Lanrezistreman odyo—Ki mannyer pour servi zot
1. An plis ki bann piblikasyon an ekri, ki lezot provizyon nou annan?
1 Bokou i kontan servi jw.org pour lir bann zoli parol laverite ki egzakt. (Ekle. 12:10) Me eski ou’n deza servi bann lanrezistreman odyo? Sa bann lanrezistreman i fer li posib pour nou ekout bokou lenformasyon lo nou sit Enternet. Ki byenfe nou kapab gannyen ler nou ekout sa bann lanrezistreman odyo?
2. Ki mannyer nou kapab servi lanrezistreman odyo dan nou letid personnel ek Ladorasyon Fanmir?
2 Pour nou letid personnel ouswa Ladorasyon Fanmir: Si nou ekout bann lanrezistreman odyo lo Labib, magazin ouswa lezot piblikasyon ki nou annan letan nou pe vwayaze ouswa pe fer bann aktivite toulezour, sa i kapab ed nou pour byen servi nou letan. (Efe. 5:15, 16) Nou kapab varye nou Ladorasyon Fanmir par ekout lanrezistreman odyo bann piblikasyon e an menm tan swiv dan nou prop kopi. Bann lanrezistreman i osi kapab ed nou pandan nou letid personnel, sirtou si nou anvi amelyor nou fason lir e si nou pe aprann en langaz.
3. Lekel dan nou teritwar ki kapab benefisye avek bann lanrezistreman odyo?
3 Dan predikasyon: Bann dimoun dan nou teritwar ki santi zot tro okipe pou lir i kapab pare pour ekout bann lanrezistreman odyo. Nou kapab osi zwenn bann dimoun ki koz en lot langaz e ki pou pli pare pour ekout sa mesaz Rwayonm dan zot “prop langaz.” (Akt 2:6-8) Dan serten kiltir i enportan pour ekoute. Par egzanp, dan kiltir Hmong, i dan zot tradisyon pour transmet zot listwar avek bann zenn zenerasyon oralman e zot anmas byen sa bann lenformasyon ki zot tande. Dan bokou kiltir Afriken dimoun i aprann atraver bann zistwar ki ganny rakonte.
4. Ki kestyon nou kapab demann nou lekor konsernan ed bann dimoun dan nou teritwar?
4 Dan ou teritwar, eski i ti pou itil pour fer sa met lakour ekout en porsyon en lanreziztreman odyo dan son prop langaz? Eski i ti pou itil pour anvoy en piblikasyon odyo pour en dimoun par imel? Eski nou kapab download en piblikasyon odyo, met li lo en CD pour donn en dimoun ki enterese ansanm avek en kopi enprimen? Sak liv, brosir, trak oubyen magazin an form elektronik ki nou donnen dan predikasyon, i kapab ganny konte konman en plasman. Lanrezistreman odyo in ganny fer pour nou servi dan nou letid personnel e osi pour senm lagrenn laverite Rwayonm dan leker bann dimoun.—1 Kor. 3:6.