Protez ou konsyans
1. Ki tenm lasanble spesyal pour lannen servis 2013 e ki bi sa progranm?
1 Tou le zour, nou fer fas avek bann sityasyon ki kapab fer nou sali nou konsyans. Sanmenm sa rezon ki tenm nou lasanble spesyal pour lannen 2013 ki pou konmans le 1 Septanm 2012 i “Protez ou konsyans.” (1 Tim. 1:19) Sa progranm in ganny prepare pour ed sakenn antre nou pour reflesir seryezman lo konman nou pe servi sa zoli kado ki nou Kreater in donn nou.
2. Ki kestyon enportan ki pou ganny reponn pandan progranm?
2 Rod sa bann pwen: Pandan sa progranm lasanble, set kestyon prensipal konsernan nou konsyans pou ganny reponn e sa se:
• Kwa ki kapab en danze pour nou konsyans?
• Ki mannyer nou kapab antrenn nou konsyans?
• Konman nou kapab pa koupab disan personn?
• Ki nou fason panse e aksyon an rapor avek bann prensip Labib i montre lo nou?
• Ki nou kapab fer pour pa afekte konsyans lezot?
• Zenn, ler ou anba presyon pour fer konpromi, ki ou kapab fer?
• Ki benediksyon bann ki ekout zot konsyans ki’n ganny gide par lespri sen i gannyen?
3. Dan ki fason sa progranm pou benefisye nou?
3 Satan i anvi sali nou konsyans, me avek led Zeova nou kapab reisi reziste li. Atraver Parol Bondye ek son lorganizasyon, avek lanmour, nou Papa ki dan lesyel i dir nou: “La sa semen. Mars lo la.” (Iza. 30:21) Sa progranm i en mwayen par ki Zeova i gid nou. Alor, fer laranzman pour asiste sa progranm antye. Port byen latansyon e reflesir byen lo konman ou pou met sa lenformasyon an pratik personnelman. Koz lo la konman en fanmir. Ler nou aplik sa ki nou aprann, sa pou donn nou lafors pour kontinyen “gard en bon konsyans” e i pou ed nou pour pa ganny antrennen par bann plezir sa lemonn Satan.—1 Pyer 3:16.