‘Vin ris dan bann bon Aksyon’

¹ Pandan bann dernyen lannen son minister zele, zapot Pol ti travay avek Timote ek Tit. I ti ekrir apepre menm parol lankourazman pour zot tou le de. I ti dir avek Tit ki “bann ki krwar dan Bondye” i bezwen “devoue zot letan pour fer bann bonn aksyon.” (Tit 3:8) I ti dir avek Timote ki bann ki met zot lespwar dan Bondye i devret ‘ris dan bann bon aksyon.’ (1 Tim. 6:17, 18) Sa i en bon konsey pour nou tou! Me kwa ki pou motiv nou pour fer bann bon aksyon dan nou lavi? E ki travay spesifik ki nou kapab fer dan bann zour ki pe vini?

² Se nou krwayans dan Zeova, lanmour pour li, e osi sa lespwar merveye ki i’n donn nou ki motiv nou pour vin ris dan bann bon aksyon. (1 Tim. 6:19; Tit 2:11) Nou ganny rapele espesyalman pandan sa letan dan lannen ki Zeova in anvoy son Garson lo later afen ki Zezi i kapab zistifye son Papa e ouver semen pour lavi eternel pour tou imen ki merite. (Mat. 20:28; Zan 3:16) Sa pou ganny montre klerman pandan komemorasyon Memoryal lanmor Kris le 28 Mars. Pour demontre ki nou vreman apresye sa lespwar ki nou annan pour ganny lavi eternel, eski pa nou motive pour fer tou sa ki nou kapab pour nou ‘ris dan bann bon aksyon’? Byensir! Ki aksyon ki nou kapab fer konmela?

³ Bann bon Aksyon pour fer an Mars ek bann Mwan ki swiv: Nou pou sertennman asiste Memoryal—levennman pli enportan dan lannen pour bann Temwen Zeova partou dan lemonn antye. (Lik 22:19) Me pour sa lokazyon nou oule partaz sa lazwa avek otan dimoun ki posib. Get rapor servis dan Latour Veyer le 1 Zanvye, 2002, e ou pou vwar ki lannen pase dan en kantite pei partou lo later, lasistans pour Memoryal ti trwa, kat, senk fwa, oubyen plis lakantite proklanmater. Sirman ti demann en kantite zefor delapar tou dimoun dan kongregasyon pour distribye en kantite lenvitasyon partou dan teritwar. Alor, nou oule depans otan letan ki nou kapab depi la konmela ziska le 28 Mars pour envit dimoun Memoryal, pour ed zot aprann konsernan sa lespwar pour delivrans.

⁴ Letan Avril i arive, nou kapab konmans rezwir pli bon kondisyon letan. Konman ki nou kapab servi sa bann sirkonstans favorab pour vin ‘ris dan bann bon aksyon’? Par kontinyen annan en partisipasyon zele dan travay pres sa bon nouvel, e par vin “zele pour fer dibyen.” (Tit 2:14; Mat. 24:14) Si ou pa ti kapab fer pionye asistan an Mars, eski ou kapab fer li an Avril oubyen Me? Si ou pe fer pionye an Mars, eski ou ti a kapab kontinyen?

⁵ Serten ki annan en travay profann i santi ki zot kapab pas enn er-d-tan oubyen plis dan servis kan zot pe al travay, donn temwannyaz dan semen, oubyen koz avek bann dimoun ki travay dan bann landrwa biznes ki ouver granmaten. Lezot i progranm enpe letan pandan zot ler dezennen pour rann temwannyaz. Serten in trouve ki i posib kondwir en letid Labib pandan letan dezennen avek en koleg travay. En kantite ser ki reste kot lakour in kapab met dekote serten letan pour prese pandan ki zot zanfan in al lekol. Par lev pli boner serten zour pour fer zot bann travay lakour, zot in ganny plis letan pandan lazournen pour prese e ansennyen.—Efe. 5:15, 16.

⁶ Menm si ou pa dan en pozisyon pour fer pionye asistan, petet ou kapab aranz en progranm personnel pour annan en pli gran partisipasyon dan minister, fer tou sa ki ou kapab ‘pour fer sa ki byen, e ki ou larises i konsist an bonn aksyon, montre ou zenere e touzour pare pour partaz’ laverite avek lezot.—1 Tim. 6:18.

⁷ Mazin sa bon Travay pour fer Disip: Sak lannen i annan bann ki enterese ki asiste Memoryal. Eski i posib pour serten frer ek ser dan kongregasyon donn latansyon sa bann dimoun ki asiste me ki pa pe etidye? Eski zot kapab vizit sa bann dimoun avek lentansyon pour ed zot progrese spirityelman? I kapab ki serten sa bann dimoun ki’n asiste Memoryal i fanmiy avek bann Temwen. Serten i kapab bann endividi ki’n etidye dan lepase e ki zis bezwen ganny enpe lankourazman pour rekonmans etidye e asiste renyon lo en baz regilye. Pa i pou en gran lazwa pour nou vwar zot vin bann serviter aktif Zeova ansanm avek nou!

⁸ Avek plis partisipasyon dan minister an Mars ek bann mwan ki pou swiv, i tre probab ki nou pou trouv plis dimoun ki enterese ki nou kapab retournen pour vizit zot. Esey kit en kestyon avek zot. Apre sa, promet zot ki ou pou rann zot larepons prosenn fwa ki ou vizit zot. Kan nou fer sa, nou pou ouver semen pour en retourn vizit. Pli vit posib ki nou fer retourn vizit, i pou pli bon. Si nou pa’n kapab konmans en letid pandan premye vizit, i ti a byen konmans enn si i posib pandan lot vizit.

⁹ Kan nou pe donn temwannyaz lo semen, nou devret mazin pour konmans en konversasyon avek sa bann dimoun. En kantite proklanmater in ganny non, ladres, nimero telefonn avek bann dimoun ki enterese ki zot in rankontre letan zot ti pe rann temwannyaz lo semen. Si bann endividi ki ou’n zwenn lo semen pa reste dan ou teritwar pran sa form House-to-House record (S-8) dan Lasal Rwayonm, ranpli li, e donn avek sekreter kongregasyon, ki pou anvoy li kot sa kongregasyon dan teritwar kot sa dimoun i reste. Si sekreter pa kapab fer sa, i pou anvoy sa form kot biro brans pour tret sa ka. Dan sa fason, lentere sa dimoun i kapab ganny kiltive.

¹⁰ Si sa dimoun i donn ou son nimero telefonn me pa son ladres, alor fer en retourn vizit par telefonn sa dimoun. Prepare davans sa ki ou oule diskite. Met ou liv Comment raisonner pare pour ou kapab konsilte li vitman. Serten proklanmater pe ganny bon rezilta an etidyan avek bann endividi par telefonn, enkli bann ki zot in ganny difikilte pour rankontre zot kot lakour. En ser ti konmans demann nimero telefonn avek bann madanm ki enterese ki i ti rankontre dan temwannyaz port-an-port, e rezilta se ki i ti kapab konmans de letid Labib.

¹¹ Korpere avek bann Ansyen pour ed bann ki Inaktif: Bann ansyen i vreman enterese pour donn latansyon bann ki inaktif. En serten kantite ki ti inaktif in deza rekonmans asiste bann renyon kongregasyon lo zot menm. Zot in realiz sa bezwen pour annan en lasosyasyon pros avek lorganizasyon Zeova pour ganny sa sekirite spirityel ki ganny dekrir dan Psonm 91. Serten parmi zot i aprezan pare pour partisip dan predikasyon ankor. Si lezot ki inaktif i asiste Memoryal sa mwan, zot kapab akeyir sa lide pour annan en letid Labib personnel. Si sa i leka, bann ansyen pou fer bann laranzman pour en dimoun etidye avek bann ki anvi ganny ede. Si ou ganny envite pour asiste dan sa fason, ou korporasyon pou ganny byen apresye.—Rom. 15:1, 2.

¹² Kontinyen “fer bann bonn Aksyon”: En kantite proklanmater ki’n partisip dan servis pionye asistan pour en mwan oubyen plis in trouve ki zot aktivite predikasyon in ogmante pandan bann mwan ki’n swiv. Zot in rankontre bann dimoun ki enterese ki zot in santi sa bezwen pour revizit zot. Sa in motiv zot pour fer zefor ekstra pour al predikasyon pli souvan afen pour kontakte bann ki enterese ankor. Serten in konmans letid, e sa in ed zot pour annan en pli gran partisipasyon dan minister.

¹³ I annan lezot ankor ki’n trouv bokou lazwa par fer plis dan predikasyon e travay fer disip, alor zot in ganny motive pour analiz zot priyorite. E rezilta se ki serten in kapab redwir enpe lo travay profann e fer pionye asistan kontinyelman. Lezot in kapab antreprann servis pionye ordiner. Zot in kapab met zot lespwar pli plennman dan Bondye e pa dan bann keksoz ki sa monn i ofer. Zot in trouve ki vin ‘zenere, pare pour partaze,’ in anmenn benediksyon ris sorti kot Zeova e ranforsi zot lespwar pour ganny “vre lavi.” (1 Tim. 6:18, 19) Byensir, kan i annan plis proklanmater ki antreprann servis pionye, kongregasyon antye i benefisye. Bann pionye i annan tandans pour koz lo zot leksperyans e envit lezot pour partisip dan minister avek zot, e sa i prodwir en pli gran latmosfer spirityel dan kongregasyon.

¹⁴ Fotespere ki nou tou nou ‘ris dan bann bon aksyon’ pandan sa peryod Memoryal ek bann mwan ki swiv par ogmant nou partisipasyon dan minister Kretyen. Annou demontre nou lapresyasyon pour sa ki Zeova in fer letan i’n donn nou sa lespwar pour viv pour touzour dan en nouvo monn drwat.—2 Pyer 3:13.