Eski ou kapab fer zefor pour ed konzwen en proklanmater ki pa Temwen?
1. Akoz Zeova ek kongregasyon i enterese pour ed konzwen en proklanmater ki pa Temwen pour aksepte laverite?
1 Eski i annan proklanmater dan ou kongregasyon ki zot msye oubyen madanm pa Temwen? Si wi, san dout zot ti pou byen kontan si zot konzwen ti zwenn ansanm avek zot dan sa vre ladorasyon. Me pa zis zot ki santi koumsa. Kongregasyon antye i annan sa menm dezir parey Zeova ki oule ki “tou dimoun i ganny sove e ganny konnesans laverite.” (1 Tim. 2:4) Ki mannyer nou kapab fer zefor pour ed konzwen bann proklanmater ki pa Temwen?
2. Akoz i neseser pour konpran lafason ki konzwen en proklanmater i vwar keksoz?
2 Premyerman, nou merit esey vwar keksoz lafason ki konzwen sa proklanmater i vwar. Bokou i kontan zot fanmir, zot esey vin bann bon konzwen ek paran, me petet zot annan en krwayans relizye ki diferan avek sa ki pour nou ki zot senserman krwar ladan. I kapab sa ptigin ki zot konnen lo Temwen Zeova i zis sa ki zot in tande atraver bann dimoun ki zot frekante ki pa kontan oubyen ki pa konn bokou lo Temwen Zeova. Serten pa kontan ki zot konzwen i pran sa letan ki zot ti abitye pas ansanm an fanmir pour fer bann aktivite spirityel. Kan nou konpran lafason ki konzwen en proklanmater ki pa Temwen i vwar keksoz sa pou ed nou pour tret li avek respe, dan en fason zantiy, e santi nou pli alez kan nou dan son prezans.—Prov. 16:20-23.
3. Ki pli bon fason ki nou kapab ed konzwen en proklanmater aksepte laverite?
3 Lentere personnel: Pli bon fason pour konmans ed konzwen en proklanmater aksepte laverite se atraver nou aksyon me pa atraver en diskisyon lo Labib. (1 Pyer 3:1, 2) Alor, i enportan pour nou demontre en lentere personnel dan li. Bann ser dan kongregasyon i kapab demontre lentere dan madanm en frer e bann frer i kapab fer parey avek msye en ser ki pa Temwen. Dan ki fason?
4. Ki mannyer nou kapab demontre lentere personnel dan konzwen sa proklanmater?
4 Petet si ou pa ankor zwenn konzwen sa proklanmater, ou kapab fer li apre ki ou’n abord sa size avek sa proklanmater. Pa bezwen dezapwente si o konmansman son konzwen pa reakte dan en fason pozitif kan nou demontre en lentere personnel dan li. Pli i remarke ki ou enterese avek li e anvi vin son zanmi, sa pou kapab pous li pour vwar Temwen Zeova dan en pli bon fason. (Rom. 12:20) Serten Kretyen matir in envit konzwen en proklanmater ek son fanmir pour en repa kot zot avek lentansyon pour konn li pli byen e ed li pour sanz okenn move pwennvi ki petet i annan lo Temwen Zeova. Zot in koz lo bann keksoz ki enteres li dan plas koz lo bann keksoz spirityel. Plitar, kan konzwen sa proklanmater i santi li en pe pli alez, nou kapab koz lo bann keksoz spirityel. Oubyen i pou pli pare pour aksepte en lenvitasyon pour asiste enn nou bann renyon pour vwar sa ki son madanm oubyen msye pe aprann, vi ki i deza konn serten frer ek ser dan kongregasyon. Menm si a sa moman i pa enterese pour konn plis lo laverite, nou kapab kantmenm sa felisit li pour sipor ki i donn son konzwen.
5. Ki mannyer bann ansyen i kapab ed konzwen en proklanmater ki pa Temwen?
5 Se sirtou bann ansyen ki devret ed konzwen sa bann proklanmater e vey bann loportinite pour rann zot temwannyaz. En dimoun ki pa’n zanmen enterese pour koz lo Labib i kapab ekout bann lankourazman ki sorti dan Labib kan i lopital oubyen kan i fer fas avek en problenm lasante vreman grav. Si en lakour kot i annan diferan pwennvi relizye i rankontre en maler parey lanmor en manm fanmir, bann ansyen i kapab pran linisyativ pour rekonfort sa fanmir dan prezans sa msye oubyen madanm ki pa Temwen.
6. Ki rezon nou annan pour ed konzwen en proklanmater ki pa Temwen?
6 Zis mazin sa lazwa ki en Kretyen dan nou kongregasyon pou gannyen si son msye oubyen madanm i reazir dan en fason pozitif e vin en Temwen Zeova! Sa pou osi fer Zeova, bann lanz, ek lezot dan kongregasyon vreman kontan. (Lik 15:7, 10) Par kont, si konzwen sa proklanmater pa reazir dan en fason pozitif o konmansman, kantmenm sa nou pou annan lazwa akoz Zeova i apresye sa zefor ki nou pe kontinyen fer akoz i “pa oule ki personn i ganny detri, me ki tou dimoun i arive repanti.”—2 Pyer 3:9.
[Pwen adisyonnel]
Pli bon fason pour konmans ed konzwen en proklanmater aksepte laverite se atraver nou aksyon me pa atraver en diskisyon lo Labib