Konman pour prepar lentrodiksyon ki efikas
1. Akoz i enportan pour annan en lentrodiksyon ki efikas?
1 Zis parey en snak byen goute i donn lapeti pour sa pla ki swiv, en bon lentrodiksyon i fer li posib pour fer en diskisyon enteresan baze lo Labib. Bann lentrodiksyon efikas i kapab annan diferan longer ek konteni, me parey en bon manze zot bezwen ganny byen prepare. (Prov. 15:28) Kwa ki fer en lentrodiksyon efikas?
2. Ki mannyer nou kapab prepar en lentrodiksyon ki evey lentere?
2 Swazir bann topik ki evey lentere: Si nou lentrodiksyon pa evey lentere, sa met lakour i kapab pa ekoute. Alor, kan nou pe prepare, mazin lo sa ki pou enteres bann dimoun dan nou teritwar. Eski dimoun dan teritwar i enterese avek en bon gouvernman, en fanmir ere oubyen lafen avek lager? Souvandfwa dimoun i kontan donn zot prop lopinyon, alor i pou pli byen pour prepar bann kestyon ki pou fer zot donn zot pwennvi. Eski ou kapab servi enn sa bann prezantasyon dan Nou Minister Rwayonm e adapte li dan ou teritwar? Akoz ou pa tanzantan egzers bann lentrodiksyon dan ou Ladorasyon Fanmir?
3. Ki mannyer nou kapab adapte nou lentrodiksyon dapre kiltir ek larelizyon bann dimoun dan teritwar?
3 Pran kont kiltir ek larelizyon bann dimoun: Dan serten landrwa, nou bezwen dir sa dimoun deswit akoz nou pe vizit li. Me dan lezot landrwa, sa met lakour i konsider li konman en mank respe si ou pa montre ki ou enterese avek son byennet oubyen pa entrodwir ou lekor avan koz lo rezon ou vizit. Dan serten landrwa kot dimoun i relizye nou servi Labib dan nou lentrodiksyon. (Akt 2:14-17) Par kont, dan bann landrwa kot dimoun pa sorti dan larelizyon Kretyen oubyen ki napa en larelizyon, i kapab pli bon pour mansyonn Labib lo en retourn vizit olye lo premye vizit.—Akt 17:22-31.
4. Ki mannyer nou kapab prepar byen nou lentrodiksyon?
4 Nou lentrodiksyon: Prepar byen nou lentrodiksyon. I pli bon servi bann fraz kourt. Lafason ki nou prezant nou lentrodiksyon i osi enportan. Demontre lantouzyasm. Fer en pti sourir senser ki montre nou enterese avek sa met lakour. Par swiv sa bann sizesyon, sa pou ed nou prepar bann lentrodiksyon efikas ki pou ankouraz dimoun dan teritwar pour “partisip atab avek [“Zeova,” NW]”—1 Kor. 10:21.