Sirmont sa defi pour rann temwannyaz avek bann zonm
1. Ki bezwen irzan i annan pour pran swen avek lentere Rwayonm?
1 Anmezir ki sa travay pour propaz sa bon nouvel i kontinyen ogmante dan sa bann dernyen zour, i annan en bezwen irzan pour bann frer ki annan bann kalifikasyon dapre Labib pour pran responsabilite dan kongregasyon. (Mark 4:30-32; Akt 20:28; 1 Tim. 3:1-13) Parkont, dan serten landrwa i annan pli pti gin zonm ki madanm ki aksepte mesaz Rwayonm. Dan serten kiltir, kot i konsern larelizyon ek spirityalite zot zanfan, bann zonm i les tou dan lanmen zot madanm. Ki mannyer nou kapab ankouraz plis zonm pour konsyan zot bezwen spirityel e pour zwenn nou dan vre ladorasyon?
2. Ki mannyer zefor Pol ek Pyer pour pres avek bann zonm ti anmenn bann bon rezilta?
2 Rann temwannyaz avek bann zonm: Kan en sef fanmir i aksepte laverite, souvan i enfliyans lezot manm fanmir pour zwenn ansanm avek li dan vre ladorasyon. Par egzanp, pandan ki Pol ek Silas ti dan prizon akoz sa travay predikasyon, zot ti rann temwannyaz avek en gardyen prizon. Sa zonm ek son fanmir antye ti batize. (Akt 16:25-34) Apre ki Pol ti’n prese dan lavil Korent, “Krispis, sef sinagog, avek son fanmir antye ti krwar dan Senyer.” (Akt 18:8) Zeova ti servi Pyer pour rann temwannyaz avek Korney, en zofisye larme ki ti renonmen konman en ‘zonm byen relizye e . . . ki ti ador Bondye.’ Korney ansanm avek son fanmir ek bann zanmi pros ti batize.—Akt 10:1-48.
3. Par imit legzanp Filip, lekel “ki okip bann plas enportan” ki ou kapab rann temwannyaz avek?
3 Rann temwannyaz avek bann zonm “ki okip bann plas enportan” i kapab annan en pli gran lefe. (1 Tim. 2:1, 2) Par egzanp, lanz Zeova ti konsey Filip pour koz avek “en zofisye enportan” ki ti ansarz trezor larenn Etyopyen. Filip ti tann li “pe lir dan liv Profet Ezai” e i ti eksplik li sa bon nouvel konsernan Zezi. Sa Etyopyen ti vin en disip e i tre probab ki lo son larout pour retourn dan son pei i ti propaz sa bon nouvel. I kapab ki i ti osi rann temwannyaz avek larenn ek lezot dan son pale. Si i pa ti rann temwannyaz avek sa bann dimoun laba zot pa ti pou’n ganny bokou sans pour tann sa bon nouvel.—Akt 8:26-39.
4. Ki mannyer nou kapab kree plis loportinite pour bann zonm tann sa bon nouvel?
4 Ki mannyer pour rann temwannyaz avek plis zonm: Vi ki bann zonm i souvan dan travay pandan lazournen, eski ou kapab aranz ou progranm pour pas plis letan dan predikasyon apre bann ler travay, dan wikenn oubyen zour konze piblik? Si ou pres regilyerman dan teritwar biznes, sa pou donn ou plis loportinite pour rann temwannyaz avek bann zonm ki souvan pa kot lakour. Bann frer i osi kapab fer en zefor spesyal pour rann temwannyaz enformel avek bann zonm ki travay avek zot. Dan predikasyon portanport, espesyalman dan teritwar ki ganny fer ase souvan, petet bann frer i kapab detanzaot demande pour koz avek sef fanmir.
5. Ki en ser i devret fer si i zwenn en zonm ki demontre lentere dan sa mesaz Rwayonm?
5 Si en ser i zwenn en zonm ki enterese avek laverite, i pa devret al fer sa retourn vizit li tousel. I kapab anmenn son msye avek li oubyen en lot proklanmater. Anmezir ki sa dimoun ki’n demontre lentere i fer progre, normalman i pli bon pour refer li avek en frer kalifye.
6. Ki mannyer nou kapab imit zapot Pol pour nou “ganny pli gran kantite dimoun posib”?
6 Swazir bann topik ki enteres bann zonm: Zapot Pol ti pran an konsiderasyon son lodyans e adapte son lapros pour ki i ti pou kapab “ganny pli gran kantite dimoun posib.” (1 Kor. 9:19-23) Pareyman, nou devret reflesir lo bann topik ki tre probab pou enteres bann zonm ki nou kapab zwenn e apre prepare pour nou koz avek zot lo la. Par egzanp, souvan bann zonm i konsernen avek bann topik ki annan pour fer avek problenm ekonomik, en bon gouvernman e zot konsernen avek byennet ek sekirite zot fanmir. I kapab ki zot osi enterese pour konnen ki bi lavi, ki pou arive avek later dan lavenir e akoz Bondye i les nou soufer. Nou prezantasyon lo mesaz Rwayonm pou pli byen ganny resevwar si nou demontre bon zizman dan nou lapros.—Prov. 16:23.
7. Ki mannyer tou dimoun dan kongregasyon i kapab annan en lefe pozitif lo bann mari ki pa Temwen ki asiste en renyon?
7 Pran linisyativ pour ed bann mari ki pa Temwen: Menm si se kondwit nou bann ser Kretyen ki souvan annan en pli gran lenfliyans lo zot mari ki pa Temwen, bann frer ek ser dan kongregasyon i osi kapab annan en lefe pozitif lo zot. (1 Pyer 3:1-4) Kan en mari ki pa Temwen i asiste en renyon avek son madanm, sa bon lakey ki i resevwar avek bann frer ek ser dan kongregasyon pou en gran temwannyaz. Lefet ki i’n vin asiste sa renyon sa i montre ki i annan en serten degre lentere dan laverite e petet i pou aksepte en letid Labib.
8. Ki mannyer bann frer i kapab ed bann mari ki pa Temwen ki’n demontre en pti gin lentere dan laverite?
8 De lot kote, serten mari i montre en pti gin lentere dan Labib o konmansman me i kapab ki avek letan zot pou anvi koz lo Labib avek en frer ki zot santi zot alez avek. Bann frer dan en kongregasyon ti fer en zefor spesyal pour vizit en fanmir detanzaot pour koz avek sa mari ki pa Temwen lo bann keksoz ki zot konnen ti enterese li. Sa ti fer ki finalman konversasyon ti baze lo bann keksoz spirityel e aprezan in batize. Dan en lot ka, en frer ti ed en mari ki pa ti Temwen me ki ti zantiy pour konstrir en baraz otour son lakaz. Lefet ki sa frer ti demontre en lentere personnel dan sa fason, sa msye ti aksepte en letid Labib. (Gal. 6:10; Fili. 2:4) Si ou en frer, akoz ou pa esey ed enn oubyen detrwa parmi sa bann mari ki pa Temwen?
9. Kan bann zonm i ganny formen ki rezilta sa i kapab anmennen?
9 Form bann zonm pour pran responsabilite dan lavenir: Bann zonm ki byen reazir anver mesaz Rwayonm e ki aksepte bann responsabilite dan servis Zeova i kapab vin parmi sa bann “kado zonm,” setadir bann ansyen ki servi zot abilite ek lafors pour ed pep Zeova dan bann kongregasyon. (Efe. 4:8; Ps. 68:18) Sa bann zonm, parey bann berze, zot vey lo kongregasyon volonterman e avek devouman. (1 Pyer 5:2, 3) Pa zot en benediksyon pour sa lasosyasyon frer dan lemonn antye!
10. Ki mannyer zefor Ananyas pour ed Pol in anmenn byenfe pour bokou dimoun?
10 Par egzanp Sol ti vin en “zapot pour bann pep non-Zwif,” menm si avan sa i ti persekit bann Kretyen. (Rom. 11:13) O konmansman disip Ananyas ti ezite pour pres avek Sol akoz sa. Kantmenm sa, Ananyas ti swiv gidans ki Senyer ti donn li e koz avek sa zonm ki apre ti vin zapot Pol. Pandan plizyer lannen ki’n pase, minister zapot Pol ti anmenn byenfe pour plizyer milye dimoun ki ti tann li prese e plizyer milyon dimoun i ankor pe benefisye avek son bann let enspire ki’n ganny rikorde dan Parol Bondye.—Akt 9:3-19; 2 Tim. 3:16, 17.
11. Akoz ki nou devret fer nenport azisteman ki neseser pour rann temwannyaz avek bann zonm?
11 Alor fotespere ki nou fer nenport azisteman ki neseser pour sirmont sa defi pour rann temwannyaz avek bann zonm. Anmezir nou pourswiv sa lobzektif, nou asire ki Zeova pou beni sa gran zefor ki nou fer pour fer son lavolonte e okip byen sa travay pour lentere Rwayonm.