“Annou fer Dibyen tou Dimoun”
1 “Pres Parol Bondye plennman” e ‘Vin ris dan bann bon Aksyon’ ti bann tit ki ti ganny servi dan sipleman Nou Minister Rwayonm Fevriye ek Mars 2002. (Kol. 1:25; 1 Tim. 6:18) Dan sa de sipleman nou ti ganny ankouraze pour fer zefor ekstra pour ed bann ki enterese pour asiste Memoryal, pour ed bann proklanmater inaktif rekonmans travay ansanm avek kongregasyon, e pour ed nou zanfan ek bann ki etidye Labib ki kalifye pour konmans pres sa bon nouvel. San dout nou’n rezwir en serten sikse an rezilta nou bann bon zefor. Aprezan, “pandan ki nou annan lokazyon, annou [kontinyen] fer dibyen tou dimoun.”—Gal. 6:10.
2 Envit zot pour asiste ankor: Dan Sesel apepre 400 dimoun ki pa proklanmater sa bon nouvel i asiste Memoryal sak lannen. Vi ki zot prezans i endik en serten lentere, ki fodre nou fer pour kiltiv lentere sa bann ki “dan dispozisyon neseser pour lavi eternel” pour vin “krwayan”? (Akt 13:48, NW ) Ankouraz zot pour asiste lezot renyon kongregasyon osito posib.
3 Akoz ou pa envit en dimoun enterese pour asiste Letid Liv Kongregasyon pour apresye en diskisyon enteresan lo profesi Izai? Si ou en fanmiy oubyen ou konn sa dimoun e ou lo progranm pour donn en prezantasyon dan Lekol Minister Teokratik, ou kapab envit li pour vin ekout ou prezantasyon. Ou kapab enform li bann tit diskour piblik ki pou ganny prezante dan bann semenn ki pe vini. (En progranm azour i devret ganny mete lo bord.) Rod nenport loportinite pour stimil dan sa dimoun en dezir pour ador Zeova. E byensir, si i pa pe deza etidye Labib avek en dimoun dan kongregasyon, ou kapab zantiman ofer li en letid.
4 Kontinyen ankouraz bann ki inaktif: En bon pe parmi sa bann ki asiste Memoryal in deza fini dedye zot lavi avek Zeova. Sepandan, zot in aret pres sa bon nouvel en serten moman dan zot lavi. E pourtan, Pol ti ankouraz nou pour “fer dibyen . . . sirtou nou bann frer dan lafwa.” (Gal. 6:10) Alor, bann ki inaktif i devret vin nou konsern prensipal.
5 Petet serten in fini aksepte lankourazman ki bann ansyen ek lezot in donnen pour partisip ankor dan minister. Si ou ganny dezinyen par bann ansyen pour travay avek en proklanmater ki fek revin aktif, gard antet ki se ou prop lanmour pour Zeova e pour predikasyon ki pou batir konfyans dan sa dimoun. Montre li konman ou fer dan diferan laspe predikasyon afen ki i kapab trouv lazwa ladan, ki i pou persiste dan travay predikasyon, e ki i pou kapab eksperyans benediksyon Zeova.
6 Donn nouvo Proklanmater en bon Depar: Letan en madanm ki ti’n fek enterese avek laverite ti realize ki i ti’n dekouver vre lorganizasyon Bondye, i ti anvi konmans prese toudswit. Apre ki i ti’n konpran ki i ti bezwen fer, i ti dir: “Mon anvi konmanse toudswit.” Si en dimoun ki ou pe etidye Labib avek i ganny aksepte pour konmans partisip dan predikasyon, ed li vwar sa nesesite pour “konmans toudswit,” e ed sa nouvo proklanmater pour fer en bon depar. Ed li devlop en routin pour prepar e partisip regilyerman dan predikasyon sak semenn.
7 Si i ou prop zanfan ki’n vin en nouvo proklanmater non batize, travay avek li pour fer progre dapre son laz ek abilite. Si ou donn li en pti led, i kapab sirprann ou pour vwar konman i reisi fer konversasyon avek en dimoun, servi Labib, e ofer piblikasyon. Ler i ganny en dimoun ki enterese dan predikasyon, form li pour fer en retourn vizit e swiv sa lentere.
8 Elarzi ou prop Minister: Eski ou sitiasyon i permet ou pour ogmant ou partisipasyon dan travay predikasyon menm apre letan Memoryal? Eski ou kapab azout enn oubyen de er-d-tan avek sa ki ou abitye fer dan servis? Eski ou pe antisip lezot mwan kot ou pou kapab fer pionye asistan ankor? Oubyen eski ou kapab aranz ou fason viv pour antre dan servis aplentan? Tou sa zefor ki nou mete dan minister i kapab ed en lot dimoun pour aksepte laverite! (Akt 8:26-39) Pandan ki nou get lavenir, annou “esey touzour fer dibyen kanmarad, ensi ki tou lezot dimoun.”—1 Tesa. 5:15.
[Bwat lo paz 3]
Kontinyen asiste:
□✔ Bann ki asiste Memoryal
□✔ Bann ki’n vin aktif ankor
□✔ Bann nouvo proklanmater