Eski mon kalifye pour prese?
1. Kwa ki pou ed nou santi ki nou kalifye pour prese?
1 Si ou’n deza poz ou lekor sa kestyon, pran kouraz! I pa en keksoz ki nou kapab aprann lekol ouswa en kalite ki nou ne avek ki fer nou vin en proklanmater kalifye. Parmi bann premye zonm pour vin disip, i ti annan bann ki ti ganny dekrir konman bann zonm “san gran ledikasyon.” Me kantmenm sa, zot ti bann predikater efikas sa bon nouvel akoz zot ti determinen pour swiv legzanp ki Zezi ti donnen.—Akt 4:13; 1 Pyer 2:21.
2. Nonm serten fason ki Zezi ti ansennyen.
2 Fason ki Zezi ti ansennyen: Son lansennyman ti senp, pratik e fasil pour konpran. I ti kaptir latansyon bann dimoun ki ti ekout li par servi bann kestyon, legzanp ek lentrodiksyon ki pa ti difisil pour konpran. (Mat. 6:26) I ti montre lentere senser dan dimoun. (Mat. 14:14) An plis ki sa, Zezi ti koz avek konfidans ek lotorite akoz i ti konnen Zeova ki ti’n anvoy li e donn li pouvwar pour kapab fer sa travay.—Lik 4:18.
3. Ki mannyer Zeova i ed nou pour akonplir nou minister?
3 Nou ganny led Zeova: Atraver son Parol ek lorganizasyon, nou Gran Ansenyan i donn nou bann formasyon ki nou bezwen pour pres sa bon nouvel dan en fason efikas. (Iza. 54:13) Zeova in prezerv bann lenformasyon lo fason ki Zezi ti ansennyen pour nou kapab analiz zot e imit son bann metod. Zeova i donn nou son lespri sen e bann formasyon atraver diferan renyon kongregasyon. (Zan 14:26) An plis ki sa, i donn nou bann proklanmater eksperyanse ki kapab ed nou pour vin pli efikas.
4. Akoz nou annan tou rezon pour santi nou kalifye pour partaz sa bon nouvel avek lezot?
4 Nou annan tou rezon pour santi nou kalifye pour prese akoz “nou kapasite i sorti kot Bondye.” (2 Kor. 3:5) Si nou kontinyen depan lo Zeova e touzour servi byen bann provizyon ki i donn nou avek lanmour, nou pou “byen prepare e byen ekipe pour fer tou aksyon ki bon.”—2 Tim. 3:17.