Pran konman legzanp bann profet: Yoel
1. Dan predikasyon, ki mannyer nou kapab imit limilite Yoel?
1 Lekel profet Yoel? I zis dir nou ki i ti “garson Petouel.” (Yoel 1:1) Sa profet ki ti annan limilite ti konsantre lo anons mesaz Zeova, plito ki koz lo son rol konman en mesaze. Pareyman dan nou minister, olye ekspekte ganny onore ouswa rekonnet, nou devret port latansyon lezot lo Zeova ek Labib. (1 Kor. 9:16; 2 Kor. 3:5) An plis ki sa, nou ganny lafors atraver sa mesaz ki nou anonse. Ki laspe dan profesi Yoel ki kapab ed nou devlop devouman e annan lespwar ozordi?
2. Ki nou devret ganny motive pour fer vi ki zour Zeova i pros?
2 “Zour Zeova i pros.” (Yoel 1:15): Menm si sa parol ti ganny ekrir en bann lannen pase, nou pe viv dan letan son lakonplisman final. Kondisyon lemonn ki pe deteryore deplizanpli, lendiferans ek sikannri dan teritwar i bann laprev ki nou pe viv dan bann dernyen zour sa move lemonn. (2 Tim. 3:1-5; 2 Pyer 3:3, 4) Kan nou reflesir lo lefet ki sa lemonn i pros pour ganny detrir, nou annan tou rezon pour met nou minister premye dan nou lavi.—2 Pyer 3:11, 12.
3. Akoz nou minister i pli enportan ankor anmezir nou apros gran ladetres?
3 “Zeova pou vin en refiz pour son pep.” (Yoel 3:16): Sa bout dan sa verse ki dir ki lesyel pou tranble i kapab pe aplik zis avek egzekisyon zizman Zeova pandan gran ladetres. Nou ganny rekonforte akoz nou konnen Zeova pou delivre son bann serviter fidel pandan sa letan. (Rev. 7:9, 14) Anmezir nou partisip dan predikasyon e eksperyans lafason ki Zeova i soutenir e fortifye nou, nou lafwa i ogmante e nou devlop landirans ki pou ed nou pandan sa gran ladetres ki pe vini.
4. Akoz nou kapab zwaye e get lavenir avek konfyans?
4 Menm si pour serten Yoel ti pe anons zis maler, pour pep Bondye sa mesaz i donn zot en lespwar merveye ki zot pou ganny delivre. (Yoel 2:32) Alor, annou get lavenir avek konfyans e annou proklanm sa bon nouvel Rwayonm Bondye avek devouman anmezir nou swiv sa parol ki dan Yoel 2:23: “Fodre zwaye e rezwir dan Zeova zot Bondye.”