I eksitan fason ki bann nouvo trak in ganny fer!
1. Ki keksoz pour predikasyon ki’n ganny fer dan en nouvo fason?
1 Senk nouvo trak ti ganny donnen dan lasanble distrik 2013 ki ti annan pour tit “Parol Bondye i laverite.” An plis, Nouvel Rwayonm No. 38, ki annan pour tit “Eski bann mor i vreman kapab viv ankor?” ti osi ganny azoute dan sa bann trak. Tou le sis sa bann trak in ganny fer dan en nouvo fason. Ki bann rezon par deryer sa nouvo prezantasyon? Kan nou pe ofer zot portanport, ki mannyer nou kapab byen servi sa bann trak?
2. Ki bi sa nouvo fason ki sa bann trak in ganny fer?
2 Akoz i’n ganny fer dan sa nouvo fason?: Prezantasyon efikas portanport i souvan enkli sa kat letap: (1) Demann en kestyon ki pou fer sa dimoun donn son pwennvi pour konmans en konversasyon. (2) Partaz en panse Labib. (3) Ofer piblikasyon pour sa dimoun lir. (4) Kit en kestyon pour reponn en lot fwa e fer laranzman pour retournen. Fason ki sa bann nouvo trak in ganny fer i fer li fasil pour nou swiv sa kat letap.
3. Ki mannyer nou kapab ofer enn parmi sa bann nouvo trak dan predikasyon?
3 Ki mannyer pour servi zot: (1) Apre ki ou’n dir bonzour, montre sa met lakour sa kestyon enteresan kot i pou bezwen swazir larepons korek devan sa trak e demann li son lopinyon. (2) Ouver sa trak e egzamin sa ki “Labib i dir.” Si i posib lir sa verse direkteman dan Labib. Si sa met lakour i annan letan, diskit “Ki sa i vedir pour ou.” (3) Ofer sa trak e ankouraz li pour lir sa larestan lenformasyon ler i annan letan. (4) Avan ou ale, montre li sa kestyon deryer sa trak ki annan pour tit “Pour reflesir lo la” e fer laranzman pour diskit lo sa ki Labib i dir en lot fwa.
4. Ki mannyer nou kapab servi sa bann nouvo trak lo en retourn vizit?
4 Retourn vizit osi i fasil. Senpleman servi sa bann verse Labib ki’n ganny site deryer sa trak pour reponn sa kestyon ki ou ti demande dan ou dernyen vizit. Avan ou ale, montre portre sa brosir Bon nouvel, montre sa met lakour sa brosir e sa leson ki donn plis lenformasyon lo size ki’n ganny diskite e ofer sa brosir. Si i aksepte, fer laranzman pour diskit lo sa brosir lo ou lot vizit. Ou’n konmans en letid Labib! Oubyen olye ofer sa brosir, ou kapab ofer en lot trak e fer laranzman pour retournen pour diskit avek sa met lakour.
5. Ki valer ki bann trak i annan dan predikasyon?
5 Bann trak in ganny servi dan predikasyon pour plis ki 130 an. Menm si zot bann groser ek prezantasyon i diferan, zot byen efikas dan predikasyon. Annou servi byen sa nouvo fason ki bann trak in ganny fer pour kontinyen partaz konnesans sorti dan Labib dan lemonn antye.—Prov. 15:7a.