“Fer zefor pour vin bann dimoun matir”

1. Ki Zeova i ekspekte avek nou?

ENN bann moman pli zwaye pour en koup marye, i ler zot pti baba i ne. Me menm si bann paran i kontan zot pti baba, zot pa anvi ki i toultan reste en pti baba. Anfet, zot ti pou enkyet si zot pti baba pa grandi. Dan menm fason, Zeova i kontan ler nou fer bann premye pa pour vin bann disip Zezi me i pa anvi ki nou aret lanmenm. (1 Kor. 3:1) O kontrer, i demann nou pour nou vin “parey bann adilt,” setadir bann Kretyen matir.—1 Kor. 14:20.

2. Ki nou pou vwar dan sa lartik?

² Ki i vedir pour vin en Kretyen matir? Ki nou bezwen fer pour vin en Kretyen matir? Ki mannyer manze solid, setadir bann laverite profon ki dan Labib, i kapab ed nou pour vin bann Kretyen matir? Akoz nou pa devret krwar ki nou’n fini vin en Kretyen matir e ki nou pa bezwen fer zefor? Dan sa lartik, nou pou reponn sa bann kestyon.

KI I VEDIR POUR VIN EN KRETYEN MATIR?

3. Ki i vedir ler en Kretyen i vin parey en adilt?

³ Dan 1 Korentyen 14:20, sa mo Grek ki’n ganny tradwir “adilt” i kapab osi vedir “matir,” “parfe” e “konplet.”a (1 Kor. 2:6) Alor parey en pti baba i kontinyen grandi ziska ki i vin en adilt, nou osi nou devret kontinyen vin pli pros avek Zeova. Dan sa fason, nou vin bann Kretyen matir. Byensir, menm apre ki nou’n vin bann Kretyen matir, nou pa devret zanmen aret fer progre. (1 Tim. 4:15) Nou tou enkli bann zenn, nou kapab vin bann Kretyen matir. Me kwa ki montre ki en Kretyen i matir?

4. Kwa ki montre ki en Kretyen i matir?

⁴ En Kretyen matir i en dimoun ki fer tou sa ki Zeova i demann li pour fer. I pa swazir ki standar Zeova ki i pou swiv. Byensir, i en dimoun enparfe e i pou fer fot. Toulezour i fer son mye pour mazin e azir parey Zeova i anvi. I’n devlop sa nouvo personnalite e i kontinyen fer zefor pour annan menm fason panse avek Zeova. (Efe. 4:22-24) I’n aprann pour fer bann desizyon ki saz ki dapre bann lalwa ek prensip Zeova. Alor i pa bezwen en kantite lareg pour dir li ki i devret fer. Ler i fer en desizyon, i disiplin son lekor e i fer sa ki in deside.—1 Kor. 9:26, 27.

5. Ki i kapab arive avek en Kretyen ki pa matir? (Efezyen 4:14, 15)

⁵ De lot kote, en Kretyen ki pa matir i kapab fasilman ganny anbete par bann “trik ek riz” e i kapab menm krwar bann fo lenformasyon, rimer ek zistwar ki dan medya. Oubyen i kapab ganny anbete par bann aposta.b (Lir Efezyen 4:14, 15.) I kapab ki i zalou lezot, i kontan fer problenm avek zot, i ofans fasilman e souvandfwa ler i ganny tante, i fer sa ki mal.—1 Kor. 3:3.

6. Akoz nou kapab konpar lafason ki en Kretyen i vin matir avek lafason ki en zanfan i grandi? (Vwar portre.)

⁶ Parey in ganny mansyonnen pli boner, Labib i konpar ler en Kretyen pe vin pli matir spirityelman avek ler en zanfan pe grandi pour vin en adilt. I annan en kantite keksoz ki en zanfan pa konnen. Alor i bezwen en adilt pour protez e gid li. Par egzanp, en manman i kapab demann son pti fiy pour atrap son lanmen ler zot pe koup semen. Anmezir ki sa pti fiy i grandi, i kapab ki sa manman pou les li koup semen li tousel me i pou kontinyen fer li rapel pour fer atansyon avan i koup semen. Ler sa fiy i vin en adilt, i konnen ki mannyer pour evit sa bann kalite danze. Zis parey en zanfan i bezwen led avek en adilt pour evit danze, souvandfwa bann Kretyen ki pa matir i bezwen led avek bann Kretyen ki matir pour evit bann keksoz ki kapab gat zot lanmitye avek Zeova e pour zot kapab fer bann desizyon ki saz. De lot kote, ler en Kretyen matir i bezwen fer en desizyon, i reflesir lo bann prensip Labib pour li kapab konn fason panse Zeova lo son sityasyon e apre sa, i aplik sa ki i’n aprann.

7. Eski bann Kretyen ki matir i bezwen led avek lezot?

⁷ Eski sa i vedir ki en Kretyen matir pa bezwen led lezot? Non. Parfwa bann Kretyen matir osi i bezwen demann led. Me en Kretyen ki pa matir i kapab ekspekte ki lezot i dir li ki pour fer oubyen ki zot fer desizyon dan son plas. De lot kote, en Kretyen ki matir i rod led avek lezot ki pli saz ki li e ki annan plis leksperyans ki li. Me sa Kretyen i konnen ki i bezwen fer son prop desizyon e ki Zeova i ekspekte ki i “desarz son prop responsabilite.”—Gal. 6:5.

8. Dan ki fason ki bann Kretyen matir i diferan avek kanmarad?

⁸ Bann adilt i diferan avek kanmarad fizikman. Pareyman, bann Kretyen matir i annan diferan kalite. Par egzanp, i annan ki kapab vreman saz. I annan ki annan bokou kouraz. I annan lezot ankor ki vreman zenere e i osi annan lezot ki vreman konpran santiman lezot. Osi ler de Kretyen matir i fer fas avek en sityasyon en pe parey, zot kapab fer diferan desizyon me tou le de desizyon i dapre bann prensip Labib. Souvandfwa sa i kapab arive ler bann Kretyen i bezwen fer en desizyon dapre zot konsyans. Me zot pa ziz kanmarad si zot desizyon i diferan. O kontrer, zot reste ini avek kanmarad.—Rom. 14:10; 1 Kor. 1:10.

KI NOU BEZWEN FER POUR VIN EN KRETYEN MATIR?

9. Eski en Kretyen i vin matir otomatikman? Eksplike.

⁹ I normal ki anmezir letan i pase en zanfan i grandi pour vin en adilt. Me pour en Kretyen kapab vin matir, i bezwen fer zefor. Annou vwar legzanp bann Kretyen dan lavil Korent. Zot ti aksepte sa bon nouvel, batize, ganny lespri sen e zot ti aprann en kantite keksoz avek zapot Pol. (Akt 18:8-11) Me kantmenm sa, plizyer lannen apre ki zot ti’n batize, en kantite parmi zot pa ti ankor vin bann Kretyen matir. (1 Kor. 3:2) Ki nou kapab fer pour fer sir ki sa pa arive avek nou?

10. Ki nou bezwen fer pour vin en Kretyen matir? (Zid 20)

¹⁰ Pour nou vin en Kretyen matir, premyerman nou bezwen anvi vin matir. Bann ki “kontan ki zot napa leksperyans” e ki anvi reste parey zot ete, pa pou zanmen vin bann Kretyen matir. (Prov. 1:22) Nou pa anvi vin parey en adilt ki pa oule pran okenn responsabilite e ki depan lo son paran pour fer desizyon pour li. O kontrer, nou anvi pran nou responsabilite e fer sir ki nou kontinyen vin pli pros avek Zeova. (Lir Zid 20.) Si ou pe fer zefor pour vin en Kretyen matir, priy Zeova pour donn ou “sa dezir ek lafors pour azir.”—Fili. 2:13.

11. Ki Zeova in donn nou pour ed nou vin bann Kretyen matir? (Efezyen 4:11-13)

¹¹ Zeova pa ekspekte ki nou vin en Kretyen matir lo nou menm. I’n donn nou bann berze ek bann ansenyan dan kongregasyon pour ed nou vin bann Kretyen matir, setadir pour nou kapab “ariv lo menm degre devlopman ki Kris.” (Lir Efezyen 4:11-13.) Zeova i osi donn nou son lespri sen pour ed nou konn “fason panse Kris.” (1 Kor. 2:14-16) Osi, Bondye in donn nou sa kat Levanzil ki ed nou pour konn fason panse Zezi, lafason ki i ti koze e sa ki i ti fer ler i ti lo later. Ler ou swiv legzanp Zezi e annan menm fason panse avek li, sa pou ed ou pour vin en Kretyen matir.

KI MANNYER BANN LAVERITE PROFON KI DAN LABIB I KAPAB ED NOU VIN EN KRETYEN MATIR?

12. Kisisa “bann lansennyman de baz konsernan Kris”?

¹² Ler nou ti fek vin Kretyen, nou ti aprann “bann lansennyman de baz konsernan Kris.” Par egzanp, nou ti aprann konsernan repantir, lafwa, batenm ek rezireksyon. (Ebr. 6:1, 2) Me pour nou vin bann Kretyen matir, nou bezwen aprann plis ki sa bann lansennyman de baz. Sa bann lansennyman i bann keksoz ki tou vre Kretyen i krwar ladan. I pour sa rezon ki ler zapot Pyer ti pe anons sa bon nouvel zour Lapannkot, i ti koz lo sa bann lansennyman. (Akt 2:32-35, 38) Me pour nou vin bann disip Kris, nou bezwen aksepte sa bann lansennyman. Par egzanp, Pol ti montre ki si en dimoun pa krwar dan rezireksyon, i pa kapab dir ki i en disip Kris. (1 Kor. 15:12-14) Alor, pour nou vin bann Kretyen matir, nou pa devret satisfe avek zis bann lansennyman de baz konsernan laverite.

13. Ki nou bezwen fer pour ganny bann byenfe avek manze solid ki dan Parol Bondye? (Ebre 5:14) (Vwar portre.)

¹³ Manze solid ki sorti dan Parol Bondye i diferan avek bann lansennyman de baz. I pa zis enkli bann lalwa Zeova me i osi enkli son bann prensip ki ed nou konpran fason panse Zeova. Pour ganny bann byenfe avek manze solid, setadir bann laverite profon ki dan Labib, nou bezwen etidye Parol Bondye, medit lo sa ki nou lir e aplik sa ki nou aprann. Anmezir nou fer sa, nou aprann pour fer bann desizyon ki fer Zeova plezir.c—Lir Ebre 5:14.

14. Ki mannyer Pol ti ed bann Kretyen dan lavil Korent pour vin bann Kretyen matir?

¹⁴ Souvandfwa bann Kretyen ki pa matir i vwar li difisil pour fer sa bon desizyon dan bann sityasyon kot napa en lalwa spesifik ki aplikab e kot zot bezwen rezonn lo bann prensip Labib. Si napa en lalwa dan Labib ki aplikab, serten i kapab krwar ki zot kapab fer sa ki zot anvi. Serten i kapab demande ki i annan en lalwa dan en sityasyon kot i pa neseser pour annan en lalwa. Par egzanp, i paret ki bann Kretyen dan lavil Korent ti demann Pol pour fer en lalwa konsernan si zot kapab manz bann manze ki’n ganny ofer avek en zidol. Olye dir zot ki pour fer, Pol ti montre zot ki sak dimoun i annan “drwa pour swazir” ki pour fer dapre zot konsyans. I ti koz lo serten prensip Labib ki kapab ed zot fer en desizyon ki pa ti pou fatig zot konsyans e ki pa ti pou vin en lobstak pour lezot. (1 Kor. 8:4, 7-9) Dan sa fason, Pol ti ed bann Kretyen dan lavil Korent pour vin bann Kretyen matir, pour zot kapab servi zot abilite pour zize pour fer zot desizyon olye depan lo lezot oubyen rod bann lalwa.

15. Ki mannyer Pol ti ed bann Kretyen Ebre pour vin bann Kretyen matir?

¹⁵ Nou aprann en leson enportan avek sa ki Pol ti ekri bann Kretyen Ebre. Serten ti’n aret fer zefor pour vin bann Kretyen matir. O kontrer zot ti’n “rekonmans bwar dile olye manz manze solid.” (Ebr. 5:12) Zot pa ti pe aprann e aksepte bann nouvo keksoz ki Zeova ti pe ansenny zot atraver kongregasyon. (Prov. 4:18) Par egzanp, en kantite Zwif ki ti’n vin Kretyen ti ankor pe ankouraz lezot pour obei Lalwa Moiz menm si i ti’n fer 30 an depi ki sakrifis Zezi ti’n met en lafen avek sa lalwa. (Rom. 10:4; Tit 1:10) Sa 30 an ki ti’n pase ti’n donn sa bann Kretyen ase letan pour konpran ki zot ti nepli bezwen swiv Lalwa Moiz. Alor tou dimoun ki lir sa let ki Pol ti ekri pour bann Kretyen Ebre, i kapab konfirmen ki dan sa liv i annan bann lansennyman pli o profon. I sanmenm ki sa bann Kretyen ti bezwen pour fer zot annan konfyans ki sa nouvo fason ki Zeova i anvi zot ador li gras a Zezi, i pli siperyer ki Lalwa Moiz. Sa ki Pol ti dir ti osi donn zot kouraz pour kontinyen anons sa bon nouvel menm si bann Zwif ti opoz zot.—Ebr. 10:19-23.

AKOZ NOU BEZWEN KONTINYEN FER ZEFOR POUR VIN EN KRETYEN MATIR?

16. Apard fer zefor pour vin en Kretyen matir, ki nou bezwen fer?

¹⁶ Nou bezwen fer zefor pour vin en Kretyen matir me osi pour reste en Kretyen matir. Alor nou bezwen pa krwar ki nou’n fini vin matir e ki nou pa bezwen kontinyen fer zefor pour vin en Kretyen matir. (1 Kor. 10:12) Nou bezwen “kontinyen teste” nou lekor pour fer sir ki nou pe kontinyen fer progre.—2 Kor. 13:5.

17. Ki mannyer sa let ki Pol ti ekri pour bann Kretyen dan lavil Kolos i montre ki nou bezwen kontinyen reste matir?

¹⁷ Dan let ki Pol ti ekri pour bann Kretyen dan lavil Kolos, Pol ti dir zot ki zot bezwen reste bann Kretyen matir. Menm si sa bann Kretyen ti bann Kretyen matir, Pol ti dir zot fer atansyon ki zot pa ganny anbete avek fason panse bann dimoun dan sa lemonn. (Kol. 2:6-10) Osi Epafras, ki ti konn byen bann frer ek ser dan sa kongregasyon, ti toultan priye ki bann frer ek ser i “finalman ganny trouve parfe” oubyen matir. (Kol. 4:12) Ki nou aprann avek sa? Pol ek Epafras ti konpran ki pour en Kretyen kontinyen reste matir, i bezwen fer zefor e i bezwen led Bondye. Zot ti anvi ki bann Kretyen dan lavil Kolos i kontinyen reste matir malgre nenport problenm ki zot pas ladan.

18. Ki i kapab arive avek en Kretyen matir? (Vwar portre.)

¹⁸ Pol ti dir bann Kretyen Ebre ki si en Kretyen matir pa fer atansyon, i kapab perdi laprouvasyon Bondye pour touzour. Si sa Kretyen i refize pour obei Zeova, i kapab sitan elwannyen avek Zeova ki i nepli kapab repantir e ganny pardon Bondye. Erezman bann Kretyen Ebre pa ti koumsa. (Ebr. 6:4-9) Me ki arive avek bann Kretyen dan nou letan ki vin inaktif oubyen ki ganny ekskli dan kongregasyon me pli tar zot repantir? Si zot demontre limilite e repantir, zot montre ki zot pa parey sa bann Kretyen ki Pol ti koz lo la, ki ti’n kapab perdi laprouvasyon Bondye pour touzour. Me ler zot retourn kot Zeova, zot bezwen sa led ki Zeova i donnen. (Ezek. 34:15, 16) Bann ansyen i kapab fer laranzman pour en frer oubyen en ser matir ed zot reganny zot lanmitye avek Zeova.

19. Ki lobzektif nou devret annan?

¹⁹ Si ou pe fer zefor pour vin en Kretyen matir, ou kapab atenn sa lobzektif. Kontinyen manz bann manze solid, setadir bann laverite profon ki dan Labib e fer zefor pour annan menm fason panse avek Zeova. Si ou deza en Kretyen matir, fer tou sa ki ou kapab pour reste koumsa la konmela e pour touzour.