Jehovah’s Witnesses—Faith in Action, Part 1: Out of Darkness
Dan Labib, lalimyer i souvandfwa relye avek laverite e fernwanr avek mansonz. (Ps. 43:3; Iza. 5:20) Fernwanr ti vin dan lemonn atraver Satan ler i ti anbet Ev e finalman limanite in tonm dan en gro fernwanr. (Rev. 12:9) Sa DVD Jehovah’s Witnesses—Faith in Action, Part 1: Out of Darkness i montre ki mannyer lalimyer spirityel ti konmans eklere dan sa fernwanr spirityel. (Iza. 60:1, 2) Ler ou’n fini get sa dokimanter, silvouple reponn sa bann kestyon.
(1) Ki mannyer fernwanr spirityel ti propaze apre lanmor bann zapot? (2) Apartir bann lannen 1100, kwa ki ti ed bann dimoun pour vwar ki legliz pa ti pe ansenny laverite? (3) Ki sennla Henry Grew ek George Storrs? (4) Ki levennman dan lavi Charles Russell ki ti annan en gro lefe lo li? (5) Ki mannyer Frer Russell, son papa ek detrwa lezot dimoun ti konmans etidye Labib e lo ki konklizyon zot ti arive? (6) Ki mannyer sa group bann etidyan Labib ti konmans asosye avek group Nelson Barbour e akoz Frer Russell ti finalman separe avek li? (7) Ki ti arive Zilyet 1879 ki ti en nouvo devlopman an sa ki konsern propaz lalimyer spirityel? (8) Apre sa, ki sa group Etidyan Labib ki ti pe ogmante ti fer pour propaz sa bon nouvel? (9) Plizyer lannen avan 1914, ki bann Etidyan Labib ti mazinen i pou arive sa lannen la? (10) Ki defi bann Etidyan Labib ti rankontre apre lanmor Frer Russell? (11) Ki bann Etidyan Labib ti fer apre ki Frer Rutherford ek son bann asosye ti ganny large dan prizon? (12) Dan sa video, kwa ki’n ranforsi ou lapresyasyon pour lorganizasyon Zeova? (13) Ki mannyer sa dokimanter in ed ou ranforsi ou determinasyon pour kontinyen prese avek devouman menm si ou rankontre bann leprev? (14) Ki mannyer nou ti kapab servi sa DVD pour ed nou fanmir, etidyan Labib ek lezot ankor?
Pa sa bann Etidyan Labib sa lepok in kit en zoli leritaz pour nou! Menm si zot ti pe viv dan en lemonn ki dan fernwanr, avek kouraz ek devouman, zot in propaz lalimyer spirityel. Annou imit zot legzanp e kontinyen “mars konman zanfan lalimyer.”—Efe. 5:8.