Prese e donn en Temwannyaz oprofon
1 Konman “en lider ek komandan,” Zezi ti prepar son bann disip pour sa gran travay predikasyon ki ti devan zot. (Iza. 55:4; Lik 10:1-12; Akt 1:8) Zapot Pyer ti dekrir sa travay ki Zezi ti’n donn zot dan sa parol: “I’n donn nou lord pour prese e anons [“donn en temwannyaz oprofon,” NW ] bann dimoun ki se limenm ki Bondye in etabli pour ziz bann vivan ek bann mor.” (Akt 10:42) Ki nou kapab fer pour donn en temwannyaz oprofon?
2 Nou kapab aprann en kantite letan nou konsider legzanp zapot Pol. Letan i ti rankontre bann ansyen dan kongregasyon Efez, i ti rapel zot: “Zot konnen ki mon pa’n kasyet nanryen ki kapab itil pour zot, ler mon’n ansennyen an piblik ek dan zot lakaz. Mon’n fer apel [“donn temwannyaz oprofon,” NW ] avek bann Zwif konman avek non-Zwif pour sanz zot lavi pese e vin kot Bondye, e krwar dan nou Senyer Zezi-Kri.” Kantmenm Pol ti pe andir bann leprev, i ti travay dir pour ki otan dimoun i tann sa mesaz. I pa ti zis kontant li pour partaz bann laverite debaz avek bann dimoun, me i ti fer tou sa ki i kapab pour dir zot “plan Bondye an antye.” Pour kapab fer sa, i ti pare pour fer zefor e fer bann sakrifis. I ti azoute: “Me mon pa atas okenn valer spesyal avek mon lavi, pourvi ki mon kapab akonpli mon misyon [“donn temwannyaz oprofon,” NW ] e fini sa travay ki Senyer Zezi in konfye mwan, pour anons Levanzil lagras Bondye.”—Akt 20:20, 21, 24, 27.
3 Konman nou kapab imit legzanp Pol ozordi? (1 Kor. 11:1) Par rod bann dimoun ki senser menm kan nou pe fer fas avek bann sitiasyon difisil, par esey partaz sa bon nouvel avek bann diferan group etnik ek langaz, e par fer bokou zefor pour ed bann dimoun enterese. (Mat. 10:12, 13) Sa i demann letan, zefor, ek lanmour pour nou prosen.
4 Eski ou kapab servi konman Pionye asistan? Mars ek Avril pou en bon loportinite pour ou donn en temwannyaz oprofon par fer pionye asistan. Pa i ti ankourazan lannen pase pour vwar sa kantite ki ti fer en zefor spesyal pour fer pionye asistan!
5 En ser 80 an, avek bokou problenm lasante ti ganny motive par sa lankourazman ki lorganizasyon Zeova ti donnen. I ti ekrir: “I’n eksit sa dezir ki mon ti annan depi lontan, e i’n fer mwan santi ki mon bezwen fer pionye asistan omwen pour ankor enn fwa.” I ti deside met en lobzektif pour mwan Mars. I ti dir: “Premye keksoz ki mon ti fer se asize e konte konbyen i pou koute. Mon ti koz lo la avek mon fiy akoz mon ti pou bezwen son led. I ti sirprann mwan kan li osi i ti pran en form pour li.” Pandan sa mwan, sa ser aze ti pas 52 er-d-tan dan predikasyon. “Plizyer fwa mon ti priy Zeova pour renouvle mon lafors kan mon ti santi li pe fini. Alafen lemwan, mon ti tre kontan e satisfe, e mon ti remersye Zeova plizyer fwa pour son led. Mon ti a kontan esey ankor.” Par tann lazwa ki sa ser ti gannyen akoz son zefor, i kapab ankouraz lezot ki byen anvi fer pionye asistan menm si zot annan problenm lasante grav.
6 En frer ki san ekspekte ti perdi son travay ti servi sa loportinite pour fer pionye asistan. Pandan sa mwan ki i ti pe fer pionye asistan, i ti santi li pli devoue dan travay predikasyon, e alafen lemwan, i ti konmans en nouvo letid Labib. I ti reflesir lo son leksperyans e dir: “Sa ti en mwan vreman satisfezan!” I ti vreman kontan akoz Zeova ti’n ed li e gid li. Wi, Zeova ti devid bokou benediksyon lo sa frer pour zefor ekstra ki i ti fer dan predikasyon, e i pou fer menm parey pour ou.—Mal. 3:10.
7 Pour bokou proklanmater, i pa fasil pour zot antreprann servis pionye asistan. Toudmenm, malgre bann responsabilite toulezour enkli responsabilite familyal ek bann difikilte personnel, bokou frer ek ser in kapab fer li. Donn en temwannyaz oprofon i souvan enplik sakrifye letan presye ek lenerzi ki nou annan, me i annan bann benediksyon ki spesyal.—Prov. 10:22.
8 Mars ek Avril i en letan ideal pour fer pionye asistan. I annan senk wikenn dan mwan Mars. Par prese pandan wikenn e apre travay, i kapab posib pour serten ki travay aplentan fer pionye asistan. Deplis, ou kapab profit bann zour konze piblik pandan mwan Avril. Serten i kapab dan vakans lekol oubyen dan konze travay, ki kapab ed zot pour fer 50 er-d-tan. Pour kapab fer en progranm 50 er-d-tan dan predikasyon pandan mwan Mars oubyen Avril, eski ou kapab servi enn sa model progranm pionye asistan ki enkli avek sa lartik? Diskit ou progranm avek lezot. Petet serten pou ganny ankouraze pour zwenn avek ou dan predikasyon. Si ou pa kapab fer pionye asistan, fikse en lobzektif spesifik pour sa de mwan, e siport bann ki kapab fer pionye. Fer ou plan la konmela pour pres plis pandan mwan Mars ek Avril.
9 Montre Lapresyasyon pour Memoryal: Sak lannen pandan letan Memoryal, rekonesans pour ranson i pous plizyer milye pour “servi byen tou bann lokazyon” pour vin pionye asistan. (Efe. 5:15, 16) Lannen pase ti annan 29 pionye asistan an Mars e 10 an Avril isi Sesel. Sa i fer en mwayenn 19 pour sakenn sa de mwan. Sa sif i bokou plis ki sa mwayenn 4 ki ti fer pionye asistan tou le mwan depi Septanm 2001 ziska Fevriye 2002. Sa letan Memoryal i en lot bon loportinite pour nou montre nou lapresyasyon senser pour sakrifis ranson Kris par ogmant nou partisipasyon dan predikasyon.
10 Anmezir ki le 16 Avril i aprose, reflesir lo ki Memoryal i vedir pour ou. Mazin bann levennman ki ti anmenn ver lanmor Kris ek bann panse ki ti trakas li bokou. Medit osi lo lazwa ki Zezi ti annan devan li e konman sa in ed li pour andir sa move tretman. Mazin lo son pozisyon konmela konman Sef kongregasyon, e osi konman pe diriz predikasyon ek travay pour fer disip. (1 Kor. 11:3; Ebr. 12:2; Rev. 14:14-16) Apre ki ou’n fer sa, demontre ou lapresyasyon pour tou sa ki Kris in fer, par partisip otan ki ou kapab dan predikasyon dapre ou sirkonstans.
11 Ankouraz lezot pour donn en Temwannyaz oprofon: Par partisip dan servis pionye asistan, bann ansyen ek asistan ministeryel i ganny en bon loportinite pour ed lezot. Ler zot pe travay avek bann proklanmater dan predikasyon e ler zot pe fer bann vizit pastoral, zot ganny bann bon loportinite pour ed lezot partisip plennman dan sa aktivite spesyal. Fotespere ki nou tou nou fer aktivite spesyal pandan mwan Mars ek Avril vin size nou lapriyer. Sa pou ranforsi nou bann zefor pour donn en temwannyaz oprofon.
12 Pandan ki tou ansyen ek asistan ministeryel pou korpere avek bann laranzman kongregasyon pour plis aktivite pandan mwan Mars ek Avril, sirveyan servis i devret pli konsernen pour fer bann bon laranzman pour predikasyon. I devret organiz bann landrwa, zour, ek ler predikasyon ki konvenyan pour lamazorite proklanmater e fer anonse regilyerman. Laranzman i kapab ganny fer pour zwenn plizyer fwa dan lazournen, pour donn tou dimoun dan kongregasyon en loportinite pour partisip dan plizyer laspe predikasyon. Sa i kapab enkli travay dan teritwar komersyal, lo semen, port-an-port, fer retourn vizit, ek temwannyaz par telefonn. Deplis, i devret fer laranzman pour annan sifizaman piblikasyon, magazin, ek teritwar pandan sa de mwan.
13 Liv Konnesans pou ganny ofer an Mars, avek bi pour konmans letid Labib. Bann bon sizesyon pour ofer liv Konnesans i aparet dan sipleman Nou Minister Rwayonm Zanvye 2002. Latour Veyer ek Réveillez-vous! pou ganny ofer an Avril. Esey servi bann prezantasyon ki trouve dan “Ki pour dir lo bann Magazin.” Tou dimoun i devret pran letan pour byen prepare pour kapab donn en temwannyaz oprofon.
14 Pa nou kontan pour travay anba direksyon Sef kongregasyon, Zezi Kri, e annan sa privilez pour partaz bon nouvel avek lezot! Anmezir ki mwan Mars ek Avril i aprose, annou ankor enn fwa fer zefor pour fer zot nou pli meyer mwan, par obeir lord Kris pour prese e donn en temwannyaz oprofon.
[Bwat lo paz 4]
Plizyer fason pour fer pionye asistan an Mars ek Avril 2003
Zour Er-d-tan
Lendi 1 2 — — 2 —
Mardi 1 — 3 — — —
Merkredi 1 2 — 5 — —
Zedi 1 — 3 — — —
Vandredi 1 2 — — — —
Sanmdi 5 4 3 5 6 7
Dimans 2 2 3 2 2 3
Mars 56 56 54 55 50 50
Avril 50 50 51 53 — —
Ki progranm ki apropriye pour ou?