Eski Nou Kapab Fer Avril 2000 Vin Nou Meyer Mwan?
1 Merkredi swar le 19 Avril, sa gran moman dan nou lannen servis pou arive. Sa zour, an mezir ki soley i kouse dan en landrwa apre lot lo later, sak kongregasyon ek group Temwen Zeova partou dan lemonn, pou rasanble pour selebrasyon Memoryal lanmor Krist. Nenport ki landrwa kot nou reste, komemorasyon sakrifis Zezi Kri pou sa pli gran levennman pandan lannen. Dat Memoryal pour sa lannen, i lo mwan Avril dan Calendrier des Témoins de Jéhovah 2000.
2 Mwan Avril antye, i ouver en loportinite spesyal pour nou demontre plennman nou lapresyasyon pour faver imerite ki Zeova in manifeste atraver sakrifis son garson. Koman sa? Lapot Pol ti ekrir: “Lanmour ki Krist i annan i obliz nou, parski se koumsa ki nou’n zize, ki en sel zonm in mor pour tou, alor, ki tou ti’n mor; e in mor pour tou, afen ki tou bann ki viv, i a nepli viv pour zot menm me pour sa enn ki’n mor pour zot e ki’n ganny releve.” (2 Kor. 5:14, 15) Annefe, sa mwan Avril nou kapab demontre ki nou pa pe viv, zis pour nou menm, me pour sa enn ki’n mor pour nou, e sa i a fer ki sa mwan pou vin nou meyer mwan koman bann minis sa Rwayonm!
3 Pran Pionye Asistan pour mwan Avril: Lapot Pol in manifeste en legzanp remarkab pour nou, kan i ti dir: “Mon pa atas okenn valer avek mon nanm konmsi i presye pour mwan, pourvi ki mon fini mon lakours e sa minister ki mon’n gannyen avek Sennyer Zezi, pour rann temwannyaz plennman konsernan sa bon nouvel lo faver imerite Bondye.” (Akt 20:24) Nou annan menm privilez pour rann en temwannyaz konplet konsernan Zeova Dye. Pour atenn sa bi, nou ti a kontan fer Avril vin nou meyer mwan dan aktivite pionye asistan!
4 Avek son senk wikenn konplet, Avril 2000 pou en mwan eksepsyonnel ki a permet bokou fer servis pionye. An Me 1998, kan nou ti atenn nou rikord pour pionye asistan, sa 22 ki ti partisipe ti reprezant 11 poursan lakantite proklanmater. Enn an plitar, lakantite proklanmater ki ti ganny raporte an Me 1999, ti ogmante par 7 poursan. Savedir ki nou annan en gran potansyel pour depas nou dernyen rikord pour pionye asistan. Deplis, kantite er-d-tan ki demande pour en pionye asistan in diminyen, ki fer ki sa laspe servis i vin aksesib pour bokou plis frer ek ser dan kongregasyon. Sak proklanmater batize i devret reflesir dan lapriyer, pour vwar si i kapab pran servis pionye asistan pour mwan Avril.
5 An servan mwan Avril lo Kalandriye 2000, planifye ou progranm konmela menm, pour mwan prosen. Deside ki zour ki ou pou kapab fer ou par dan predikasyon, e azout tou bann ler ki ou santi ou ti a kapab dedye dan sa aktivite pandan sa mwan. Enkli bann ler ki ou pase dan temwannyaz formel ensi ki enformel. Eski ler total ki ou gannyen i pros avek sa 50 er-d-tan ki ou bezwen pour pionye asistan? Si ou mank lakantite ler ki bezwen, eski ou ti a kapab fer okenn sanzman dan ou progranm pour ki ou fer sa letan pour pionye asistan? Ou pou bezwen zis en minimonm enn er-d-tan 40 minit sak zour, pour ganny 50 er-d-tan pour en mwan.
6 Aprezan ki ler neseser pour pionye ordiner in ganny redwir li osi, eski ou’n konsider antreprann sa minister aplentan? Akoz ou devret esper ziska Septanm? Avril i en mwan ekselan pour konmanse! Si ou pa sir lo ou abilite pour ganny sa 70 er-d-tan pour pionye ordiner, akoz ou pa sey pionye asistan pour mwan Avril e etabli en lobzektif 70 er-d-tan? Enn fwa ki ou vwar ou kapab fer li, petet ou pou pli dispoze pour fer ou laplikasyon pour zwenn ran bann pionye ordiner o pli vit posib.—Vwar Notre Ministère, paz 113-14.
7 Kontribye Plennman koman en Proklanmater sa Bon Nouvel: Pour nou tou, proklanmater oubyen pionye, nou lanmour veritab pour Bondye e pour nou prosen i pous nou pour fer avek tou nou leker, tou sa ki nou kapab dan servis Zeova, dapre nou sitiasyon personnel. (Lik 10:27) Nou alor montre, ki “nou pe travay dir e ki nou pe lite, akoz nou’n met nou lesperans dan en Dye vivan, ki en sover pour tou sort zonm, sirtou bann ki fidel.” (1 Tim. 4:10) Se pour sa ki nou ti a ekspekte vwar 100 poursan partisipasyon an Avril, setadir ki tou proklanmater pou fer plennman son par dan sa travay pour Rwayonm.
8 Annou pa oubliy konsey Zezi: “Rekolt i gran, me zouvriye i pti gin. Alor sipliy Met rekolt pour anvoy zouvriye dan son rekolt.” Deswit apre ki i ti’n dir sa, Zezi ti apel son 12 zapot e i ti anvoy zot prese. (Mat. 9:37, 38; 10:1, 5, 7) Anviron enn an plitar, apre ki sa 12 zapot ti’n byen formen dan aktivite predikasyon, Zezi ti “selekte swasanndis lezot e anvoy zot,” avek menm lenstriksyon: “Wi, rekolt i gran . . . Alor sipliy Met rekolt pour anvoy zouvriye dan son rekolt.” (Lik 10:1, 2) Liv Akt dan Labib i raporte ki mannyer Zeova ti reponn zot lapriyer. An Lapannkot 33 N.L., lakantite disip ti’n agrandir ziska apepre 120. Answit, en maksimonm 3,000 ek 5,000 disip ti rikorde konsekitivman. (Akt 1:15; 2:41; 4:4) Apre sa, “lakantite disip ti kontinyen miltipliye.” (Akt 6:7) Pareyman, dan nou letan, nou devret kontinyen sipliy Met pour anvoy ankor plis predikater Rwayonm! An akor avek nou lapriyer, sak proklanmater dan kongregasyon i devret fer bann laranzman defini, pour partisip dan minister tou-le-mwan.
9 Silvouple, get byen mwan Avril lo Kalandriye 2000. Vi ki sa de premye zour Avril i en Sanmdi ek en Dimans, eski ou ti a kapab partisip dan predikasyon sa wikenn, pour pran en bon depar pour sa mwan? Eski ou ti a kapab soutenir sak “Zournen Magazin” pandan sa mwan avek ou group Letid Liv? Eski i ti a posib pour ou dedye omwen enn er-d-tan dan minister sak Dimans? Akoz ou pa esey partisip dan temwannyaz aswar? Pa oubliye osi pour profit bann loportinite ki ou gannyen pour fer temwannyaz enformel dan travay, kot lekol, oubyen dan bann lezot aktivite tou-le-zour. Mark bann zour ki ou kapab pas letan dan minister, e servi kalandriye pour rikord ou letan pour sa mwan.
10 Avril i sa letan apropriye pour tou bann ki kalifye e ki’n ganny laprouvasyon bann ansyen, pour konmans servi koman en proklanmater non-batize. Si ou pe kondwir en letid Labib avek kelken, eski sa dimoun in fer ase progre pour apros sirveyan prezidan pour konsider li koman en proklanmater bon nouvel? Si ou annan bann zanfan ki pa ankor batize, eski ou’n diskit zot progre spirityel avek bann ansyen? Eski sa pa ti a en bon letan pour zot konmans prese?—Vwar Notre Ministère, paz 97-100.
11 Dan nou zefor pou fer Avril 2000 vin nou meyer mwan, nou tou nou devret pran par dan minister e met nou rapor predikasyon lafen-d-mwan. (Vwar Mark 6:3) Bann nouvo proklanmater non-batize ki pe pran par dan predikasyon pour premye fwa, i devret ganny ankouraze pour raport zot aktivite aler. An fezan nou par, nou kapab donn en bon kontribisyon pour rapor Avril, nou pou osi kontribye dan sa gran kri louanz ki nou pou ofer Zeova atraver bann zefor pour temwannyen.
12 Anmenn Lezot Avek Ou pour Memoryal: Pa ti ava en gran lazwa pour vwar en nouvo rikord sa lannen, pour lasistans Memoryal lanmor Krist? Byensir! Sa pou endike ki pli bokou dimoun ki zanmen avan, in rasanble ansanm pour montre zot lapresyasyon pour pli gran lekspresyon lanmour ofer pour nou par Zeova Dye ek Zezi Kri! (Zan 3:16; 15:13) Fer bann laranzman neseser pour ki nanryen pa anpes ou ek ou fanmiy asiste Memoryal.
13 La i osi sa letan pour konmans envit lezot pour Memoryal. Fer en lalis tou dimoun ki ou ti a anvi vwar pe asiste. Enkli tou bann ki’n etidye Labib dan lepase, bann ki pe etidye aktyelman, e tou ou bann retourn-vizit. Azout lo ou lalis bann konnesans dan travay, dan lekol, bann vwazen, e nenport ki ou fer biznes avek. Pa oubliy ou bann fanmiy e lezot ki ou konnen. Apre ki ou’n konplet ou lalis, konmans ofer en lenvitasyon senser e personnel avek sakenn. Fer kler kan e kote Memoryal pou ganny fer. An mezir ki le 19 Avril i aprose, rapel bann ki lo ou lalis, swa an personn oubyen par telefonn. Ofer pour akonpanny zot pour Memoryal sa zour swar.
14 An akor avek sa direktiv ki Lasosyete ti donnen oparavan, bann ansyen pou fer en zefor spesyal pour ankouraz tou bann proklanmater ki inaktif dan teritwar, pour asiste Memoryal. (Mat. 18:12-14) Bann ansyen ti a swete revwar let Lasosyete date le 2 Fevriye, 1999. Sekreter kongregasyon pou fer en lalis tou bann proklanmater ki inaktif, e sirveyan servis pou demann sak ansyen pour al vwar serten parmi zot e envit zot Memoryal. Petet si zot resevwar en vizit pastoral byen ankourazan o pli vit posib, sa bann ki inaktif a kapab ganny asiste pour revin aktif dan predikasyon, menm pandan mwan Avril. I pou vreman edifyan pour zot, si zot kapab partisip dan predikasyon avek en proklanmater pli eksperyanse.
15 Promot en Bon Korperasyon pour Avril! I pou demann en bon lorganizasyon de la par bann ansyen, asistan ministeryel, ek bann sef lafanmiy pour fer Avril 2000 vin nou meyer mwan. Bann ansyen pou montre zot konsyansye, kan zot pou montre legzanp e byen organiz tou keksoz. (Ebr. 13:7) Bann laranzman pratik i bezwen ganny fer pour bann randevou predikasyon, dan lasemenn ek dan wikenn. Randevou siplemanter pour servis i osi kapab ganny fer lo tar apremidi. En progranm antye pour tou sa ki’n ganny planifye pour fer pandan Avril, i devret ganny afise lo bord lenformasyon. Pou annan en dimoun ki responsab pour pran sak randevou ki’n ganny progranmen pour servis. I devret annan sifizaman teritwar pour satisfer bezwen sak group.
16 Pandan mwan Avril nou pou ofer magazin La Tour de Garde ek Réveillez-vous! Dan nou zefor pour konmans letid Labib, nou kapab ofer brosir Ekspekte avek tou bann ki montre lentere. Alor, en bon provizyon magazin ek brosir i neseser.
17 Lafen-d-mwan, tou bann kondikter letid liv ek zot asistan pou ankouraz sakenn dan zot group pour met zot rapor predikasyon osito ki mwan i fini. Petet zot menm kapab fer li Dimans le 30 Avril. Apre, kan sekreter i fer antre bann rapor, si i vwar ki serten proklanmater pa’n met zot rapor, i kapab rapel zot byen zantiman pour fer li avan le 6 Me, kan i pou remet rapor kongregasyon avek Lasosyete. Probableman i pou demann lasistans avek bann kondikter letid liv, pour kontakte sa bann proklanmater.
18 Peryod Memoryal i sa letan pli enportan dan lannen pour pep Bondye. I devret en letan pli okipe pour nou tou ki dan servis Zeova. E sa pou posib si nou tou nou donn nou meyer kontribisyon koman bann proklanmater sa bon nouvel, si sa bann ki kapab fer pionye asistan i fer li, e si nou montre nou bon travay an anmennan lezot avek nou pour Memoryal lanmor Krist. Annou senserman priy pour benediksyon abondan Zeova, pandan ki nou esey fer Avril 2000 vin nou meyer mwan, tou sa pour laglwar ek loner Zeova!—Ebr. 13:15.
[Bwat lo paz 3]
Pionye Asistan
Nou Rikord: 22
(Me 1998)
[Bwat lo paz 4]
Proklanmater
Nou Rikord: 213
(Out 1999)
[Bwat lo paz 5]
Lasistans Memoryal
Nou Rikord: 517
(1999)