Kestyon lekter

Akoz Zozef ek Mari ti reste Betleenm olye retourn Nazaret apre ki Zezi ti ne?

Labib pa dir nanryen lo la. Me Labib i donn serten detay enteresan ki kapab eksplike akoz zot ti swazir pour pa retourn Nazaret sa letan.

En lanz ti dir Mari ki i ti pou tonm ansent e ki i ti pou ganny en zanfan. Ler sa lanz ti dir Mari sa mesaz, Mari ek Zozef ti pe reste dan lavil Nazaret. Nazaret ti en lavil Galile, sa landrwa kot Zozef ti’n grandi. (Lik 1:26-31; 2:4) Pli tar, ler zot ti sorti Lezip zot ti al reste Nazaret. Zezi ti grandi laba e i ti ganny apele en Nazareen. (Mat. 2:19-23) I pour sa rezon ki ler nou mansyonn Zezi, Zozef ek Mari, nou mazin lavil Nazaret.

En madanm ki ti apel Elizabet e ki ti reste Zida, ti trouv fanmir avek Mari. Elizabet ti madanm en pret ki ti apel Zekarya e i ti manman Zan ki batize. (Lik 1:5, 9, 13, 36) Mari ti al vizit Elizabet e i ti reste trwa mwan Zida. Apre i ti retourn Nazaret. (Lik 1:39, 40, 56) I pour sa rezon ki Mari ti konn byen rezyon Zida.

Pli tar, Zozef ti obei lord konmkwa tou dimoun i devret “al anrezistre.” Alor Zozef ti vwayaze sorti Nazaret ziska Betleenm, ki ti “lavil David” e ki ti landrwa kot Labib ti’n profetize Mesi ti pou ne. (Lik 2:3, 4; 1 Sam. 17:15; 20:6; Mik. 5:2) Apre ki Mari ti’n ganny Zezi, Zozef pa ti ekspekte ki Mari i fer sa gran vwayaz pour al Nazaret avek en pti baba ki fek ne. Zot ti reste Betleenm, ki ti apepre nef kilomet avek Zerizalenm. Sa ti fer li pli fasil pour zot anmenn zot zanfan kot tanp e pour zot fer sa sakrifis ki Lalwa Moiz ti demann zot pour fer.​—Lev. 12:2, 6-8; Lik 2:22-24.

Pli boner, lanz Bondye ti’n dir Mari ki son garson ti pou ganny donnen ‘tronn David’ e ki i ti pou vin “Lerwa.” Petet Zozef ek Mari ti’n konpran ki i enportan ki Zezi i ne dan lavil David. (Lik 1:32, 33; 2:11, 17) Petet zot ti krwar ki i saz pour reste dan sa lavil e espere ziska ki Bondye i donn zot plis lenstriksyon konsernan sa ki i anvi zot fer.

Nou pa konnen ki kantite letan zot in pase Betleenm avan ki bann astrolog i vin kot zot. Me sa letan, zot ti pe reste dan en lakaz e Zezi ti en “pti garson,” pa en pti baba. (Mat. 2:11) I paret ki olye retourn Nazaret, zot ti reste Betleenm pour en pe letan e zot ti fer sa landrwa zot lakour.

Erod ti donn lord pour “touy tou garson de-z-an e mwens, Betleenm.” (Mat. 2:16) En lanz ti averti Zozef konsernan sa lord. Zozef ek Mari ti kit sa landrwa e al Lezip avek Zezi e zot ti reste laba ziska ki Erod ti mor. Pli tar, Zozef ti anmenn son fanmir Nazaret. Me akoz zot pa ti retourn Betleenm? Parski sa letan, Arkelais, garson Erod ti pe diriz Zide e i ti en zonm kriyel. Ankor enn fwa, en lanz ti’n averti Zozef ki i ti danzere pour al laba. Dan lavil Nazaret, zot ti pou sen e sof e zot ti pou kapab fer Zezi grandi.​—Mat. 2:19-22; 13:55; Lik 2:39, 52.

Aparaman, Zozef ti mor avan ki Zezi ti fer li posib pour bann imen kapab viv dan lesyel. Alor Zozef pou ganny resisite pour li viv lo later. En kantite parmi nou pou kapab zwenn li e nou pou kapab aprann plis konsernan akoz zot de Mari, zot ti reste Betleenm apre ki Zezi ti’n ne.