Zenn frer, eski ou anvi ganny plis responsabilite?
1. Kan ki en zenn frer i devret konmans aplik sa konsey dan 1 Timote 3:1?
1 “Si okenn zonm i anvi ganny plis responsabilite . . . , i pe anvi fer en bon travay.” (1 Tim. 3:1, NW) Sa parol enspire pe ankouraz bann frer pour anvi ganny plis responsabilite dan kongregasyon. Eski ou devret en adilt pour arive fer li? Anfet, i pli bon pour konmans sa traze depi byen zenn. Dan sa fason, ou pou kapab ganny bann formasyon e montre ki ou kalifye pour ganny apwente asistan ministeryel kan ou pli gran. (1 Tim. 3:10) Si ou en zenn frer batize, ki mannyer ou kapab devlop sa dezir pour annan plis responsabilite?
2. Ki mannyer en dimoun i kapab devlop e demontre en leta lespri sakrifis?
2 Sakrifis personnel: Rapel byen ki ou anvi fer en bon travay, pa pour ganny en tit ouswa pozisyon. Alor, devlop sa dezir pour ed ou bann frer ek ser. En fason pour fer sa i ler ou medit lo bon legzanp Zezi. (Mat. 20:28; Zan 4:6, 7; 13:4, 5) Demann Zeova pour ed ou pour enterese avek lezot. (1 Kor. 10:24) Eski ou kapab donn led pratik bann aze ouswa andikape dan kongregasyon? Eski ou disponib pour koup zerb, balye lakour ouswa okip lezot travay reparasyon kot Lasal Rwayonm? Eski ou pare pour fer en ekspoze la pour la dan Lekol Minister Teokratik? Ou pou remarke ki ou pou ganny bokou lazwa si ou servi lezot.—Akt 20:35.
3. Akoz spirityalite i enportan e ki mannyer nou kapab devlop li?
3 Spirityalite: En dimoun spirityel dan kongregasyon i pli bon ki enn ki annan talan ouswa abilite. En zonm spirityel i esey vwar keksoz parey Zeova ek Zezi. (1 Kor. 2:15, 16) I demontre “fri lespri.” (Gal. 5:22, 23) I en predikater devoue ki met lentere Rwayonm premye. (Mat. 6:33) En bon labitid letid personnel pou ed ou devlop bann kalite spirityel. Sa i kapab enkli lir Labib tou le zour, lir sak nimero Latour Veyer ek Awake!, prepare e asiste renyon kongregasyon. (Ps. 1:1, 2; Ebr. 10:24, 25) Kan i ti pe ankouraz Timote konman en zenn pour fer progre spirityel, Pol ti ekrir: “Fer byen atansyon avek ou lansennyman.” (1 Tim. 4:15, 16) Alor, fer bokou zefor pour fer byen ou bann ekspoze dan Lekol Minister Teokratik. Prepar byen pour predikasyon e partisip regilyerman. Etablir bann lobzektif parey fer pionye, servi dan Betel ouswa asiste Lekol pour bann frer selibater e fer zefor pour atenn zot. En bon spirityalite pou ed ou “gard ou lekor kont sa bann pasyon lazenes.”—2 Tim. 2:22.
4. Akoz fidelite e diny konfyans i annan valer?
4 Fidel e diny konfyans: Lefet ki bann frer ki ti ganny responsabilite pour distribye manze avek bann Kretyen pov dan premye syek ti “annan bon repitasyon,” i evidan ki zot ti fidel e diny konfyans. Alor, bann zapot pa ti bezwen trakase si sa travay ti pou ganny fer. Sa ti permet zot pour konsantre lo bann keksoz enportan. (Akt 6:1-4) Alor, kan ou ganny donnen en responsabilite dan kongregasyon, fer li avek tou ou leker. Imit Noe ki ti swiv tou lenstriksyon pour konstri lars. (Zen. 6:22) Zeova i kontan bann dimoun fidel ki demontre matirite spirityel.—1 Kor. 4:2; vwar bwat “Byenfe en formasyon.”
5. Akoz bann zenn frer i devret anvi ganny plis responsabilite?
5 Parey i ti ganny profetize, Zeova pe akseler sa travay rasanbleman. (Iza. 60:22) Normalman, apepre de san senkant mil dimoun i batize tou le-z-an. Vi ki bokou nouvo pe vin dan laverite, i neseser pour annan bann frer kalifye pour responsab dan kongregasyon. Konmela, plis ki zanmen oparavan i annan en kantite pour fer dan servis Zeova. (1 Kor. 15:58) Zenn frer, eski ou anvi ganny plis responsabilite? Si wi, ou pe anvi fer en bon travay!
[Ekstre lo paz 2]
Vi ki bokou nouvo pe vin dan laverite, i neseser pour annan bann frer kalifye pour responsab dan kongregasyon
[Bwat lo paz 3]
Byenfe en formasyon
Bann zenn frer i benefisye en kantite kan bann ansyen i donn zot serten privilez e form zot. Apre renyon, en sirveyan rezyonal ti pe asize lo lestrad e pe ankouraz en proklanmater. I ti remark en zenn garson pe debout pros lanmenm, alor i ti demann li si i ti pe esper li pour koz avek li. Sa zenn frer ti reponn ki i ti’n ganny demande pour pas aspirater lo lestrad apre sak renyon. Son paran ti’n pare pour ale, me i pa ti anvi ale san fer sa ki i ti’n ganny demande. Sa sirveyan rezyonal ti leve. I ti dir: “Bann ansyen dan sa kongregasyon ti touzour pe form bann zenn frer kalifye par donn zot responsabilite dan kongregasyon. Akoz sa, mon pa ti vwar li drol pour zot rekomann en zenn frer konman asistan ministeryel kan mon ti pe vizit sa kongregasyon.”