En latak sorti dan Nor!

1. Ki fason etidye Frer Russell avek son group ti servi e akoz sa ti en bon fason fer?

PLIS ki en syek pase, Frer Charles Taze Russell ek son bann zanmi, en pti group dimoun ki etidye Parol Bondye, ti konmans zwenn ansanm. Zot ti anvi vwar si zot ti pou kapab aprann sa ki Labib i vreman dir konsernan Zeova, Zezi Kri, kondisyon bann mor ek ranson. Zot fason etidye ti senp. En dimoun ti pou demann en kestyon e zot ti pou egzamin tou bann verse ki relye avek sa size. Finalman, zot ti ekri sa ki zot in vwar dan zot resers. Avek benediksyon Zeova, sa bann Kretyen senser ti dekouver en kantite laverite enportan e sa bann laverite i ankor enportan pour nou ozordi.

2. Ki mannyer nou kapab tir bann move konklizyon ler nou pe esey konpran en profesi Labib?

² Sa bann etidyan Labib pa ti tarde pour realize ki i bokou pli difisil pour konpran en profesi Labib ki pour konpran en lansennyman de baz ki sorti dan Labib. Akoz sa? En rezon i akoz souvandfwa ou pli byen konpran bann profesi Labib ler i pe ganny akonplir oubyen apre ki i’n fini ganny akonplir. Me i annan en lot rezon. Pour byen konpran en profesi, nou bezwen vwar li dan son konteks. Si nou konsantre lo zis en laspe en profesi e inyor lezot laspe, nou kapab tir bann move konklizyon. I paret ki sa ti leka avek en profesi dan liv Zoel. Nou pou egzamin sa profesi ankor e vwar akoz nou bezwen fer en azisteman dan fason ki nou konpran sa profesi.

3-4. Ziska aprezan, ki mannyer nou’n konpran sa profesi dan Zoel 2:7-9?

³ Lir Zoel 2:7-9, NWT.b Zoel ti predir ki en lesen sotrel ti pou anvai pei Izrael. Sa bann zensek voras pou manz tou sa ki zot vwar avek zot ledan ek lanmaswar ki parey lanmaswar lyon! (Zoel 1:4, 6, NWT) Pour plizyer lannen, nou ti krwar ki sa profesi ti pe predir ki pep Zeova pou kontinyen sa travay predikasyon parey en lesen sotrel ki pa kapab ganny arete. Nou ti krwar ki sa travay predikasyon ti pou anvai sa “pei” oubyen bann dimoun ki anba kontrol bann sef relizye.c

⁴ Sa leksplikasyon i paret byen si nou lir zis Zoel 2:7-9. Me ler nou reflesir byen lo sa profesi an antye, nou vwar ki nou bezwen konpran li dan en lot fason. Annou vwar kat rezon akoz.

KAT REZON POUR FER EN AZISTEMAN

5-6. Ki kestyon nou demande ler nou lir (a) Zoel 2:20? (b) Zoel 2:25?

⁵ Premyerman, annou vwar sa promes Zeova konsernan sa lesen sotrel: “Mon pou sas bann sotrel ki sorti dan Nor; mon pou sas zot lwen.” (Zoel 2:20) Si sa bann sotrel i reprezant Temwen Zeova ki pe obei lord Zezi pour anons sa bon nouvel e fer disip, akoz Zeova in promet pour sas zot? (Ezek. 33:7-9; Mat. 28:19, 20) I kler ki Zeova pa pe sas son bann serviter fidel me i pe sas en keksoz oubyen en dimoun ki ankoler avek son pep.

⁶ Dezyenmman, mazin lo sa ki’n ganny ekri dan Zoel 2:25, NWT. Dan sa verse Zeova i dir: “Mon pou rann zot tou sa ki zot in perdi pandan sa letan kot Mon ti anvoy mon gran larme lo zot, Bann sotrel ki anvole, bann sotrel ki napa lezel, bann sotrel ki voras ek bann sotrel ki devore ki’n manz zot plantasyon.” Remarke ki Zeova i promet pour “rann zot tou sa ki zot in perdi” pour domaz ki bann sotrel in fer. Si sa bann sotrel i reprezant pep Zeova ki pe anons sa bon nouvel, sa pou vedir ki sa mesaz ki zot pe anonse i fer ditor. Me sa mesaz i sov lavi e i kapab fer serten move dimoun repantir. (Ezek. 33:8, 19) Sa pou en zoli benediksyon pour zot!

7. Ki sa lekspresyon “apre sa” dan Zoel 2:28, 29 i ed nou konpran?

⁷ Lir Zoel 2:28, 29. Trwazyenmman, annou vwar dan ki lord sa bann levennman in arive dan sa profesi. Eski ou remarke ki Zeova i dir: “Apre sa, mon pou devers mon lespri;” eski sa i vedir apre ki sa bann sotrel in fini zot travay? Si sa bann sotrel i bann predikater Rwayonm, akoz Zeova pou devers son lespri lo zot apre ki zot fini sa travay predikasyon? San led lespri sen Bondye, sa bann predikater Rwayonm pa ti pou’n zanmen kapab kontinyen sa travay predikasyon pour sa kantite letan malgre lopozisyon e menm ler sa travay i anba restriksyon.

8. Dan Revelasyon 9:1-11, ki bann sotrel i reprezante? (Vwar portre lo kouvertir.)

⁸ Lir Revelasyon 9:1-11. Aprezan annou vwar sa katriyenm rezon. Dan lepase, nou ti dir ki sa lesen sotrel ki ganny dekrir par Zoel i refer avek nou travay predikasyon akoz i annan en profesi en pe parey dan liv Revelasyon. Sa profesi i dekri en lesen sotrel ki annan figir imen e ‘lo zot latet, i annan sa ki resanble en kouronn annor.’ (Rev. 9:7) Zot tourmant “bann dimoun [bann lennmi Bondye] ki ti napa sele Bondye lo zot fron” pour senk mwan e sa i apepre lakantite letan ki en sotrel i viv. (Rev. 9:4, 5) Sa i paret pe dekri bann serviter swazir Zeova. Zot anons mesaz zizman Bondye avek sa move lemonn e sa i tourmant tou dimoun ki pran kote avek sa lemonn.

9. Ki diferans vreman enportan i annan ant bann sotrel ki Zoel ti vwar ek sa bann ki Zan ti koz lo la?

⁹ Nou bezwen rekonnet ki i annan serten keksoz ki parey dan sa profesi dan Revelasyon ek sa enn dan Zoel. Par kont, i annan bann diferans vreman enportan. Par egzanp, dan profesi Zoel, bann sotrel i anvai vezetasyon. (Zoel 1:4, 6, 7) Me dan vizyon ki Zan ti gannyen, bann sotrel i “ganny demande pour pa fer ditor vezetasyon ki lo later.” (Rev. 9:4) Bann sotrel ki Zoel ti vwar ti sorti dan nor. (Zoel 2:20) Sa bann ki Zan ti vwar ti sorti dan en labim. (Rev. 9:2, 3) Bann sotrel ki Zoel ti koz lo la i ganny sase. Bann sotrel ki Zan ti vwar, pa ganny sase me zot kapab kontinyen fer zot travay. Napa nanryen dan Labib ki montre ki Zeova ti ankoler avek zot.​—Vwar sa bwat “Profesi konsernan sotrel​—Parey me diferan.”

10. Donn en legzanp dan Labib pour montre ki bann sotrel ki Zoel i koz lo la i kapab reprezant diferan keksoz ki sa ki Zan i koz lo la.

¹⁰ Bann diferans vreman enportan ki i annan ant sa de profesi i ed nou konpran ki zot pa konekte avek kanmarad. Eski nou pe dir ki bann sotrel ki Zoel i koz lo la i pa menm sotrel ki dan liv Revelasyon? Wi. Dan Labib, parfwa en senbol i annan en lot sans ler i ganny servi dan en lot sityasyon. Par egzanp, dan Revelasyon 5:5, Zezi i ganny apele “Lyon ki sorti dan tribi Zida,” tandis ki dan 1 Pyer 5:8, Dyab i ganny dekrir konman “en lyon ki pe kriye.” Sa kat pwen ki nou’n vwar i montre ki nou bezwen rod en lot leksplikasyon pour profesi Zoel. Ki sa leksplikasyon?

KI SA PROFESI I VEDIR?

11. Ki mannyer Zoel 1:6 ek 2:1, 8, 11, i ed nou konpran lekel bann sotrel?

¹¹ Ler nou egzamin lezot verse dan profesi Zoel, nou vwar ki sa profet ti pe predir en latak militer. (Zoel 1:6; 2:1, NWT, 8, 11) Zeova ti dir ki i pou servi son “gran larme” (bann solda Babilonnyen) pour pini bann Izraelit ki ti dezobeisan. (Zoel 2:25, NWT) I normal ki sa larme ki pe atake i ganny apele en larme ki “sorti dan Nor,” parski bann Babilonnyen ti pou konmans anvair Izrael dan nor. (Zoel 2:20) Sa larme i parey en lesen sotrel ki byen organize. Konsernan zot, Zoel i dir: “Sak [solda] i avans devan. . . . Zot antre dan lavil an tayan e zot tay lo miray. Zot grenp lo bann lakaz e zot antre par lafnet parey voler.” (Zoel 2:8, 9, NWT) Eski ou kapab imazin sa ki pe arive? I annan solda partou kote. I napa okenn landrwa kasyet. Personn pa kapab kasyet sa bann solda Babilonnyen!

12. Ki mannyer sa profesi dan Zoel konsernan sotrel ti ganny akonplir?

¹² Lannen 607 avan Kris, bann Babilonnyen ti anvai lavil Zerizalenm parey sotrel. Labib i dir: “Lerwa Babilonyen . . . ti masakre bann zennzan . . . san okenn pitye pour personn: Ni zennzan, ni zenn fiy, ni adilt, ni vyeyar. [Bondye] ti livre zot dan lanmen lerwa Babilonn. Zot ti met dife dan tanp e demoli miray Zerizalenm. Zot ti met dife dan bann pale e detri tou bann lobze presye.” (2 Kron. 36:17, 19) Ler bann Babilonnyen ti’n fini detri sa pei, dimoun ti zis kapab dir: “Sa pei in ganny livre ek bann Babilonyen e [i] parey en dezer kot ni dimoun ni zannimo pa viv.”​—Zer. 32:43.

13. Ki Zeremi 16:16, 18 i vedir? Eksplike.

¹³ Apepre 200 lannen apre sa profesi Zoel, Zeova ti servi Zeremi pour predir en lot keksoz konsernan sa latak. I ti dir ki sa larme ti pou rod bann Izraelit ki ti pe pratik bann move keksoz e i ti pou atrap zot. Zeova i dir: “‘Mon pou anvoy en kantite peser e zot pou lapes zot. Apre sa, mon pou anvoy en kantite saser E zot pou sas zot lo tou montanny ek bann pti montanny E dan bann kap ros. . . . Mon pou fer zot pey pour zot fot ek zot pese.’” Ni bann losean e ni bann lafore pa pou anpes bann Babilonnyen anvair bann Izraelit ki pa’n repantir.​—Zer. 16:16, 18 NWT.

SA PEI I GANNY RETABLIR

14. Kan ki Zoel 2:28, 29 ti ganny akonplir?

¹⁴ Zoel i annan en bon nouvel. Sa pei pou revin prodiktif. (Zoel 2:23-26) Apre sa, a en serten moman dan lavenir, en kantite manze spirityel pou disponib. Zeova i dir: “Mon pou devers mon lespri lo tou dimoun: Zot zennzan ek zot zenn fiy pou profetize. . . . Mon pou devers mon lespri lo tou dimoun, menm lo bann serviter, fanm koman zonm.” (Zoel 2:28, 29) Sa pa ti ariv zis apre ki bann Izraelit ti retourn dan zot pei sorti Babilonn. O kontrer i ti ariv plizyer syek pli tar, zour Lapannkot lannen 33. Ki mannyer nou konn sa?

15. Dapre Akt 2:16, 17, ki azisteman Pyer ti fer avek sa verse dan Zoel 2:28 e ki sa i montre?

¹⁵ Anba gidans lespri sen, zapot Pyer ti aplik Zoel 2:28, 29 avek en levennman ekstraordiner ki ti arive zour Lapannkot lannen 33. Apepre 9 er bomaten, Bondye ti devers son lespri sen e bann ki ti resevwar li ti konmans koz lo “bann keksoz merveye ki Bondye in fer.” (Akt 2:11) Anba gidans lespri sen, zapot Pyer ti servi serten mo diferan ler i ti repet sa profesi dan Zoel. Eski ou’n remarke ki azisteman i ti fer? (Lir Akt 2:16, 17.) Olye dir “apre sa,” parey dan profesi Zoel, Pyer ti dir: “Dan bann dernyen zour.” Dan sa konteks i ti pe refer avek bann dernyen zour sistenm Zwif. Sa letan, Zeova ti pou devers son lespri sen “lo tou sort kalite dimoun.” Sa i montre ki en kantite letan ti pase avan ki profesi Zoel i ganny akonpli.

16. Dan premye syek, ki lefe lespri sen Bondye ti annan lo travay predikasyon e ki nou pou dir konsernan ozordi?

¹⁶ Apre ki Bondye ti’n devers son lespri sen lo bann Kretyen dan premye syek, zot ti konmans sa travay predikasyon ki avek letan ti pou kouver later antye. Ler zapot Pol ti ekri let pour bann Kolosyen, apepre lannen 61 nou lepok, i ti kapab dir ki sa travay predikasyon in “ganny anonse avek dimoun partou lo later.” (Kol. 1:23) Ler Pol ti dir “avek dimoun partou lo later,” i ti pe refer avek partou kot li ek lezot ti kapab arive sa letan. Avek led lespri sen Zeova, sa travay predikasyon in propaz bokou plis dan nou letan “ziska dan bann landrwa pli lwen lo later”!​—Akt 13:47; vwar sa bwat “Mon pou devers mon lespri.”

KWA KI’N SANZE?

17. Ki mannyer fason nou ti konpran profesi Zoel konsernan bann sotrel in sanze?

¹⁷ Kwa ki’n sanze? Aprezan nou pli byen konpran sa profesi dan Zoel 2:7-9. I kler alor ki sa bann verse pa pe refer avek nou travay predikasyon me avek bann larme Babilonnyen ki ti anvair Zerizalenm an 607 avan Kris.

18. Kwa ki pa’n sanze konsernan pep Zeova?

¹⁸ Kwa ki pa’n sanze? Pep Zeova i kontinyen anons sa bon nouvel partou par servi diferan metod. (Mat. 24:14) Napa okenn restriksyon ki gouvernman i mete ki kapab anpes nou swiv sa lord pour anons sa bon nouvel. Avek benediksyon Zeova, nou pli determinen pour anons sa bon nouvel konsernan Rwayonm Bondye! Avek limilite, nou kontinyen depan lo gidans Zeova pour nou konpran bann profesi Labib, parski nou asire ki dan sa pli bon moman i pou “ansenny [nou] tou sa ki vre”!​—Zan 16:13.