Eski ou anvi fer plis?
1 Zezi ti konpar Rwayonm avek bann trezor ki annan en tre gran valer. (Mat. 13:44-46) Sa travay pour fann sa bon nouvel Rwayonm i osi en trezor ki annan valer. Predikasyon i merit okip premye plas dan nou lavi, menm si partisip plennman ladan i enplik bokou sakrifis. (Mat. 6:19-21) Eski ou anvi fer plis dan servis Rwayonm?
2 Konsider sa bann Nesesite: Plizyer keksoz i neseser pour kapab ogmant nou partisipasyon dan predikasyon: (1) determinen pour met bann lentere Rwayonm premye dan nou lavi (Mat. 6:33); (2) demontre lafwa e depan lo Zeova (2 Kor. 4:1, 7); (3) resers led Bondye atraver lapriyer senser e kontinyel (Lik 11:8-10); (4) swiv e azir an armoni avek nou lapriyer.—Zak 2:14, 17.
3 Bann Fason pour elarzi nou Minister: Nou tou nou kapab met en lobzektif debaz pour regilyerman depans enpe letan dan predikasyon sak mwan. Me eski ou’n mazin osi konsernan sezi tou loportinite pour temwanny enformelman, esey fer ou bann prezantasyon annan plis sans, ogmant lefikasite ou bann retourn vizit, e esey kondwir bann letid Labib ki progrese? Eski ou kapab fer pionye asistan oubyen pionye ordiner oubyen servi kot i annan pli gran bezwen? Si ou en frer batize, eski ou kapab aspir pour kalifye konman en asistan ministeryel oubyen en ansyen? (1 Tim. 3:1, 10) Eski ou kapab elarzi ou minister par fer demann pour servis Betel, Lekol Formasyon Ministeryel, oubyen formasyon misyonner kot Lekol Gilead?—Lik 10:2.
4 En frer ki ti annan en travay aplentan e ki ti depans bokou letan dan bann aktivite sport ti ganny ankouraze pour vin en pionye ordiner. Pour konmanse i ti fer pionye asistan e apre i ti aziste son bann sitiasyon pour antre dan minister aplentan. Plitar i ti asiste Lekol Formasyon Ministeryel, sa lekol ti ede prepar li pour apre vin en sirveyan rezyonal. I vreman kontan ki i’n aksepte sa lankourazman ki i ti gannyen, e i konfidan ki i pli ere akoz son desizyon pour fer plis dan servis.
5 Zeova i beni sa bann ki fer zot disponib. (Iza. 6:8) Pa les nanryen anpes ou elarzi ou minister e an rezilta, rezwir pli gran satisfaksyon ek soulazman.