Avril—En Letan Pour Nou ‘Travay Dir e Fer Zefor Entans’
1 Bann semenn avan e apre Memoryal i en letan refleksyon pour pep Zeova. Sa i en letan pour mazin lo sa ki’n ganny akonpli par lanmor Kris e pour kontanple sa lespwar ki Bondye in donn nou atraver disan ki Zezi in verse. Ler ou mazin le 19 Avril lannen pase, kwa ki vin dan ou lespri? Eski ou kapab rapel bann figir ki ou ti vwar sa zour swar? Sa bon latmosfer spirityel sa swar? Sa diskisyon serye lo Labib ek sa lapriyer profon? Petet ou ti fer rezolisyon pour demontre pli byen profonder ou rekonesans pour lanmour ki Zeova ek Zezi in montre pour ou. Ozordi, ki lefe en tel refleksyon in annan lo ou?
2 I kler ki pep Zeova i manifeste rekonesans par lezot fason apar ki zis parol. (Kol. 3:15, 17) Avril lannen pase an partikilye, nou’n esey nou mye pour montre nou lapresyasyon pour bann provizyon Zeova pour delivrans par depans nou letan dan minister Kretyen. Ti annan 34 pionye asistan konpare avek 15 son lannen presedan isi Sesel. Zot zefor, ansanm avek tou lezot proklanmater Rwayonm, ti fer en nouvo maksimonm dan ler, plasman magazin, ek retourn vizit. Nou lazwa ti ogmante pour vwar plizyer nouvo letid Labib konmanse e en nouvo maksimonm dan lasistans Memoryal!
3 Vreman, sertitid nou lesperans i motiv nou pour fer bann aksyon. I zis parey sa ki lapot Pol ti ekrir: “Se pour sa ki nou pe travay dir e ki nou pe fer zefor entans, akoz nou’n met nou lesperans dan en Bondye vivan, ki en Sover pour tou sort zonm, sirtou bann ki fidel.”—1 Tim. 4:10, NW.
4 Pandan sa letan Memoryal, konman ou pou demontre ou lafwa dan bann provizyon Zeova pour ganny lavi? Avril lannen pase, 216 proklanmater Rwayonm lo sa maksimonm 225 ki’n deza rikorde Sesel, ti remet en rapor servis. Eski nou kapab depas sa sif sa Avril? I posib pour nou realiz sa. Me tou proklanmater, batize e non batize, pou bezwen partisipe. Bokou nouvo i kapab osi kalifye pour pran par. An konsekans, anmenmtan ki ou fer plan pour travay dir e fer zefor entans sa Avril, konsider bann fason ki ou kapab stimil lezot, enkli bann pli nouvo e mwen eksperyanse pour akonpanny ou.
5 Ed Serten Pour Repran Zot Aktivite: Si ou konn serten ki pa’n prese pour enn ou de mwan, petet ou kapab ankouraz li e envit li pour akonpanny ou dan predikasyon. Si serten dan kongregasyon in vin inaktif, bann ansyen pou fer en zefor spesyal pour vizit zot e ankouraz zot pour rekonmanse an Avril.
6 Nou tou nou devret kontinyen demann lespri Zeova pour fortifye nou dan son servis. (Lik 11:13) Ki fodre nou fer pour resevwar sa lespri? Lir Parol enspire Bondye. (2 Tim. 3:16, 17) Nou devret osi ‘ekout sa ki Lespri i dir avek bann kongregasyon’ par asiste tou le senk renyon lasemenn. (Rev. 3:6) Konmela menm i sa moman apropriye pour ed bann iregilye e inaktif pour amelyor zot latitid etidye e vin regilye dan zot lasistans pour renyon. (Ps. 50:23) Nou fer sa me anmenmtan nou vey nou prop byennet spirityel. Toudmenm, i demann en lot keksoz.
7 Lapot Pyer ti eksplike ki Bondye i donn son lespri sen “bann ki obei li.” (Akt 5:32) En tel lobeisans i enkli port latansyon lo sa lord “pour prese e anons bann dimoun.” (Akt 1:8; 10:42) I vre ki nou bezwen lespri Bondye pour fortifye nou pour prese, me si nou demontre nou dezir pour fer Zeova plezir, i pou ed nou plis ankor. Fotespere ki nou pa diminyen sa lenportans pour pran sa bann premye pa ver en lobeisans senser!
8 Ed Bann Zenn: Paran, eski ou’n vwar levidans ki ou zanfan i anvi koz avek lezot konsernan laverite? Eski zot pe akonpanny ou dan predikasyon? Eski zot egzanpler dan zot kondwit? Si wi, akoz ezite? Apros en manm Komite Servis Kongregasyon, e vwar si ou zanfan i kalifye pour vin en proklanmater sa Avril. (Vwar liv Notre Ministère, paz 99-100.) Rekonnet ki ou zanfan i kapab kontribye dan en fason enpresyonan pour loue Zeova sa letan Memoryal.—Mat. 21:15, 16.
9 En manman Kretyen an Georgia, Lanmerik, ti toultan ankouraz son zenn fiy pour koz avek lezot konsernan Zeova. Lannen pase, pandan ki sa fiy ti dan predikasyon avek son manman, i ti plas en brosir Ekspekte avek en zonm e i ti eksplik an bref son konteni. Sa Msye ti demann sa fiy: “Ki laz ou annan?” Sa fiy ti dir: “Set an.” Sa zonm ti sirprann pour vwar ki sa fiy ti fer en bon prezantasyon. I ti osi leka ki sa zonm ti annan kontak avek laverite ler i ti pli zenn me i pa ti’n zanmen pran li konman en fason viv. En pe letan apre, en letid Labib ti pe ganny fer avek sa zonm, son madanm ek son fiy.
10 Bokou zenn i deza proklanmater, e nou apresye zot prezans kan zot travay ansanm avek nou dan predikasyon. Sa bann zenn i kapab motiv e ankouraz lezot zenn ki menm laz avek zot. Me Avril i osi en letan apropriye pour bann fanmiy fortifye zot lyen e grandir spirityelman par travay ansanm dan servis sakre. Bann sef fanmiy i devret pran linisyativ.—Prov. 24:27.
11 Ed Bann Nouvo: Ki ou panse lo bann ki pe etidye Labib avek ou? Eski i posib pour zot kontribye anver sa zefor spesyal an Avril? Petet zot ti eksprim en dezir pour dir lezot sa ki zot pe aprann ler ou ti etidye sapit 2, paragraf 22, oubyen sapit 11, paragraf 14, dan liv Konnesans avek zot. Si ou pros pour fini etidye sa liv avek zot, prepar pour diskit klerman sa size pandan ki ou kouver sapit 18, paragraf 8, ki deklare: “San dout, ou enpasyan pour rakont ou bann fanmiy, zanmi ek lezot sa ki ou pe aprann. Petet ou’n deza konmans fer sa, parey Zezi ti partaz sa bon nouvel avek lezot dan nenport ki sitiasyon. (Lik 10:38, 39; Zan 4:6-15) Aprezan petet ou anvi fer plis.” Eski sa i leka avek sa bann ki ou pe etidye?
12 Eski ou etidyan i krwar Parol Bondye? Eski i pe aplik bann prensip Labib? Eski i’n aranz son lavi an armoni avek bann standar divin? Eski i pe asiste bann renyon kongregasyon? Eski i anvi servi Zeova Bondye? Alor akoz ou pa ankouraz li pour koz avek bann ansyen afen ki zot kapab determinen si i kalifye pour vin en proklanmater non batize e travay ansanm avek ou an Avril? (Vwar liv Notre Ministère, paz 97-9.) Dan sa fason i ava kapab eksperyans pour li menm konman lorganizasyon Zeova pou siport li dan son zefor pour servi Zeova.
13 I vre ki serten etidyan i progres pli vit ki lezot. Donk, an armoni avek konsey ki trouve dan Nou Minister Rwayonm Zen 2000, paz 4, paragraf 5-6, bokou in etidye en dezyenm liv avek dimoun ki o debi ti montre en lentere me ki ti bezwen led adisyonnel pour vin enn ki asosye aktivman. Nou pa zanmen perdi lespwar ki sa bann ki annan leker senser pou vin vre disip Kris, “ki to ki tar.” (Akt 26:29) Toudmenm si lakantite mwan ki ou’n pase pour etidye avek bann tel dimoun i kapab ganny dekrir konman “tar,” eski pa sa letan Memoryal i en bon loportinite pour ou etidyan konmans montre profonder son lapresyasyon pour ranson Kris?
14 Konman Pour Ed Zot Partisipe: Nou aprann bokou konsernan ed bann ki kalifye pour konmans prese ler nou egzaminen konman ki Zezi ti form lezot. I pa ti zis rod en lafoul e dir son bann zapot konmans koze. I ti premyerman met lanfaz lo nesesite sa travay predikasyon, i ti ankouraz zot pour priye, e apre i ti donn zot trwa provizyon debaz: en konpanyon, en teritwar, ek en mesaz. (Mat. 9:35-38; 10:5-7; Mark 6:7; Lik 9:2, 6) Ou kapab fer parey. Si ou pou ed ou prop zanfan, en nouvo etidyan, oubyen en dimoun ki pa’n raport okenn aktivite pour en pe letan, i ti ava byen pour fer en zefor spesyal pour swiv sa bann lobzektif swivan.
15 Fer Resorti sa Nesesite: Transmet avek sa dimoun lenportans travay predikasyon. Montre ki ou pozitif konsernan sa aktivite. Rakont bann leksperyans ki montre ki kongregasyon pe akonpli dan minister. Demontre latitid ki Zezi ti eksprimen dan Matye 9:36-38. Ankouraz sa fitir proklanmater ou sa enn inaktif pour priy konsernan son partisipasyon personnel dan predikasyon osi byen pour sikse dan sa travay mondyal.
16 Ankouraz sa Dimoun Pour Mazin lo Tou Loportinite ki Annan Pour Donn Temwannyaz: Mansyonn sa posibilite ki annan pour rankontre son group letid liv pour predikasyon port-an-port. Diskit konsernan fer konversasyon avek bann fanmiy ek konnesans oubyen koz avek koleg travay oubyen kanmarad lekol pandan ler manze. Ler nou pe vwayaz dan transpor piblik, i fasil pour konmans en konversasyon par senpleman montre en lentere personnel avek en pasaze. Ler nou pran sa linisyativ, sa i souvan kree en sitiasyon pour donn en bon temwannyaz. I vreman annan bokou lokazyon pour partaz nou lesperans avek lezot “sak zour.”—Ps. 96:2, 3.
17 Probableman, i pou pli meyer pour ou ek sa nouvo proklanmater travay ansanm port-an-port osito posib. Si ou’n etabli en lobzektif pour ogmant ou servis pandan Avril, demann sirveyan servis si en teritwar apropriye i disponib. Si wi, i pou donn ou bann loportinite pour travay sa teritwar oprofon. Par egzanp, ler ou fini prese oubyen ler ou pe al renyon oubyen lezot landrwa, e ou remarke ki i annan en dimoun kot en lakour ki ti napa personn avan sa oubyen kot ti annan kelken ki ti montre en lentere. Si i apropriye, fer en pti vizit sa ler ki pou pli efikas. Sa, an retour, pou kontribye ver en santiman lakonplisman ek lazwa dan minister.
18 Prepar en Mesaz Atiran: I de keksoz diferan pour en dimoun anvi partaz mesaz Rwayonm, e pour santi li konfidan dan son fason ki i kominik sa mesaz, sirtou si i nouvo oubyen i fer lontan ki i pa prese. Ed bann nouvo ek bann inaktif pour prepare i en letan ki vo lapenn depanse. Renyon Servis ek renyon pour predikasyon i kapab fourni bann lide itil, me preparasyon personnel pa kapab ganny ranplase par okenn lezot mwayen.
19 Konman ou kapab ed bann nouvo pour prepar pour predikasyon? Konmans avek en prezantasyon magazin, e gard li senp e bref ! Demann zot pour mazin bann levennman dan nouvel ki pou konsern bann dimoun dan teritwar, e apre rod en pwen dan enn bann dernyen magazin ki koz lo la. Fer repetisyon sa prezantasyon ansanm, e servi li dan predikasyon osito posib.
20 Devlop Nou Potansyel Pour Plis Ogmantasyon: Lannen pase lasistans Memoryal ti 14.8 milyon. Lakantite ki ti pe raporte konman proklanmater ti zis parlao sis milyon. Sa i vedir ki apepre 8.8 milyon dimoun ti annan ase lentere pour asiste sa progranm spesyal kot zot ti antann en lansennyman enportan dan Labib ganny eksplike. Zot ti ganny posibilite pour konn serten parmi nou, ki tre probab in annan en lefe favorab lo zot. Laplipar zot i koz byen lo nou, ki kontribye anver nou travay dan lemonn antye e defann nou devan lezot. Sa gran group i reprezant en potansyel pour plis ogmantasyon. Ki nou kapab fer pour ed zot fer plis progre?
21 Lamazorite bann nouvo i asiste Memoryal akoz en lenvitasyon personnel fer par enn parmi nou. Ordinerman, sa i vedir ki zot konn omwen en dimoun dan lodyans. Si nou envit en dimoun e i vini, nou annan en responsabilite pour fer li santi alez e ed li pour benefisye sa progranm o maksimonm. Vi ki lasal pou plen, ed li trouv en plas. Pret li en Labib e envit li pour swiv avek ou dan ou liv kantik. Reponn okenn kestyon ki i kapab demande. Ou latansyon personnel e amikal ki ou donn li i kapab vin en fakter mazer pour kiltiv son lentere. Byensir, sa i responsabilite nou tou—si nou vwar en figir ki pa familye, ofer en lakey byen amikal e fer konversasyon bref pour fer konnesans.
22 Kan en dimoun i asiste Memoryal, sa i kapab annan en vre lenpak lo son fason panse. Lefe ki i’n vin sa renyon i kapab vedir ki i pa ankor trouv sa ki i pe rode lezot landrwa e ki nou pe ofer en keksoz ki i vwar sa nesesite pour egzamin pli profon. Leksplikasyon sa provizyon merveye, ranson, i kapab en revelasyon profon pour en dimoun ki napa konsep lo lanmour ekstraordiner Zeova. I kapab fasilman vwar ki nou diferan—ki nou senser, amikal, ki nou respe e kontan lezot. Nou lasal napa okenn resanblans avek sa ki i’n kapab vwar dan bokou legliz ki annan bann zidol ek bann seremoni san valer. I sir ki bann nouvo pou remarke ki lodyans i konpoze avek dimoun diferan ran e napa okenn laket. Sa kontakt i kapab en motivasyon pwisan pour zot retournen.
23 Apre Memoryal, nou devret alert pour fourni plis lasistans pour tou bann nouvo ki’n asiste. Si ou ti envit bann nouvo, ou annan en responsabilite spesyal. Avan ki zot ale, fer sir ki zot konn lezot renyon Lasal Rwayonm. Mansyonn tit prosen diskour piblik. Les zot konn landrwa ek ler Letid Liv Kongregasyon ki pli pros avek zot. Plitar, donn zot en kopi liv Créateur, e fer zot konnen ki letid pour semenn le 30 Avril i “Ce qu’un livre peut vous apprendre sur le Créateur.” Eksplike akoz ki kongregasyon antye pe plàn pour asiste lasanble distrik ki’n ganny progranmen dan lavenir.
24 Aranz pour en vizit amikal kot zot lakour. Fer sir ki zot annan brosir Ekspekte ek liv Konnesans ki fer zot konn bann lansennyman elemanter lo Labib. Si zot pa pe etidye deza, ofer zot en letid Labib. Propoz zot pour lir brosir Les Témoins de Jéhovah ki prezant en portre kler lo fason ki nou fonksyonnen konman en lorganizasyon. Envit zot pour vwar nou bann video, tel konman Our Whole Association of Brothers. Aranze pour zot rankontre lezot dan kongregasyon. Dan bann mwan ki swiv, gard kontakt avek bann nouvo; envit zot pour asiste bann renyon ler sirveyan rezyonal i vizite oubyen ler i annan lasanble rezyonal ou zournen lasanble spesyal. Donn zot tou loportinite pour montre zot menm “byen dispoze pour lavi eternel”!—Akt 13:48.
25 Ki Bann Ansyen i Kapab Fer: Sikse sa gro zefor dan minister sa mwan Avril pou depan bokou lo bann ansyen. Si ou en kondikter letid liv, fer en lalis bann keksoz ki ou kapab fer pour ed tou dimoun dan ou group letid liv pour partisip dan bann aktivite spesyal. Eski i annan okenn dan ou group ki zenn, nouvo, iregilye, oubyen inaktif ? Verifye pour vwar si bann paran, pionye, oubyen lezot proklanmater in pran sa linisyativ pour ed zot. Ou menm ou kapab ofer nenport lasistans personnel. En ser ki ti iregilye dan predikasyon pour de an ti pas plis ki 50 er-d-tan dan predikasyon Avril lannen pase. Kwa ki ti fer sa diferans pour li? I ti dir ki se bann vizit pastoral ankourazan ki bann ansyen ti fer.
26 Bann ansyen ek asistan ministeryel i devret korpere pour fer sir ki i annan sifizaman teritwar, magazin, ek piblikasyon pour sa mwan ki pe vini. Eski bann randevou anplis i kapab ganny aranze? Si wi, fer konnen sa bann laranzman spesyal. Pli enportan, dan ou lapriyer piblik e personnel, demann benediksyon Zeova lo nou mwan pour plis aktivite Rwayonm.—Rom. 15:30, 31; 2 Tesa.3:1.
27 Avril lannen pase dan en kongregasyon an North Carolina, bann ansyen ti vreman ankouraz plis aktivite dan predikasyon. Dan bann renyon sak semenn, zot ti envit bann proklanmater pour reflesir dan lapriyer si zot ti a kapab fer pionye asistan. Bann ansyen ek asistan ministeryel ti sezi tou loportinite pour koz avek lantouzyasm konsernan fer Avril vin nou meyer mwan. E rezilta se ki 58 poursan proklanmater, enkli tou bann ansyen ek asistan ministeryel, ti fer pionye sa mwan!
28 En Partisipasyon Konplet i Anmenn Lazwa: Ki bann benediksyon “travay dir e fer zefor entans” dan predikasyon? (1 Tim. 4:10) Konsernan aktivite zele zot kongregasyon an Avril lannen pase, sa bann ansyen mansyonnen pli boner ti dir: “Bann frer ek ser i souvan koz lo plis lanmour ek lanmitye ki zot ti santi anver kanmarad depi ki zot ti konmans travay pli bokou dan predikasyon.”
29 En zenn frer ki pa ti tro kapab deplase ti anvi annan en par dan sa aktivite spesyal Avril lannen pase. Par fer bann bon plan e avek led son manman ek bann frer ek ser spirityel, i ti rezwir en mwan prodiktif konman en pionye asistan. Konman ki i ti santi anver sa leksperyans? I ti dir: “Pour premye fwa dan mon lavi, mon ti santi mwan parey en zonm robis.”
30 I napa okenn dout ki Zeova pa beni bokou sa bann ki vreman estim zot privilez pour koz konsernan son dominasyon. (Ps. 145:11, 12) Pandan ki nou komemor lanmor nou Senyer, nou konpran ki bann benediksyon pour latasman avek Bondye pou bokou plis dan lavenir. Lapot Pol ti annan en gran dezir pour rekonpans lavi eternel. Toudmenm, i ti konnen ki lavi eternel pa ti en keksoz pour li zis espere lebra krwaze. I ti dir: “Pour sa mon travay dir pour ranpli sa latas, e mon lite avek tou sa gran lafors ki azir dan mwan, sa lafors ki Kris in donn mwan.” (Kol. 1:29) Atraver Zezi, Zeova ti fer Pol vin for pour akonpli en minister ki sov lavi, e I kapab fer parey avek nou ozordi. Eski ou personnelman ou pou eksperyans sa, sa mwan Avril?
[Bwat lo paz 3]
Lekel ki Ou Kapab Ankouraze pour Prese an Avril?
Ou zanfan?
En letid Labib?
En dimoun ki’n vin inaktif ?