Kwen Kestyon

◼ Ki nou devret gard antet kan nou pe servi telefonn mobil ek lezot mwayen kominikasyon elektronik?

Bann tel lekipman i permet nou pour kontakte lezot preske nenport landrwa ki nou kapab ete. Kantmenm sa i kapab itil, nou devret fer atansyon ki nou pa servi telefonn mobil ek lezot mwayen kominikasyon elektronik dan bann moman ki pa apropriye pour gat nou minister ouswa nou bann renyon Kretyen. Konman sa i kapab arive?

Mazinen ki lefe sa pou annan si nou telefonn mobil i sonnen letan nou dan predikasyon pandan ki nou pe donn en temwannyaz. Ki sa met lakaz pou panse? Ki lenpresyon nou pou donn sa dimoun si nou aret koze pour reponn nou telefonn? Sertennman nou pa pou anvi fer nanryen ki pou anpes lezot ekout sa mesaz Rwayonm. (2 Kor. 6:3) Alor, si nou pe anmenn en telefonn mobil, nou bezwen regle li pour ki i pa enteronp nou oubyen lezot kan nou dan predikasyon.

Ki nou pou fer dan en ka kot nou pe esper lezot ki pe donn en temwannyaz? Si nou’n met dekote en peryod letan pour predikasyon, eski pa nou devret gard nou lespri lo sa aktivite? Pour rezon respe pour nou servis sakre, silvouple annou fer nou bann tranzaksyon personnel ki pa neseser dan en lot moman. (Rom. 12:7) Byensir, sa pa vedir ki nou pa kapab servi en telefonn pour donn en temwannyaz oubyen pour fer en laranzman pour kontinyen donn en temwannyaz.

Nou bezwen espesyalman pridan an sa ki konsern servi telefonn mobil letan nou pe dray, vi ki serten letid i montre ki sa i ogmant risk pour ganny en aksidan. Nou bezwen strikteman obeir nenport lalwa ki enterdi servi telefonn mobil anmenmtan ki nou pe dray.

Nou vin bann renyon Kretyen ek lasanble pour ador Zeova e pour ganny ansennyen par li. Vi ki sa bann levennman i sakre, sa pa i devret motiv nou pour tenny nou telefonn ki i pa distrer nou oubyen lezot? Si i ariv en keksoz irzan ki merit nou latansyon deswit, nou bezwen okip sa zafer an deor landrwa renyon. Oubyen, nou bezwen pran ka avek nou bann zafer personnel ouswa profann dan lezot moman e non pa dan bann ler renyon.—1 Kor. 10:24.

Fotespere lafason ki nou servi telefonn mobil i toultan montre konsiderasyon pour lezot e osi lapresyasyon profon pour keksoz spirityel.