoz problenm lasante oubyen akoz ou tro okipe? Si ou malad e ou aranz en progranm ki adapte avek ou sirkonstans, petet ou kapab fer pionye asistan. Si ou annan en progranm byen sarze, petet ou pou remarke ki ou kapab fer serten aktivite ki mwen enportan en lot mwan. Serten ki annan en travay aplentan in kapab rod letan pour fer pionye asistan par pran enn ou de zour konze.—Kol. 4:5.
7. Akoz i byen pour kontinyelman priye konsernan fer pionye?
7 Konman pour fer li: Priy Zeova konsernan ou lanvi pour fer pionye asistan. Demann li pour beni ou zefor pour fer plis dan ou minister. (Rom. 12:11, 12) I kapab ed ou pour fer bann bon desizyon konsernan konman pour aziste ou progranm. (Zak 1:5) Si ou napa sa dezir, demann Zeova pour ed ou trouv plezir dan travay predikasyon.—Lik 10:1, 17.
8. Ki mannyer aplik Proverb 15:22 i kapab fer li posib pour ou fer pionye asistan?
8 Diskit an fanmir lobzektif pour fer pionye asistan. (Prov. 15:22) Petet en manm fanmir i kapab fer pionye asistan avek sipor lezot kot lakour. Diskit avek lezot dan kongregasyon ou lanvi pour fer pionye, sirtou avek bann ki zot sirkonstans i parey pour ou. Sa i kapab ogmant ou lantouzyasm pour fer pionye asistan.
9. Ki mwan ou kapab swazir pour fer pionye asistan?
9 Anmezir ki ou revwar ou progranm teokratik pour sa nouvo lannen servis, kan ki ou pou kapab fer pionye asistan? Si ou travay aplentan oubyen ou lekol, ou kapab konsider bann mwan ki annan vakans, konze piblik oubyen senk Sanmdi ou Dimans. Par egzanp, mwan Septanm, Desanm, Mars ek Out i annan senk wikenn. Mwan Me i annan senk Sanmdi, e Zen i annan senk Dimans. Si ou annan problenm lasante, konsider bann mwan ki normalman i fer botan. Petet ou kapab osi mazinen pour fer pionye pandan sa mwan ki sirveyan rezyonal in ganny progranmen pour vizit ou kongregasyon. Pandan son vizit, ou pou annan en lot privilez pour asiste premye lanmwatye renyon ki ganny fer pour bann pionye ordiner. Vi ki Memoryal pou tonm le 22 Mars lannen prosen, Mars, Avril, ek Me i bann bon mwan pour fer pionye asistan. Enn fwa ki ou’n swazir mwan oubyen bann mwan ki ou pou fer pionye asistan, ekri en progranm ki pou permet ou ganny ou erdtan.
10. Ki ou kapab fer si ou pa kapab fer pionye asistan?
10 Menm si ou santi ki ou pa pou kapab fer pionye asistan pandan sa lannen servis ki pe vini, kantmenm sa ou kapab kontinyen devoue dan predikasyon. Kontinyen fer tou sa ki ou kapab dan predikasyon, e asire ki Zeova i apresye ou zefor pour donn li ou meyer dan son servis ki ou fer avek tou ou nanm. (Gal. 6:4) Siport e ankouraz bann ki kapab fer pionye asistan. Petet ou kapab aziste ou progranm pour ki ou kapab partisip dan predikasyon en zour anplis dan lasemenn avek bann ki pe fer pionye.
11. Akoz nou devret gard antet ki letan i kourt?
11 Pep Zeova i konsyan ki letan ki nou pe viv ladan i kourt. I annan en travay pour fer e sa se anons sa bon nouvel. Lavi dimoun i an danze, e i pa reste bokou letan. (1 Kor. 7:29-31) Lanmour pour Bondye e pour nou prosen pou pous nou pour fer tou sa ki nou kapab dan predikasyon. Avek zefor e en bon plan, petet nou pou kapab fer pionye asistan omwen en mwan pandan sa nouvo lannen servis, en lobzektif ki vo lapenn!