Kwen kestyon

◼ Ki prensip Labib ki kapab ed nou servi telefonn kan nou pe asiste renyon oubyen kan nou dan predikasyon?

“Pour tou keksoz i annan en letan fikse.” (Ekle. 3:1): Telefonn i donn dimoun sa loportinite pour anvoy mesaz oubyen koz avek lezot nenport ki ler. Par kont, i annan moman kot bann Kretyen pa anvi ganny distrer par zot telefonn. Par egzanp, nou bann renyon i en moman pour ador Zeova, ganny lenstriksyon spirityel e ankouraz kanmarad. (Det. 31:12; Ps. 22:22; Rom. 1:11, 12) Eski nou kapab tenny nou telefonn ler nou arive e lir nou mesaz apre renyon? Si nou krwar ki en keksoz irzan i kapab arive, nou devret regle nou telefonn dan en fason ki i pa pou enteronp lezot.

“Fer tousala pour Levanzil.” (1 Kor. 9:23): Parler, i annan bann bon rezon pour servi telefonn dan predikasyon. Par egzanp, sa frer ki responsab sa group i kapab servi li pour ganny kontak avek bann ki pe pres dan lezot landrwa dan sa teritwar. Parler, bann proklanmater i kapab telefonn en dimoun ki enterese oubyen en etidyan Labib avan zot al kot li, sirtou si i reste lwen. Si nou annan en telefonn, nou bezwen fer sir ki i pa enteronp nou kan nou pe koz avek met lakour. (2 Kor. 6:3) Kan nou pe esper lezot proklanmater, dan plas telefonn oubyen anvoy mesaz nou zanmi, pa i ti pou pli byen reste konsantre lo nou minister ek sa bann ki nou pe travay avek dan predikasyon?

Demontre respe pour lezot. (1 Kor. 10:24; Fili. 2:4): Nou pa devret fer li en labitid pour vin tar dan predikasyon akoz nou mazinen ki nou kapab telefonn oubyen anvoy mesaz en dimoun pour konnen kote group pe prese. Kan nou ariv tar, souvan group i bezwen ganny reorganize. I vre ki serten sirkonstans an deor nou kontrol i kapab fer nou ariv tar par ler. Par kont, kan nou fer li en labitid pour ariv boner, nou montre respe pour laranzman Zeova, sa frer ki organiz group ek lezot proklanmater.