Fer zefor pour fer plis dan nou minister
1 Zapot Pol ti konsey bann Kretyen pour mars dan semen Bondye e pour kontinyen “fer pli byen ankor.” (1 Tesa. 4:1) Ki sa i vedir pour nou? En fason, se ki nou devret kontinyelman rod fason pour fer plis dan aktivite spirityel, par fer bokou zefor pour plennman ‘ranpli nou devwar dan servis Bondye.’—2 Tim. 4:5.
2 Motivasyon: Nou dezir pour servi nou Kreater pli byen ankor i pous nou pour fer plis zefor dan nou minister. Nou anvi progrese spirityelman e rod fason pour amelyor nou minister. En bon progranm avek en bon motivasyon pou ed nou atenn nou bann lobzektif spirityel.—Ps. 1:1, 2; Fili. 4:6; Ebr. 10:24, 25.
3 I neseser ki nou devlop en leta lespri sakrifis e kontan donnen pour nou kapab fer plis dan nou minister. Nou kapab devlop en tel leta lespri par medit lo bon legzanp Zezi dan lapriyer. (Mat. 20:28) Zezi ti ganny en kantite lazwa kan i ti servi lezot tou dilon son minister. (Akt 20:35) Nou kapab imit legzanp Zezi par montre lentere personnel dan dimoun e vey bann loportinite pour fer plis dan nou minister.—Iza. 6:8.
4 Rol paran: Paran i kapab fer antre dan zot zanfan sa dezir pour servi lezot e fer plis dan nou minister kan zot ankor ptipti. Devouman bann manm fanmir ek zot partisipasyon regilye pour fer plis dan zot minister pou ganny rekonnet par bann zanfan. Par travay avek son granpapa dan bann aktivite kongregasyon ler i ti en zenn garson, en frer ti ganny motive pour fer plis dan nou minister. Ler i ti vwar devouman ek lazwa son granpapa, sa ti pous li pour rod loportinite pour servi son bann frer. Aprezan i en asistan ministeryel.
5 Bezwen pour plis frer: “Si en dimoun i swete [“vin sirveyan,” NW] . . . , i dezir en fonksyon nob.” (1 Tim. 3:1) Sa parol i ankouraz bann frer pour kalifye pour fer plis dan lorganizasyon Zeova. Pour fer sa zot pa bezwen annan bann talan spesyal oubyen abilite ekstraordiner. En frer ki swete fer plis pou rod Rwayonm premye e i pou partisip dan predikasyon avek devouman. (Mat. 6:33; 2 Tim. 4:5) I pou fer en kantite zefor pour vin en bon legzanp pour lezot.
6 Partou dan lemonn: Zeova pa pe tarde pour rasanble bann dimoun. (Iza. 60:22) I annan en bezwen irzan pour tou dimoun ki pe swiv legzanp Kris pour fer plis ankor dan zot minister. Rapor mondyal pour lannen servis 2006 i montre ki 248,327 dimoun ti ganny batize. Sa i reprezant en mwayenn plis ki 680 nouvo sak zour! Fotespere ki nou tou nou kontinyen rod fason pour fer plis ankor dan nou minister.