KI MANNYER NOU KAPAB SIRMONT LAENN

4 | Ranport laviktwar lo laenn avek led Bondye

Sa ki Labib i dir:

“Fri lespri sen se lanmour, lazwa, lape, pasyans, labonte, fer sa ki byen, lafwa, ladouser, kontrol lo son lekor.”—GALAT 5:22, 23.

Ki i vedir:

Avek led Bondye i posib pour sirmont laenn. Son lespri sen i kapab ed nou pour annan bann kalite ki nou pa ti pou zanmen kapab annan lo nou menm. Olye esey sirmont laenn lo nou menm, i pou byen si nou depan lo led ki Bondye i donn nou. Si nou fer sa, nou pou santi parey zapot Pol ti santi ler i ti ekri: “Parski dan tou sirkonstans, mon annan lafors gras a sa enn ki donn mwan son pwisans.” (Filipyen 4:13) Nou pou kapab dir: “Mon sekour i sorti kot Zeova.”—Psonm 121:2.

Sa ki ou kapab fer:

“Zeova in transform mwan, sorti en zonm vyolan pour vin en zonm anpe.”—WALDO

Priy Zeova senserman pour demann li son lespri sen. (Lik 11:13) Demann li pour ed ou annan bann bon kalite. Etidye sa ki Labib i dir konsernan bann kalite ki pou ed ou retir laenn tel parey lanmour, lape, pasyans ek kontrol lo ou lekor. Rod fason pour devlop sa bann kalite dan ou lavi. Apre fer zanmi avek bann dimoun ki pe esey devlop sa bann kalite. Sa bann zanmi i kapab “motiv [ou] pour demontre lanmour e fer bann bon aksyon.”—Ebre 10:24; not.

En leksperyans—WALDO

I ti ranport laviktwar lo laenn e i ti aret vyolan

Ler Waldo ti pe grandi, son lavi ti vreman difisil e sa ti fer li ranpli avek laenn. I dir: “Mon ti souvan enplike dan bann lager lo semen avek bann trafiker drog . . . En zour, en lot geng ti anvoy en kriminel profesyonnel pour touy mwan, me mon ti reisi sove, selman i ti arive pik mwan en fwa.”

Waldo pa ti kontan ler son madanm ti konmans etidye Labib avek Temwen Zeova. I dir: “Mon ti ay sa bann Temwen e en kantite fwa mon ti zour zot. Me zot ti toultan reponn zantiman.”

Apre en serten letan, Waldo ti osi konmans etidye Labib. I dir: “I pa ti fasil pour aplik sa ki mon ti aprann. Mon ti konvenki ki mon pa ti pou zanmen kapab kontrol mon move tanperaman.” Me en keksoz ki i ti aprann dan Labib ti fer en gran diferans dan son lavi.

Waldo i dir: “En zour, Alejandro, sa frer ki ti fer mwan letid ti demann mwan pour lir Galat 5:22, 23. . . . Alejandro ti eksplik mwan ki mon pa ti pou kapab devlop sa bann kalite lo mwan menm, me ki mon ti pou bezwen depan lo lespri sen Bondye. Sa ti sanz mon pwennvi konpletman!”

Waldo ti reisi sirmont laenn akoz i ti les Bondye ed li. I dir: “Mon fanmir ek vye zanmi pa oule krwar sa kantite ki mon’n sanze.” I osi dir: “Zeova in transform mwan, sorti en zonm vyolan pour vin en zonm anpe.”