“Sa bann Parol . . . i bezwen dan ou leker”

Bann paran i parey bann berze. Zot bezwen byen okip zot zanfan ki kapab fasilman elwannyen e ganny ekspoze avek bann latak sa lemonn. (Prov. 27:23) Ki mannyer bann paran i kapab desarz sa responsabilite? Zot bezwen pas letan toulezour pour kominik avek zot zanfan pour arive konnen ki pe pase dan zot lespri ek leker. (Prov. 20:5) Bann paran i devret osi batir lafwa zot zanfan avek bann materyo ki reziste dife. (1 Kor. 3:10-15) Sa video “Sa bann Parol . . . i bezwen dan ou leker” i montre lenportans pour fer Ladorasyon Fanmir regilyerman. Get li ansanm konman en fanmir e apre diskit lo sa bann kestyon ki swiv.

(1) Kwa ki’n fer lafanmir Romain aret konsantre lo bann keksoz spirityel? (2) Akoz ki Frer Romain pa’n reisi dan son premye lesey pour fer Ladorasyon Fanmir? (3) Ki prensip Labib ki kapab fer ou pli byen reisi elve ou zanfan? (Det. 6:6, 7) (4) Kwa ki kapab kontribye pour amelyor kominikasyon dan fanmir? (5) Ki bann sakrifis zanfan i bezwen de la par zot paran? (6) Ki mannyer Frer ek Ser Barreau ti annan en bon lenfliyans lo lafanmir Romain? (Prov. 27:17) (7) Ki preparasyon en sef fanmir i bezwen fer davans pour ki Ladorasyon Fanmir i atenn son lobzektif? (8) Ki Frer Romain ti fer pour aranz sityasyon son fanmir? (9) Akoz i enportan pour annan en bon Ladorasyon Fanmir regilyerman? (Efe. 6:4) (10) Ki bann nide pratik dan san video ki pou ede annan en bon Ladorasyon Fanmir? (11) Ki mannyer Frer Romain ti reste kalm me ferm kan i ti pe ed Marcus pour vwar lenportans fer sa ki byen? (Zer. 17:9) (12) Ki mannyer Frer ek Ser Romain ti met en rezon avek Rebecca pour ed li fer sa bon desizyon an rapor avek son relasyon ek Justin? (Mark 12:30; 2 Tim. 2:22) (13) Ki mannyer Frer ek Ser Romain ti demontre lafwa ler zot ti pe fer bann azisteman dan zot lavi? (Mat. 6:33) (14) Ki mannyer sa video i met lanfaz lo sa nesesite pour bann sef fanmir pran swen avek bezwen spirityel zot fanmir? (1 Tim. 5:8) (15) Konman en sef fanmir, ki ou determinen pour fer?

RAPEL POUR BANN SEF FANMIR: Sa dram modern ti ganny prezante dan lasanble rezyonal an 2011. Sa letan, eski ou ti vwar sa nesesite pour amelyor ou Ladorasyon Fanmir? Be aprezan? Si ou bezwen fer lezot azisteman, priy lo la pour arive fer bann sanzman ki pou benefisye ou fanmir pour touzour.​—Efe. 5:15-17.