Bann nouvo kantik pour ladorasyon!
1 Pandan sa dernyen renyon anyel ki Watch Tower Bible and Tract Society of Pennsylvania ti fer Sanmdi le 4 Oktob 2014, en lanons ti ganny fer pour reviz nou liv kantik. Sa ti vreman en gran nouvel! Tou sa ki ti la prezan ti ganny rapel ki nou bann kantik Rwayonm i annan en plas enportan dan nou ladorasyon.—Ps. 96:2.
2 Ou kapab demande, ‘Akoz i neseser pour reviz nou liv kantik?’ I annan plizyer rezon. Premyerman, nou konprenezon lo bann verse Labib i pe kontinyen amelyore e sa i kapab annan en lefe lo parol bann kantik. (Prov. 4:18) En lot rezon pour sa revizyon se ki plizyer lekspresyon ek fraz ki’n ganny servi dan liv kantik ti ganny tire dan sa vye edisyon New World Translation. Sa bann parol i bezwen ganny aziste dapre nouvo edisyon Labib. Lefet ki i demann bokou travay pour aziste sa bann parol, alor i’n ganny deside ki detrwa nouvo kantik pou ganny azoute dan sa liv.
3 Eski nou pou bezwen espere ziska ki nouvo liv kantik i ganny enprimen avan ki nou kapab sant sa bann kantik? Non. Nou kontan pour enform ou, ki pandan sa bann prosen mwan, detrwa nouvo kantik pou ganny mete lo nou sit Enternet jw.org. Kan en nouvo kantik i sorti, i pou ganny mete a lafen progranm pour Renyon Servis avek sa not “nouvo kantik.”
4 Ki mannyer pour aprann sa bann nouvo kantik: I pa fasil pour aprann en nouvo kantik. Kantmenm sa, parey sa psalmis, nou anvi sant avek tou nou leker dan bann renyon kongregasyon e “pa gard silans.” (Ps. 30:12) Pour aprann en nouvo kantik, swiv sa bann metod senp.
Ekout plizyer fwa lanrezistreman piano sa kantik ki pou ganny mete lo sit Enternet. Pli ou ekout byen sa bann kantik, pli i pou fasil pour ou mazinen.
Etidye sa bann parol e esey rapel zot.
Zwe sa kantik e sante ansanm. Fer sa ziska ler ou kapab sant sa kantik byen.
Pandan ou Ladorasyon Fanmir ou kapab sant sa bann nouvo kantik detrwa fwa ziska ki ou fanmir i kapab sant zot byen.
5 Dan bann prosen mwan kan en nouvo kantik i ganny mete a lafen progranm Renyon Servis, kongregasyon pou dabor ekout son lanrezistreman piano. Apre sa, lodyans pou sant sa kantik ansanm avek lanrezistreman piano, parey ki nou fer avek lezot kantik.
6 Mazinen ki ler nou sante pandan nou bann renyon nou ganny lazwa pour sant ansanm konman en fanmir ini ki loue Zeova. Alor, ler bann kantik i ganny anonse nou pa devret annan sa move labitid pour sorti dan nou plas si pa neseser.
7 I annan en lot fason ki nou kapab montre lapresyasyon pour nou bann kantik. Pandan bann lasanble, lanmizik i ganny zwe avan ki sak sesyon i konmanse. De fwa par an, bann frer ek ser ki devoue partou dan lemonn i fer zot prop depans pour al Patterson, New York, zis pour rekord sa bann zoli lanmizik ki nou servi dan nou ladorasyon. Alor, kan tyermenn i envit nou pour pran nou plas e ekout sa bann lanmizik ki ganny zwe, nou devret fer li. Sa i pou ed nou prepar nou leker pour sa bann lenformasyon ki pou swiv.—Ezra 7:10.
8 Nou pou konklir nou renyon ozordi avek en nouvo kantik ki annan pour tit “The Kingdom Is in Place—Let It Come!” Sa kantik ki’n ganny anonse tou resaman dan sa renyon anyel, i’n ganny fer espesyalman pour mark sa 100 an ki Rwayonm in ganny etablir.
9 Byensir sa bann nouvo kantik i “bann bon keksoz” ki sorti kot Zeova. (Mat. 12:35a) Annou determinen pour aprann sa bann nouvo kantik e sant zot avek tou nou leker, donn nou Bondye sa louanz ek loner ki i merite!—Ps. 147:1.