Ki mannyer ou pou reponn?
1. Akoz nou devret imit legzanp Zezi kan nou ganny demande en kestyon?
1 Menm dan nou lepok dimoun i enpresyonnen par lafason ki Zezi ti reponn bann dimoun kan zot ti demann li kestyon. Kan dimoun i demann nou diferan kalite kestyon dan nou minister, i pou byen si nou imit legzanp Zezi dan sa domenn.—1 Pyer 2:21.
2. Kwa ki kapab ed nou pour pli byen reponn en kestyon?
2 Ekoute avan: Zezi ti pran an konsiderasyon kwa ki ti pe fer sa dimoun demann sa kestyon. Parfwa pour ou konnen ki sa dimoun pe vreman mazin lo la, i neseser pour demann li lezot kestyon. En dimoun ki demann ou, “Eski ou krwar dan Zezi?” petet i pe mazinen akoz ou pa selebre Nwel. Si ou arive determinen kwa ki sa dimoun pe vreman reflesir lo la, ou kapab pli byen rezonn avek li.—Lik 10:25-37.
3. Kwa ki disponib ki kapab ed nou trouv bann larepons satisfezan dan Labib?
3 Servi Parol Bondye pour reponn: Normalman, i pli bon servi Labib pour reponn en kestyon. (2 Tim. 3:16, 17; Ebr. 4:12) Liv Reasoning ek “Bible Topics for Discussion” dan New World Translation of the Holy Scriptures in ganny vwar konman bann zouti itil ki ede pour donn sa pli bon larepons. Menm si sa dimoun ki pe demann kestyon pa krwar dan Labib, petet avek bon zizman ou kapab partaz sa ki Labib i dir. Ankouraz sa dimoun pour egzamin avek bokou latansyon sa lasazes ki diny konfyans ki trouve dan Labib. Si ou imit Zezi, ou larepons pou “parey ponm lor dan bann skilptir an larzan,” andotmo i pou zoli, annan dinyite ek en gran valer.—Prov. 25:11.
4. Ki pli bon moman nou pa devret esey reponn tou kestyon?
4 Eski nou devret reponn tou kestyon? Si ou pa konn larepons en kestyon, pa santi ou anbarase pour dir: “Mon pa konn larepons, me mon kapab fer resers lo la e mon ava retournen pour reponn ou kestyon.” Kan nou modes e demontre lentere personnel dan sa fason, sa i kapab pous sa met lakour pour aksepte ki ou retournen en lot fwa. Si ou remarke ki en kestyon i sorti kot en opozan e i kapab ki i pe esey konmans en largiman, imit Zezi par donn en senp larepons. (Lik 20:1-8) Pareyman, si en dimoun ki pa vreman enterese avek laverite i esey antre dan en deba avek ou, termin sa konversasyon byen poliman e servi ou letan pour rod bann ki senser.—Mat. 7:6.
5. Ki legzanp Zezi in kite an sa ki konsern reponn bann kestyon?
5 Zezi ti konnen ki i ti neseser ki i depan lo Zeova pour li akonplir son latas pour ‘servi konman temwen pour laverite’ e pour reponn kestyon bann dimoun ki senser. (Zan 18:37) Pa nou annan en privilez pour imit Zezi par donn en larepons bann ki “annan sa bon kondisyon leker pour ganny lavi eternel”!—Akt 13:48, NW.