1921—San-t-an pase

LATOUR Veyer le 1 Zanvye 1921 ti demann bann Etidyan Labib sa kestyon: “Ki travay ki nou kapab fer sa lannen?” Apre sa Latour Veyer ti sit Izai 61:1, 2 (NWT) ki ti fer bann Etidyan Labib rapel ki zot ti annan sa travay pour anons sa bon nouvel. Sa verse i dir: “Zeova in swazir mwan pour anons bon nouvel avek bann ki annan limilite . . . , pour anons sa letan kot Zeova i demontre pitye. Sa letan kot nou Bondye pou revanze kont son lennmi.”

BANN PROKLANMATER KI TI ANNAN KOURAZ

Pour bann proklanmater kapab anons sa bon nouvel, zot ti pou bezwen demontre kouraz. Zot ti pou bezwen anons “bon nouvel avek bann ki annan limilite” me osi anons konsernan sa ‘letan kot Bondye pou revanze kont son lennmi.’

Frer J. H. Hoskin, ki ti reste Kanada ti anons sa bon nouvel avek kouraz malgre dimoun ti opoz sa travay. Prentan 1921, i ti zwenn en paster. Frer Hoskin ti konmans sa konversasyon par dir: “Nou devret annan en bon konversasyon konsernan Labib. Menm si nou pa dakor lo serten keksoz, nou kapab fini nou konversasyon lo en bon not.” Me sa pa ti arive. Frer Hoskin i dir: “Nou ti’n koz pour zis detrwa minit ler sa paster ti bis laport sitan for ki mon ti krwar ki vit dan sa laport ti pou kase.”

Sa paster ti dir: “Akoz ou pa al koz avek bann dimoun ki pa Kretyen?” Frer Hoskin pa ti reponn li me anmezir ki i ti ale, i ti dir dan li menm, ‘Mon ti krwar mon pe koz avek enn, mwan!’

Lannmen, ler sa paster ti fer son sermon dan legliz, i ti dir bann move keksoz lo Frer Hoskin. Frer Hoskin ti dir: “I ti dir bann dimoun ki mon ti sa pli gran manter ki’n deza vin dan sa lavil e ki mon devret ganny touye.” Me sa pa ti anpes Frer Hoskin kontinyen fer sa travay predikasyon e i ti koz avek bokou dimoun. I ti dir: “Mon ti vreman kontan fer predikasyon laba. Serten dimoun ti menm dir: ‘Mon konnen ki ou pe fer travay Bondye.’ Zot ti osi ofer pour donn mwan bann keksoz ki mon ti bezwen.”

LETID PERSONNEL EK LADORASYON FANMIR

Pour ed dimoun konn Labib pli byen, bann Etidyan Labib ti pibliy bann progranm pour etidye Labib dan The Golden Age.a I ti annan en progranm ki ti apel The Juvenile Bible Study program ki ti enkli bann kestyon ki paran ti kapab diskite avek zot zanfan. Bann paran ti pou demann zot zanfan sa bann kestyon e ed zot trouv larepons dan Labib. Serten kestyon parey “Konbyen liv i annan dan Labib?,” ti ansenny bann keksoz de baz konsernan Labib. I ti annan lezot kestyon parey “Eski tou vre Kretyen pou ganny persekite?,” ki ti ed bann zenn pour vin bann proklanmater ki annan kouraz.

I ti annan en lot progranm ki ti apel Advanced Studies in the Divine Plan of the Ages ki ti enkli bann kestyon pour bann dimoun ki ti annan plis konnesans lo Labib. Zot ti kapab trouv larepons dan premye liv Studies in the Scriptures. Bann lekter ti aprann bokou keksoz avek sa bann progranm. Me The Golden Age le 21 Desanm 1921 ti anonse ki zot ti pou nepli pibliy sa bann progranm. Akoz zot ti’n pran sa desizyon?

EN NOUVO LIV!

Sa liv *The Harp of God*

En pti kart ki ti dir ki paz pour lir dan liv *The Harp of God*

Bann kart ki ti annan kestyon lo la

Bann frer ki ti pe diriz sa travay predikasyon ti realize ki bann dimoun ti bezwen aprann konsernan Labib dan en fason pli organize. Alor an Novanm 1921, zot ti pibliy sa liv The Harp of God. Bann ki ti aksepte sa liv ti osi kapab zwenn The Harp Bible Study Course. Sa ti en letid ki zot ti kapab fer lo zot menm e zot ti aprann konsernan plan Bondye pour fer imen viv pour touzour. Me ki mannyer zot ti fer sa letid?

Ler en dimoun ti aksepte en kopi sa liv, i ti ganny en pti kart ki ti dir li ki paz pour lir dan sa liv. Son semenn answit, i ti ganny en lot kart ki ti annan bann kestyon konsernan sa ki i ti’n lir. Sa kart ti osi dir li ki paz pour lir son semenn apre.

Tou le semenn, sa etidyan ti ganny en nouvo kart par lapos sorti kot sa kongregasyon ki ti pros avek li. Sa ti ale pour 12 semenn. Souvandfwa, sa bann kart ti ganny anvoye par bann frer ek ser aze ouswa bann ki pa ti kapab al kazankaz. Par egzanp, en ser ki apel Anna K. Gardner, ki sorti Millvale, Pennsylvania, Leta-z-ini, i dir: “Ler The Harp of God ti ganny pibliye, sa ti donn mon ser Thayle plis travay pour fer. Thayle ti ganny difikilte pour marse alor i ti kapab anvoy sa bann kart kestyon tou le semenn.” Ler sa dimoun ti fini sa letid, en dimoun dan kongregasyon ti vizit li pour ed li aprann plis konsernan Labib.

SA TRAVAY KI NOU TI POU FER

A lafen lannen 1921, Frer J. F. Rutherford ti anvoy en let pour tou kongregasyon. I ti dir ki an 1921 bokou plis dimoun ti’n ganny en temwannyaz konsernan Rwayonm e ki sa mesaz ti’n ed bokou plis dimoun ki bann lannen avan. Apre i ti dir: “I ankor annan en kantite travay pour fer. Annou ankouraz lezot pour vin fer sa travay merveye.” I kler ki bann Etidyan Labib ti ekout son konsey. An 1922, zot ti demontre kouraz e anons sa mesaz Rwayonm bokou plis ki avan.

Bann zanmi ki annan kouraz

Bann Etidyan Labib ti demontre lanmour par ed kanmarad. Parey nou pou vwar, zot ti bann zanmi ki annan kouraz “ki [ti] la dan letan maler.”—Prov. 17:17, NWT.

Mardi le 31 Me 1921, en zonm nwanr dan lavil Tulsa (Oklahoma, Leta-z-ini) ti ganny met dan kaso akoz i ti’n ganny akize konmkwa in atak en madanm blan. Apre sa, plis ki 1,000 zonm blan ti lager avek en pti group zonm nwanr. I pa ti pran bokou letan pour zot konmans lager dan en landrwa ki apel Greenwood kot laplipar dimoun ki ti reste laba ti nwanr. Bann dimoun ti vol e bril plis ki 1,400 lakaz ek biznes. Dapre bann rapor, 36 dimoun ti mor me i kapab ki plizyer santenn dimoun ti mor. Sa ki ti arive ti pli tar ganny apele Tulsa Race Massacre.

En frer nwanr ki apel Richard J. Hill ti en Etidyan Labib e i ti reste Greenwood. Frer Hill i dir ki ti arive sa zour: “Sa zour swar, nou ti annan renyon kongregasyon parey labitid. Apre ki renyon ti’n fini, nou ti tann tapaz fizi dan sant lavil Tulsa. Ler nou ti al dormi, nou ti ankor pe tann sa bann tapaz.” Son lannmen le 1 Zen, keksoz ti’n vin pli grav. Frer Hill i dir: “Serten dimoun ti dir ki si nou ti anvi ganny proteze, nou ti bezwen al Convention Hall deswit.” Alor Frer Hill ansanm avek son madanm ek son senk zanfan ti al Convention Hall. Laba, i ti annan apepre 3,000 zonm ek madanm nwanr ki ti pe ganny proteze par larme ki gouvernman ti’n anvoye pour aret sa lager.

Pandan sa menm letan, Frer Arthur Claus, ki ti en frer blan ti fer en desizyon ki ti montre ki i ti annan kouraz. I dir: “Ler mon ti tande ki dimoun pe vole e bril bann lakaz Greenwood, mon ti deside pour al laba e pour al vwar ki mannyer mon bon zanmi Frer Hill ti ete.”

Arthur Claus ti servi The Harp of God pour ansenny en laklas ki ti annan 14 zanfan

Ler Arthur ti ariv kot lakour Frer Hill, i ti zwenn vwazen Frer Hill. Sa msye ti blan e i ti annan en fizi. I ti enn zanmi Frer Hill e i ti krwar ki Arthur ti pe vin vole. I ti dir: “Akoz ou’n vin la?”

Arthur i dir: “Si mon pa ti’n donn li en bon leksplikasyon, sa msye ti pou’n fiziye mwan. Mon ti dir li ki mon ti zanmi avek Frer Hill e ki mon ti’n vin kot li plizyer fwa.” Apre sa, Arthur ansanm avek sa vwazen ti anpes bann dimoun vin vole kot Frer Hill.

Pa bokou letan apre, Arthur ti tande ki Frer Hill ek son fanmir ti kot Convention Hall. Arthur ti ganny dir ki okenn dimoun nwanr pa ti kapab kit sa landrwa san ganny permisyon an ekri par Zeneral Barrett, sa zofisye ki ti ansarz. Arthur i dir: “I ti vreman difisil pour mwan ganny loportinite pour koz avek sa zeneral. Ler mon ti dir li ki mon ti anvi tir lafanmir Hill dan Convention Hall, i ti deman mwan: ‘Eski ou pou pran swen avek sa fanmir e donn zot sa ki zot bezwen?’ Avek plezir, mon ti dir wi.”

Apre ki Arthur ti’n ganny permisyon, i ti degaze pour al Convention Hall. I ti donn en zofisye sa permisyon e sa zofisye ti dir: “Zeneral ki’n siny sa! Eski ou konnen ki ou premye dimoun ozordi pour tir en dimoun isi?” I pa ti pran bokou letan pour Arthur ek sa zofisye trouv Frer Hill ek son fanmir. Frer Hill ek son fanmir ti antre dan loto Arthur e zot ti al kot li.

Frer Claus ti fer sir ki Frer Hill ek son fanmir ti sen e sof. Ler lezot dimoun ti vwar lafason ki Frer Claus ti demontre kouraz ek lanmour, zot ti enpresyonnen. Arthur i dir: “Apre sa, sa vwazen ki ti ede pour protez propriyete lafanmir Hill ti annan plis respe pour Temwen Zeova. En kantite dimoun ti anvi konn laverite ki dan Labib parski zot ti vwar ki pep Bondye pa ti rasis e ki parmi pep Bondye personn pa ti krwar ki zot pli meyer ki lezot.”

a The Golden Age ti ganny apele Consolation an 1937 e Awake! an 1946.