Aprann avek bann proklanmater ki annan plis leksperyans

Nou vreman apresye bann proklanmater eksperyanse dan kongregasyon. Serten in servi fidelman Zeova pour plizyer lannen. Lezot in vin pli kalipa resaman. Sa bann proklanmater in vwar konman Zezi in diriz kongregasyon Kretyen dan sa bann dernyen zour, par ogmantasyon ki’n arive dan travay predikasyon e fer disip. (Mat. 28:19, 20) Par partisip dan sa travay predikasyon zot in resevwar “sa pisans ki napa son parey” ler zot pe fer fas avek bann difikilte ek leprev personnel. (2 Kor. 4:7) Nou kapab aprann bokou avek sa bann proklanmater eksperyanse. Ler zot ganny sa loportinite, zot vreman kontan pour ansenny lezot sa ki zot in aprann. (Ps. 71:18) Alor, nou bezwen rod bann loportinite pour aprann avek zot. Ki mannyer nou kapab fer sa?

Dan Predikasyon. Pour ganny bann bon rezilta dan predikasyon, bann nouvo proklanmater ek bann ki napa bokou leksperyans i bezwen ganny formen. Nou kapab aprann bokou par obzerv ki mannyer bann proklanmater eksperyanse i prese. (Vwar sa lartik dan Latour Veyer le 15 Fevriye 2015 “Gard ou devouman dan predikasyon,” trwazyenm paragraf anba soutit “Ed bann ki annan mwens leksperyans.”) Ki mannyer ou kapab benefisye par travay avek zot dan predikasyon?

Eski ou kapab demann en proklanmater eksperyanse pour travay avek ou dan predikasyon? Si sa proklanmater i annan dezabilite, tanzantan ou kapab kondwir enn ou letid Labib kot li. A lafen demann sa proklanmater son lopinyon lo lafason ki ou’n kondwir letid.

Pas en pe letan avek zot: Aprann konn bann proklanmater eksperyanse par pas plis letan avek zot. Envit enn ant zot pour asiste ou Ladorasyon Fanmir e demann zot enn de kestyon. Si sa proklanmater i annan dezabilite, eski ou kapab aranze pour al fer Ladorasyon Fanmir kot li? Demann li ki mannyer i’n vin dan laverite? Ki bann benediksyon i’n gannyen? Ki bann progre i’n vwar arive? Ki lazwa i’n gannyen dan son servis pour Zeova?

Pa ekspekte tro bokou avek sa bann proklanmater. Parey nou tou, sa bann proklanmater eksperyanse i annan diferan abilite dan predikasyon. (Rom. 12:6-8) Serten i pli aze alor sa i kapab diminyen lakantite letan ki zot pas avek nou. Toudmenm, nou kapab aprann bokou avek zot akoz zot annan en kantite leksperyans dan zot servis fidel avek Zeova.