Kwen kestyon
◼ Eski Temwen Zeova i devret distribye bann diskour ki’n ganny anrezistre oubyen ki lo papye?
Nou ganny fortifye e ankouraze par bann diskour baze lo Labib. (Akt 15:32) Alor, i natirel pour anvi partaz sa bann lenformasyon ankourazan avek bann dimoun ki pa ti la ler sa diskour ti ganny prezante. I annan plizyer kalite lekipman elektronik ozordi ki fer li posib pour en dimoun fasilman anrezistre en diskour e anvoy li pour en lot. Serten in gard en koleksyon sa bann diskour ki’n ganny anrezistre, enkli bann diskour ki’n ganny fer plizyer lannen pase e zot pret oubyen fer en kopi sa bann diskour pour zot bann zanmi avek bon lentansyon. Lezot in kree bann sit lo Internet kot zot in met sa bann diskour pour nenport dimoun kapab ganny akse avek pour transfer lo zot prop konpiter.
Nou kapab anrezistre bann diskour pour nou menm ek nou fanmir ekoute. An plis, bann ansyen i kapab fer laranzman pour anrezistre bann diskour pour bann frer ek ser malad dan kongregasyon ki pa kapab asiste renyon. Me i annan bann rezon valab pour nou pa distribye sa bann diskour ki’n ganny anrezistre oubyen ki lo papye.
Vi ki sa bann diskour i souvan ganny prezante pour en kongregasyon spesifik, nou kapab fasilman mal enterpret serten pwen dan sa bann diskour ki ganny distribye. Sa i kapab arive akoz nou pa konnen pour ki rezon sa diskour in ganny donnen. An plis, i pa pou fasil pour nou konnen lekel ki’n fer sa bann diskour e kan, pour nou kapab annan konfyans ki sa lenformasyon i azour e egzakt. (Lik 1:1-4) Deplis, ler nou distribye sa bann diskour ki’n ganny anrezistre oubyen ki lo papye sa i kapab fer serten donn sa orater oubyen fer sa orater aksepte en latansyon spesyal ek loner ki i pa merite.—1 Kor. 3:5-7.
Lesklav fidel e pridan i travay dir pour donn sa “rasyon” manze spirityel ki egzakt “kan i ler.” (Lik 12:42) Sa i enkli sa laranzman pour fer bann diskour dan tou kongregasyon Temwen Zeova e bann lanrezistreman odyo ki nou kapab ganny akse avek lo Internet lo sa ladres ofisyel jw.org. Nou kapab annan konfyans ki lesklav fidel e pridan ek son Konsey Direkter pou donn nou sa ki nou bezwen pour fer nou lafwa vin pli for.—Akt 16:4, 5.