Sa ki byen ek sa ki mal: Lo kwa ki dimoun i souvan baz zot desizyon

Preski tou dimoun i dakor ki serten aksyon i byen ouswa i mal. Par egzanp, mert, vyol ek labi seksyel lo zanfan pa ganny aksepte, tandis ki lazistis, labonte e konpran santiman lezot i ganny apresye partou. Bokou dimoun i krwar ki i napa en bon oubyen move swa konsernan lekel ki zot fer sèks avek, si pou dir laverite oubyen lafason pour elve zanfan. Zot krwar ki preski nenport swa i akseptab. Dimoun i souvan fer zot desizyon baze lo zot santiman e baze lo santiman lezot dimoun otour zot. Eski sa i en bon nide?

ESKI NOU DEVRET FER DESIZYON BAZE LO NOU SANTIMAN?

Souvan nou fer bann desizyon baze lo nou santiman konsernan sa ki byen ek sa ki mal e sa i nou konsyans. (Romen 2:14, 15) Menm bann zanfan zot konnen letan en keksoz pa zis e zot santi zot koupab ler zot fer en keksoz mal. Anmezir nou grandi, nou aprann kwa ki byen e kwa ki mal avek nou fanmir, zanmi, ansenyan, dimoun dan kominote, larelizyon ek nou kiltir. Ler nou fer bann desizyon, nou konsyans i dir nou si nou swa i annakor avek sa ki nou’n aprann lo sa ki byen ouswa sa ki mal.

Ler nou konn sa ki byen ek sa ki mal, sa i kapab pous nou pour konpran santiman lezot, pour demontre rekonesans, lazistis ek konpasyon anver lezot. I kapab osi anpes nou fer bann keksoz ki pou ofans bann dimoun ki nou kontan ouswa ki kapab fer nou anbarase, onte oubyen santi nou koupab.

Eski nou toultan kapab depan lo nou santiman? Ler i ti zenn, Garrick ti swazir en lavi kot parey i ti dir, “Mon kapab fer nenport keksoz ki mon anvi.” Par kont, i ti vwar ki ler i ti fer sa ki i ti santi i krwar i byen, sa pa ti anmenn bon rezilta. I ti viv en lavi ki pli tar i ti dir ki i pa zwaye akoz sa kalite lavi ti “ranpli avek imoralite, labi drog, bwar pour sou ek en kantite vyolans.”

ESKI NOU DEVRET FER DESIZYON BAZE LO SANTIMAN LEZOT DIMOUN?

An plis ki nou prop santiman, nou souvan ganny gide par lafason ki lezot i vwar nou bann desizyon. Sa i kapab ed nou pour benefisye avek zot leksperyans ek lasazes. Nou ganny respe nou fanmir, zanmi ek dimoun dan kominote ler nou fer sa ki zot krwar i byen.

Eski nou toultan kapab depan lo santiman lezot dimoun? Konman en zenn madanm, Priscila ti fer en kantite keksoz ki son bann zanmi ti pe fer e i ti pe fer relasyon seksyel avan maryaz. I ti dekouver ki menm si i ti pe fer sa ki lezot i krwar i byen, sa pa ti fer li pli zwaye. I ti dir: “Ler mon ti fer sa ki tou dimoun pe fer, mon pa ti santi mwan byen. I ti fer mwan fer bann keksoz bet e danzere.”

ESKI I ANNAN EN PLI BON FASON POUR FER DESIZYON?

Ler nou deside ant sa ki byen ek sa ki mal, nou santiman ek santiman lezot i enportan. Me nou pa pou toultan ganny bon rezilta si nou zis depan lo bann santiman. Parfwa, nou kapab fer ditor nou prop lekor oubyen lezot, akoz nou pa kapab vwar kote nou bann swa pou anmenn nou. (Proverb 14:12) Menm si nou oubyen lezot i krwar en keksoz i byen, kantmenm sa, sa kondwit i kapab fer nou ditor e bann lopinyon i kapab sanze. Apre tou, serten konportman ki avan ti ganny vwar konman mal aprezan i akseptab tandis ki bann ki ti akseptab i aprezan ganny vwar konman pa apropriye.

Eski i annan en pli bon fason pour deside kwa ki byen e kwa ki mal? Eski ozordi i annan en standar moral ki nou kapab swiv ki pa pou fer nou dezapwente pli tar?

Erezman, i annan en sours ki nou kapab depan lo la pour ganny bann konsey ki kapab ed tou dimoun. Sa lot lartik pou diskit lo kote nou kapab trouv bann konsey ki nou kapab depan lo la ki pou ed nou deside kwa ki byen e kwa ki mal.