Ki mannyer mon ete devan Zeova?
1. Ki mannyer Labib i parey en laglas?
1 Konbyen fwa ou get ou dan en laglas? Bokou nou i fer sa tou le zour akoz i ed nou pour vwar serten laspe dan nou laparans ki bezwen ganny aranze. Labib i ganny konpare avek en laglas. Lir Parol Bondye i ed nou pour vwar sa ki nou ete anndan, sa ki Zeova i vwar. (1 Sam. 16:7; Zak 1:22-24) Parol Bondye i kapab “desifre tou dezir ek sekre leker imen.” (Ebr. 4:12) Ki mannyer lir e reflesir lo sa ki nou lir dan Labib tou le zour i kapab ed nou pour vwar kote nou devret aranze pour nou vin en predikater pli efikas?—Ps. 1:1-3.
2. Ki mannyer Labib i ed nou pour egzamin nou lekor?
2 Servi Labib parey en laglas: Bann resi dan Labib ki koz lo bann serviter fidel Zeova, i montre nou bann kalite ki zoli dan lizye Zeova. Par egzanp, David ti demontre bokou devouman pour non Bondye. (1 Sam. 17:45, 46) Izai ti demontre kouraz par volonterman al pres dan bann landrwa difisil. (Iza. 6:8, 9) Zezi ti telman kontan son Papa dan lesyel ki i ti vwar son minister konman en keksoz ki redonn li lafors ek satisfaksyon olye en fardo. (Zan 4:34) Bann premye Kretyen ti pres avek devouman, depan bokou lo Zeova e zot ti determinen pour pa arete. (Akt 5:41, 42; 2 Kor. 4:1; 2 Tim. 4:17) Ler nou reflesir lo sa bann legzanp, i ed nou pour egzamin nou lekor avek bi pour amelyor kalite servis nou pe donn Zeova.
3. Akoz nou bezwen fer bann sanzman la konmela olye anvoy pour pli tar?
3 Azir pour koriz nou bann defo: Byensir, i pa vo lapenn get dan laglas e apre pa fatig nou avek sa defo ki nou vwar. Nou kapab demann Zeova pour ed nou vwar nou lekor parey nou vreman ete e apre ed nou fer bann sanzman neseser. (Ps. 139:23, 24; Lik 11:13) Vi ki letan i kourt e lavi dimoun i an danze, nou bezwen fer bann sanzman neseser la konmela menm olye anvoy pour pli tar.—1 Kor. 7:29; 1 Tim. 4:16.
4. Ki arive avek en dimoun ki egzamin byen Parol Bondye e apre sa met an pratik sa ki i’n aprann?
4 Sa ki en dimoun i ete anndan se sa ki Zeova i gete e i pli enportan ki laparans sa dimoun. (1 Pyer 3:3, 4) Ki arive avek en dimoun ki egzamin byen Parol Bondye e apre sa met an pratik sa ki i’n aprann? Sa “ki pa zis ekoute pour oubliye apre, me ki met an pratik, Bondye pou beni li dan tou son laktivite.” (Zak 1:25) Wi, nou pou bann predikater efikas ki ere akoz nou “reflekte laglwar Zeova parey en laglas.”—2 Kor. 3:18, NW.