Konnen konman ou devret reponn

SERTEN kestyon i parey bann gro bout ays ki pe flote lo lanmer. Morso pli enportan i kasyet anba delo. Rezon par deryer en kestyon i souvan pli enportan ki sa kestyon li menm.

Menm si en dimoun in demann en kestyon e i enpasyan pour en larepons, konnen ki fason ki ou devret reponn i kapab enplik servi disernman pour konnen ki kantite ou pour dir e ki lapros ou pou pran anver sa topik. (Zan 16:12) Dan serten ka, parey Zezi ti endik son bann zapot, en dimoun i kapab demann lenformasyon ki i napa drwa konnen oubyen ki pa pou vreman anmenn benefis pour li.—Akt 1:6, 7.

Labib i konsey nou: “Ki zot parol i touzour agreab e enteresan, pour zot kapab donn bann repons valab tou dimoun.” (Kol. 4:6) Alor, avan ki nou reponn, nou bezwen pa zis konsider sa ki nou pe al dir me konman nou pou dir li.

Detekte Pwenn-vi sa Dimoun ki pe kestyonnen

Bann Sadiseen ti esey met Zezi dan en pyez avek en kestyon konsernan rezireksyon en madanm ki ti’n marye plizyer fwa. Sepandan, Zezi ti konnen ki an realite zot pa ti krwar dan rezireksyon. Alor dan son larepons, i ti reponn zot kestyon dan en fason ki ti met latansyon lo sa fo pwenn-vi ki ti rezon par deryer sa kestyon. Par servi bann rezonnman ekselan ek en resi Biblik byen koni, Zezi ti fer resorti serten keksoz ki zot pa ti’n zanmen konsidere avan—levidans kler ki Bondye pe vreman al resisit bann mor. Son larepons ti telman etonn sa bann ki ti opoz li ki zot ti per pour kestyonn li plis ki sa.—Lik 20:27-40.

Pour konnen ki larepons ou devret donnen, parey Zezi ou bezwen osi detekte pwenn-vi ek keksoz ki konsern sa bann dimoun ki pe kestyonn ou. Par egzanp, en kanmarad lekol oubyen en koleg travay i kapab demann ou akoz ou pa selebre Nwel. Akoz i demann sa? Eski i vreman enterese avek rezon akoz, oubyen i pe senpleman mazinen si ou kapab anmize? Pour ou konnen, petet ou bezwen demande kwa ki lakoz sa kestyon. Apre reponn dan en fason apropriye. Ou kapab osi servi sa loportinite pour montre konman ki swiv lenstriksyon Labib i protez nou kont bann laspe lafet ki’n vin en lannwi ek en fardo pour dimoun.

Sipoze ou’n ganny envite pour koz lo bann Temwen Zeova avek en group etidyan lekol. Apre ou prezantasyon, zot kapab demann bann kestyon. Si sa bann kestyon i paret senser e i pa en latrap, bann larepons ki senp e direk i kapab pli meyer. Si sa bann kestyon i reflekte bann prezidis kominote, petet i pou pli bon si ou entrodwir ou larepons avek detrwa komanter bref konsernan kwa ki kapab fasonn pwenn-vi popiler lo sa bann keksoz e akoz bann Temwen Zeova i swazir pour les Labib etablir standar pour zot. Souvan i pli bon pour konsider sa bann kestyon non pa konman en latak—menm si zot in kapab ganny prezante dan en tel fason, me plito konman en mwayen pour sa bann dimoun konn plis lo sa topik. Alor, ou larepons, i donn ou loportinite pour elarzi pwenn-vi ou lodyans, donn zot lenformasyon egzakt, e eksplik rezon Biblik pour nou bann krwayans.

Konman ou pou reazir avek en anplwayer ki pa anvi donn ou konze pour asiste en lasanble? Premyerman, konsider keksoz dapre son pwenn-vi. Eski i kapab ede si ou ofer pour fer overtaym en lot ler? Si ou eksplik li ki lenstriksyon ki ganny donnen dan nou lasanble i ed nou pour vin bann travayer onnet, diny konfyans, eski sa i kapab fer en diferans? Si ou montre ki ou pe pran an konsiderasyon son bann lentere, petet i pou osi donn konsiderasyon favorab lo sa ki i realize i enportan dan ou lavi. Me si i anvi ou fer en keksoz dezonnet? Si ou klerman dir li ki ou refize e osi fer resorti en panse Biblik, alor sa pou montre ou pozisyon. Me eski pa i pou annan en pli bon lefe si premyerman ou rezonn avek li ki en dimoun ki pare pour koz manti oubyen vole pour li i kapab osi koz manti avek li oubyen vol li?

Lo lot kote, petet ou en etidyan ki pa anvi partisip dan serten aktivite lekol ki Labib pa aprouve. Mazinen, ki i tre probab ki sa ansennyan pa partaz ou pwenn-vi, e i son responsabilite pour mentenir disiplin dan laklas. Bann defi ki konfront ou se (1) pour montre konsiderasyon anver sa ki enteres li, (2) pour eksplik ou pozisyon avek respe, e (3) pour ferm dan sa ki ou konnen pou fer plezir Zeova. Pour en pli bon rezilta, petet ou bezwen dir plis ki zis en deklarasyon direk e senp lo sa ki ou krwar. (Prov. 15:28) Si ou en zenn, san okenn dout ou papa oubyen manman pou ed ou prepar en keksoz pour dir.

Parler, petet ou bezwen prouve ki bann lakizasyon ki en dimoun dan lotorite in anmenn kont ou i fo. En zofisye lapolis, en zofisye gouvernman, oubyen en ziz i kapab demann ou pour reponn bann kestyon konsernan lobeisans anver en serten lalwa, ou pozisyon Kretyen pour pa pran okenn kote, oubyen ou latitid anver partisipasyon dan bann seremoni patriyotik. Konman ou devret reponn? Labib i konsey nou pour fer sa “avek labonte ek respe.” (1 Pyer 3:15) Osi, demann ou lekor akoz ki zot enterese avek sa bann topik, e avek respe rekonnet sa konsern. Apre ki ou pou fer? Zapot Pol ti refer avek proteksyon lalwa Romen, alors ou kapab fer resorti proteksyon legal ki aplik dan ou ka. (Akt 22:25-29) Petet bann fe lo pozisyon ki bann premye Kretyen ek bann Temwen Zeova dan lemonn antye in pran pou elarzi pwenn-vi sa zofisye. Oubyen ou kapab fer resorti konman ki rekonnet lotorite Bondye i an realite ankouraz dimoun pour toultan obeir bann lalwa zonm ki apropriye. (Rom. 13:1-14) Avek bann lenformasyon siplemanter, rezon Biblik pour ou pozisyon i kapab ganny byen resevwar.

Pran kont Pwenn-vi sa Dimoun lo Labib

Ler ou pe deside konman pour reponn, petet ou bezwen konsider pwenn-vi sa dimoun lo Labib. Zezi ti fer sa ler i ti pe reponn kestyon bann Sadiseen lo rezireksyon. I ti konnen ki zot aksepte selman lekritir Moiz, Zezi ti rezonn lo en resi trouve dan sa senk premye liv Labib, par entrodwir son remark an dizan: “Lo size ki bann mor pou resisite, menm Moiz ti montre.” (Lik 20:37) Ou osi ou kapab trouv li en lavantaz pour sit serten porsyon Labib ki sa dimoun i aksepte e familye avek.

Me ki pou arive si sa dimoun ki ou pe koz avek i pa konsider Labib konman en sours lotorite? Remark sa ki zapot Pol ti fer dan son diskour an Lareopaz, ki ganny rikorde dan Akt 17:22-31. I ti partaz laverite Biblik san direkteman sit Labib. Kot i neseser, ou kapab fer parey. Dan serten ka petet ou bezwen fer plizyer diskisyon avek en dimoun avan fer referans direk lo Labib. Ler ou entrodwir Labib, i kapab itil pour ou konmans par senpleman ofer serten rezon akoz i merit ganny konsidere, plito ki deklar dan en fason ferm ki sa i Parol Bondye. Sepandan, ou bi, i devret pour rann en temwannyaz kler lo plan Bondye e, avek letan, les sa dimoun vwar pour li menm sa ki Labib i dir. Labib i annan plis pouvwar pour persyade ki okenn keksoz ki nou personnelman kapab dir.—Ebr. 4:12.

“Touzour agreab”

Lefe ki Zeova li menm i azir avek dimoun dan en bon fason, alor i apropriye ki son bann serviter i ganny demande pour les zot parol “touzour agreab e enteresan”! (Kol. 4:6; Egz. 34:6) Sa i vedir ki nou devret koz avek bonte, menm ler i kapab pa merite. Nou parol i devret konvenab, pa brit oubyen san konsiderasyon.

Laplipar dimoun i anba bokou presyon, e toulezour zot sibir bann lensilt. Ler nou vizit tel dimoun, zot kapab koz dan en fason enpe brit. Konman nou devret reazir? Labib i dir: “En larepons, letan i dou, i detourn lakoler.” En tel larepons i kapab osi adousi en dimoun ki annan en pwenn-vi opoze. (Prov. 15:1; 25:15) Pour dimoun ki toulezour eksperyans britalite, en lapros ek en lavwa ki eksprim labonte i kapab sitan atiran ki zot kapab ekout sa bon nouvel ki nou anmennen.

Nou pa enterese pour argimant avek sa bann ki pa montre okenn respe pour laverite. Olye, nou dezir se pour rezonn apartir Labib avek dimoun ki pou permet nou fer sa. Nenport ki sitiasyon ki nou rankontre, nou gard antet ki nou devret reponn avek labonte ek konviksyon ki bann promes presye Bondye i serten.—1 Tesa. 1:5.

Desizyon personnel e dapre Konsyans

Ler en etidyan Labib oubyen en konpanyon Kretyen i demande ki i devret fer dan en sitiasyon spesifik, konman ki ou devret reponn? Petet ou konnen ki ou pou fer personnelman. Me sak dimoun i devret aksepte responsabilite pour son prop desizyon dan lavi. (Gal. 6:5) Zapot Pol ti eksplike ki i ti ankouraz “lobeisans par lafwa” parmi bann dimoun ki i ti pres avek. (Rom. 16:26) Sa i en bon legzanp pour nou swiv. En dimoun ki fer bann desizyon zis pour fer plezir sa dimoun ki etidye Labib avek li oubyen lezot imen, pe an realite servi zonm, i pa pe viv par lafwa. (Gal. 1:10) Alor petet i pa pou dan lentere sa dimoun ki pe kestyonnen si ou donn li en larepons senp e direk.

Alor, konman ki ou kapab reponn dan en fason ki an armoni avek bann gidans Labib? Ou kapab atir latansyon lo bann prensip ek legzanp Biblik ki apropriye. Dan serten ka, ou kapab montre li konman pour fer resers afen ki i trouv pour li menm bann prensip ek legzanp. Ou osi kapab diskit sa bann prensip ek valer sa bann legzanp avek li san ki ou aplik sa bann lenformasyon avek sa sitiasyon ki i pe fer fas avek. Demann sa dimoun si i vwar serten keksoz dan sa bann prensip ek legzanp ki kapab ed li pour fer en desizyon ki saz. Ankouraz li pour konsider ki kalite kondwit ki pou fer plezir Zeova dapre sa bann prensip ek legzanp. Alor ou pe ed li pour form son prop kapasite konpreansyon pour ‘fer diferans ant sa ki byen ek sa ki mal.’—Ebr. 5:14.

Fer Komanter dan bann Renyon Kongregasyon

Bann renyon kongregasyon Kretyen i souvan-d-fwa ofer loportinite pour nou fer deklarasyon piblik nou lafwa. En fason dan ki nou fer sa se par fer komanter pour reponn bann kestyon. Konman nou devret fer komanter? Avek en dezir pour beni, oubyen pour koz byen lo Zeova. Se sa ki psalmis David ti fer ler i ti “parmi lafoul ki’n rasanble.” (Pson. 26:12) Nou devret osi fer komanter dan en fason ki ankouraz bann konpanyon Kretyen, ensit zot “pour annan lanmour e fer sa ki byen,” parey zapot Pol ti konseye. (Ebr. 10:23-25) Par etidye sa bann leson davans i kapab ed nou pour fer sa.

Ler ou ganny demande pour fer komanter, kit ou bann remark senp, kler e bref. Pa kouver sa paragraf an antye; adres selman en pwen. Si ou donn selman en bout larepons, sa pou donn lezot loportinite pour fer komanter adisyonnel. Fer resorti bann verse ki’n ganny mansyonnen dan sa lartik i anmenn bokou benefis. Ler ou pe fer komanter lo sa verse, esey atir latansyon lo sa porsyon ki aplik avek sa pwen ki pe ganny egzaminen. Aprann eksprim dan ou prop mo olye ki lir direkteman dan paragraf. Pa trakase si en komanter ki ou fer pa sorti egzakteman byen. Sa i arive detanzaot avek tou dimoun ki fer komanter.

I evidan ki konnen konman nou devret reponn i enplik plis ki zis konn larepons. I demann disernman. Me pa i satisfezan ler ou donn en larepons ki sorti dan ou leker e ki tous leker lezot!—Prov. 15:23.