Satisfer ou Bezwen spirityel
1 Nou Lasanble Distrik “Bann Proklanmater Rwayonm zele” ki pe aprose i donn nou en loportinite merveye pour satisfer nou bezwen spirityel. Zis parey avek en bon manze fizik, sa progranm pou sirman nouri nou spirityelman, avek “bann parol lafwa.” (1 Tim. 4:6) I pou permet nou pour vin pli pre avek Zeova, e definitivman nou pou resevwar konsey ek lankourazman ki pou ed nou pour fer fas avek bann leprev dan nou lavi. Zeova i asir nou: “Mon pou fer ou annan disernman e enstri ou dan semen ki ou devret ale. Mon lizye pou lo ou pour konsey ou.” (Ps. 32:8) Pa nou ere ki nou annan son gidans ranpli avek lanmour dan nou lavi! Annou egzamin detrwa mezir ki nou kapab pran pour nou retir maksimonm benefis atraver sa progranm lasanble.
2 Nou bezwen prepar nou Leker: Sakenn antre nou i annan en responsabilite pour protez son prop leker senbolik. (Prov. 4:23) Pour fer sa, nou bezwen disiplin e osi onnet avek nou lekor. Lasanble i en letan pour nou medit lo nou relasyon avek Zeova, en letan pour “egzamin byen lalwa parfe, lalwa laliberte.” Pour prepar nou leker afen ki nou aksepte ki parol Bondye i ganny ‘plante dan leker,’ nou bezwen enplor Zeova pour egzamin nou, pour idantifye dan nou okenn “semen douloure” ki bezwen ganny korize, e pour anmenn nou dan “semen letan endefini.”—Zak 1:21, 25; Ps. 139:23, 24.
3 Ekoute e medite: Zezi ti felisit Mari pour port bokou latansyon lo son parol, an dizan: “Mari in swazir meyer par ki pa pou ganny pran avek li.” (Lik 10:39, 42) Si nou annan sa menm mantalite, nou pa pou les bann keksoz ki pa enportan distrer nou. Nou pou fer sir ki nou pe asize e atantif toudilon progranm. Nou pou evite koze oubyen marse san okenn rezon enportan e nou pou fer atansyon pour pa distrer lezot avek telefonn portab, ek bann kanmera.
4 Ler nou pe ekout bann diskour, i bon pour pran bann not bref pour nou egzaminen konman ki sa size pe ganny devlope. Nou devret relye sa ki nou tande avek sa ki nou deza konnen. Sa pou ed nou pour konpran e pa oubliy sa lenformasyon. Ler nou pe reviz nou bann not, nou bezwen fer li avek en lentansyon pour aplik sa lenformasyon. I byen ki nou tou nou demann nou lekor: ‘Konman ki sa i afekte mon relasyon avek Zeova? Ki sanzman ki mon bezwen fer dan mon lavi? Konman ki mon kapab aplik sa lenformasyon dan lafason ki mon tret lezot? Konman ki mon kapab servi li dan mon minister?’ Diskit avek lezot bann pwen ki nou’n bokou apresye. Si nou fer sa bann keksoz, sa pou ed nou pour gard parol Zeova dan ‘milye nou leker.’—Prov. 4:20, 21.
5 Annou aplik sa ki nou aprann: Apre ki i ti’n asiste en lasanble distrik, en frer ti dir: “Sa progranm ti vreman aplik pour nou tou personnelman, i motiv en dimoun pour egzamin kondisyon son leker e sa ki pour son fanmiy, e fourni lezot dimoun led biblik kot i neseser. I’n fer mwan pli konsyan mon lobligasyon pour ed kongregasyon plis ankor.” I tre probab ki bokou nou in santi sa menm fason. Me i pa sifi pour nou senpleman ale e santi ki nou’n ganny ankouraze e rafresi. Zezi ti dir: ‘Aprezan ki zot konn sa, zot ere si zot met li an pratik.’ (Zan 13:17) Nou bezwen fer bokou zefor pour met an pratik bann pwen ki aplik pour nou personnelman. (Fili. 4:9) Sa i solisyon pour nou kapab satisfer plennman nou bezwen spirityel.
[Bwat lo paz 4]
Medit lo sa ki ou tande:
■ Konman ki sa i afekte mon relasyon avek Zeova?
■ Konman ki i enfliyans lafason ki mon tret lezot?
■ Konman ki mon kapab aplik li dan mon lavi e dan mon minister?