1922—San-t-an pase

“EN BON NIDE”

Anmezir ki lakantite proklanmater ti ogmante, zot ti bezwen plis piblikasyon. Bann frer dan Betel Brooklyn ti pe deza prodwir bann magazin me zot ti ankor pe servi bann lakonpannyen pour enprim bann liv. Me apre sa, pour plizyer mwan sa lakonpannyen pa ti kapab enprim ase liv pour predikasyon. Alor, Frer Rutherford ti demann Frer Robert Martin, ki responsab pour lenprimri dan Betel, si i krwar ki zot pou kapab enprim bann liv osi.

Frer Martin ti dir: “Sa ti en bon nide parski i ti vedir ki nou ti pou kapab ouver en lot lenprimri ki kapab prodwir bann liv.” Bann frer ti lwe en landrwa Brooklyn ki ti lo 18 Concord Street e zot ti rod bann lekipman neseser.

Me pa tou dimoun ki ti kontan ki bann frer ti pou kapab enprim zot prop liv. Ler prezidan en lakonpannyen ki ti pe enprim nou bann liv ti vizit sa nouvo lenprimri, i ti dir: “Zot annan bann bon lekipman pour enprim liv me zot napa personn ki konn servi sa bann lekipman. Dan sis mwan, zot pou’n fini kas tou sa bann lekipman.”

Frer Martin ti dir: “Sa ki i ti dir ti fer sans me nou konnen ki Zeova ti pou ed nou e sanmenm ki i ti fer.” Frer Martin ti annan rezon. I pa ti pran bokou letan pour sa nouvo lenprimri konmans enprim 2,000 liv par zour.

PLIZYER MILYE DIMOUN TI GANNY TEMWANNYAZ PAR RADYO

Apard ki enprim serten zot bann liv, pep Zeova ti konmans servi en nouvo metod pour anons sa bon nouvel. Sa i atraver bann progranm lo radyo. Dimans apremidi le 26 Fevriye 1922, Frer Rutherford ti koze lo radyo pour premye fwa. I ti fer en diskour ki ti annan pour tit “Millions Now Living Will Never Die” (Plizyer milyon ki pe viv konmela pa pou zanmen mor), lo stasyon radyo KOG ki ti Los Angeles, California, Leta-z-ni.

Apepre 25,000 dimoun ti tann sa progranm. Serten ti ekri bann let pour remersye Frer Rutherford pour sa progranm. Enn sa bann let ti sorti kot Willard Ashford ki ti reste Santa Ana, California. Sa msye ti remersye Frer Rutherford pour son prezantasyon ki ti “enteresan.” I ti osi dir: “Kot mwan i annan trwa dimoun ki malad e ki pa kapab kit lakaz. Alor menm si ou ti fer ou diskour dan en landrwa ki pros avek nou, nou pa ti pou kapab vin ekout ou.”

Dan bann semenn ki ti swiv, i ti annan lezot progranm lo radyo. Ver lafen lannen 1922, The Watch Tower ti estimen ki “apepre 300,000 dimoun ti’n ganny en temwannyaz par radyo.”

Bann let ek bann komanter ti ankouraz bann Etidyan Labib e zot ti deside pour konstri en stasyon radyo lo en propriyete Staten Island, ki pa ti tro lwen avek Betel Brooklyn. Dan bann lannen ki ti swiv, bann Etidyan Labib ti pou servi sa stasyon ki apel WBBR, pour anons sa mesaz Rwayonm avek bokou plis dimoun e dan bokou plis landrwa.

“ADV”

Latour Veyer le 15 Zen 1922 ti anonse ki en lasanble ti pou ganny fer Cedar Point, Ohio depi le 5 ziska le 13 Septanm 1922. Bann Etidyan Labib ti vreman eksite ler zot ti ariv Cedar Point.

Dan son premye diskour, Frer Rutherford ti dir lodyans: “Mon asire ki Senyer pou . . . beni sa lasanble e i pou fer sir ki en pli gran temwannyaz i ganny donnen lo later antye.” Bann lezot frer ki ti fer diskour ti ankouraz bann frer ek ser pour anons sa bon nouvel.

Son Vandredi le 8 Septanm i ti annan apepre 8,000 dimoun dan lasal pour vin ekout diskour Frer Rutherford. Zot ti pe swete ki Frer Rutherford ti pou eksplik zot ki sinifikasyon “ADV,” ki ti’n ganny ekrir lo zot lenvitasyon. Ler zot ti asize, en kantite zot ti vwar en gran canvas ki ti’n roule par lao lestrad. Arthur Claus ki ti sorti Tulsa, Oklahoma, Leta-z-ini, ti rod en landrwa asize kot i ti pou kapab tann diskour byen. Sa ti vreman difisil parski sa letan i ti napa mikro oubyen spiker pour fer son vin pli for.

Tyermenn ti dir ki zot pa ti pou les bann ki vin tar antre dan lasal pandan diskour Frer Rutherford pour ki zot pa enteronp sa diskour. Frer Rutherford ti konmans son diskour 9:30 bomaten par sit sa ki Zezi ti dir dan Matye 4:17 ki dir: “Rwayonm lesyel in aprose.” Ler i ti koz konsernan ki mannyer bann dimoun ti pou tann sa mesaz Rwayonm, i ti dir: “Zezi ti dir ki ler i pou la i pou fer en rekolt parmi son pep e i pou rasanble bann ki fidel.”

Frer Claus ki ti pe asiz dan lasal prensipal i dir: “Nou ti pe ekout tou sa ki ti pe ganny dir atantivman.” Me en sel kou i pa ti santi li byen e i ti kit lasal. Arthur pa ti oule kit lasal parski i ti konnen ki i pa ti pou ganny drwa antre anndan ankor pandan diskour Frer Rutherford.

Apre detrwa minit, i ti konmans santi li pli byen. I ti dir ki anmezir ki i ti pe retourn kot lasal, i ti tann en gro laplodisman. Sa ti fer li vreman eksite! I ti deside ki si i ti bezwen mont lo twatir pour tann larestan sa diskour, i ti pou fer li. Frer Claus ki ti annan zis 23 an sa letan, ti reisi grenpe ziska lo twatir sa batiman. Bann lafnet ti ouver e i ti dir ki ler i ti vin pli pros, i ti kapab tann sa diskour byen.

Me Arthur pa ti tousel. Serten son bann zanmi ti lo twatir, zot osi. Enn parmi zot ti apel Frank Johnson. I ti vin kot Arthur e demann li: “Ou annan en kannif avek ou?”

Arthur ti dir: “Wi, mon annan.”

Frank ti reponn: “Nou ti pe priye pour trouv en dimoun ki annan en kannif. Eski ou vwar sa gro canvas ki’n roule? I en lansenny ki’n ganny anmare avek sa bann klou. Ekout byen sa ki Ziz i dir.a Ler i dir, ‘e ou bezwen anonse, anonse,’ koup sa kat lakord.”

Arthur ti tir son kannif e ansanm avek son bann zanmi zot ti esper Frer Rutherford dir sa parol ki ti pou endik zot kan pou koup lakord. Pa bokou letan apre, Frer Rutherford ti ariv lo sa parti pli enportan dan son diskour. Frer Rutherford ki ti en dimoun devoue, ti vreman eksite e i tre probab ki i ti koz for ler i ti dir: “Vin en temwen fidel e vre pour Senyer. Kontinyen dan sa lager ziska ki Gran Babilonn i ganny konpletman detrir. Pres sa mesaz partou kote. Lemonn i devret konnen ki Zeova i Bondye e ki Zezi Kri i Lerwa bann lerwa e Senyer bann senyer. Sa i en gran zour. Gete, nou Lerwa pe dirize! Zot zot sa bann ki i pe servi pour anons sa mesaz. Alor anonse, anonse, anonse konsernan sa Lerwa ek son Rwayonm!”

Arthur i dir ki li ansanm avek son bann zanmi ti koup bann lakord e sa lansenny ti deroule. Lo sa lansenny ti’n ganny ekrir: “Advertise the King and Kingdom” (Anonse konsernan sa Lerwa ek son Rwayonm). Sa ki ti’n ekri ti sinifikasyon “ADV.”

EN TRAVAY ENPORTAN

Sa lasanble ki ti ganny fer Cedar Point ti ed bann frer ek ser pour konsantre lo sa travay enportan pour anons sa mesaz Rwayonm e bann ki ti pare pour fer sa, ti kontan pour partisip dan sa travay predikasyon. En colporteur (ki konmela i apel pionye) ki sorti Oklahoma, Leta-z-ini ti ekri: “Nou ti fer predikasyon dan en landrwa kot en kantite dimoun ti travay dan bann min sarbon e zot ti vreman pov.” I ti dir ki souvandfwa ler dimoun ti tann sa mesaz ki dan magazin Golden Age zot ti plere. I ti osi dir: “Nou vreman kontan ki nou kapab rekonfort zot.”

Sa bann Etidyan Labib ti konnen ki sa ki Zezi ti dir dan Lik 10:2 ti vreman enportan. Zezi ti dir: “Rekolt i gran, me i annan en ptigin travayer.” Anmezir ki lannen ti fini, bann Etidyan Labib ti pli determinen ki avan pour anons mesaz Rwayonm partou.