LARTIK LETID 20
KANTIK 7 Zeova, nou lafors
Les Zeova rekonfort ou
“Ki Bondye . . . i ganny loue, akoz i en Papa ki pran lapenn e ki donn rekonfor dan tou sityasyon.”—2 KOR. 1:3.
TOPIK
Sa ki nou aprann avek lafason ki Zeova ti rekonfort bann Zwif ki ti’n ganny anmennen Babilonn.
1. Ki mannyer lavi ti ete pour bann Zwif ki ti’n ganny anmennen Babilonn?
POUR en kantite lannen, bann Zwif ti dezobei Zeova. Sa ti fer ki Zeova ti permet bann Babilonnyen pour detrir zot pei e anmenn zot Babilonn konman bann prizonnyen. Ki mannyer lavi ti ete pour zot Babilonn? (2 Kron. 36:15, 16, 20, 21) Bann Zwif ti lib pour fer serten keksoz dan lavi toulezour. (Zer. 29:4-7) Kantmenm sa, lavi pa ti fasil e Babilonn pa ti sa landrwa kot zot ti anvi reste. Ki mannyer zot ti santi konsernan zot sityasyon? Remark sa ki en Zwif fidel ti dir: “Nou ti asize o bor bann larivyer Babilonn, nou ti plere ler nou ti mazin Siyon.” (Ps. 137:1) Bann Zwif ti dekouraze e zot ti bezwen rekonfor. Me lekel ki ti pou kapab rekonfort zot?
2-3. (a) Ki Zeova ti fer pour bann Zwif ki ti ganny anmennen Babilonn? (b) Ki nou pou vwar dan sa lartik?
2 Zeova i sa Bondye ki “donn rekonfor dan tou sityasyon.” (2 Kor. 1:3) Zeova i kontan son bann serviter e i vreman anvi rekonfort zot. I ti konnen ki serten Zwif ki ti’n ganny anmennen Babilonn ti pou regrete ki zot ti’n dezobei li e zot ti pou retourn kot li. (Iza. 59:20) Alor plis ki 100 an avan ki bann Zwif ti ganny anmennen Babilonn, Zeova ti donn Izai en mesaz pour bann Zwif, sa mesaz i dan liv Izai. Akoz Zeova ti fer sa? Izai i dir: “La sa ki zot Bondye i dir: ‘Konsol, konsol mon pep.’” (Iza. 40:1) Atraver sa mesaz ki profet Izai ti ekri, Zeova ti donn sa bann Zwif sa rekonfor ki zot ti pou bezwen.
3 Parey sa bann Zwif, nou osi nou bezwen rekonfor parfwa. Dan sa lartik, nou pou vwar trwa fason ki Zeova ti rekonfort sa bann Zwif: (1) I ti promet ki i ti pou pardonn bann ki repantir, (2) i ti donn son pep lespwar e (3) i ti ed zot pour aret per. Anmezir ki nou vwar sa bann pwen, remarke ki mannyer Zeova i rekonfort nou dan menm fason ozordi.
ZEOVA I PARDONN NOU
4. Ki mannyer Zeova ti montre ki i en Bondye ki pran pitye? (Izai 55:7)
4 Zeova i sa “Papa ki pran lapenn.” (2 Kor. 1:3) I ti demontre sa kalite ler i ti promet ki i pou pardonn bann Zwif ki repantir. (Lir Izai 55:7.) I ti dir: “Mon pou pran pitye pour ou akoz mon lanmour fidel i dire pour touzour.” (Iza. 54:8) Ki mannyer Zeova ti pou fer sa? Menm si bann Zwif ti pou bezwen sibir konsekans zot aksyon, Zeova ti promet ki zot pa ti pou reste Babilonn pour touzour. (Iza. 40:2) Sa ti’n bezwen vreman rekonfort bann Zwif ki ti’n repantir, ki ti anvi fer Zeova plezir!
5. Konpare avek bann Zwif, akoz nou pli asire ki Zeova i pardonn nou pese?
5 Ki nou aprann? Zeova i pare pour pardonn son bann serviter konpletman. Konpare avek bann Zwif, ozordi nou annan plis rezon pour asire ki Zeova i pardonn nou bann pese. Akoz? Parski nou konn sa laranzman ki Zeova in met an plas ki fer li posib pour li pardonn nou pese. Plizyer santenn lannen apre ki Izai ti profetize, Zeova ti anvoy son Garson ki i kontan lo later pour donn son lavi konman ranson pour tou bann dimoun ki repantir. Vi ki Zezi in mor pour nou, sa i fer li posib pour nou pese “ganny efase” konpletman. (Akt 3:19; Iza. 1:18; Efe. 1:7) Pa sa i montre ki Zeova i en Bondye ki pardonnen!
6. Akoz ler nou mazin lo lafason ki Zeova i pran pitye pour nou, sa i rekonfort nou? (Vwar portre.)
6 Sa ki Zeova ti dir bann Zwif dan Izai 55:7 i kapab rekonfort nou si nou pe santi nou koupab konsernan bann fot ki nou’n fer dan lepase menm si nou’n repantir. Petet en rezon akoz nou ankor pe santi nou koupab i akoz nou pe sibir konsekans sa fot ki nou’n fer. Me si nou’n konfes nou pese e nou’n aret fer sa ki mal, nou kapab asire ki Zeova in pardonn nou e ler i pardonn nou i swazir pour pa mazin nou pese. (Konpar Zeremi 31:34.) Alor si Zeova pa kontinyen mazin lo bann pese ki nou’n fer dan lepase, nou osi nou pa devret kontinyen mazin lo la. Sa ki pli enportan pour Zeova i sa ki nou pe fer la konmela me pa bann fot ki nou’n fer dan lepase. (Ezek. 33:14-16) Byento dan nouvo lemonn, nou Papa ki pran lapenn pou retir tou bann difikilte ki nou pe fer fas avek akoz bann fot ki nou’n fer.
Sa ki pli enportan pour Zeova i sa ki nou pe fer la konmela me pa bann fot ki nou’n fer dan lepase (Vwar paragraf 6)
7. Kwa ki kapab motiv nou pour al rod led si nou pe kasyet en pese?
7 Ki nou devret fer si nou pe santi nou koupab akoz en pese grav ki nou’n fer? Labib i ankouraz nou pour rod led avek bann ansyen. (Zak 5:14, 15) Petet i pa fasil pour nou dir zot sa ki nou’n fer. Me nou bezwen rapel ki Zeova i servi sa bann zonm pour ed nou e ki sa bann zonm pou demontre lanmour e pran pitye anver nou zis parey Zeova. Si nou gard sa antet e si nou’n repantir, nou pou anvi koz avek zot. Annou vwar lafason ki Zeova ti demontre pitye e rekonfort en frer ki apel Arthur,a ki ti santi li koupab akoz en keksoz ki i ti’n fer. Arthur i dir: “Pour apepre enn an, mon ti get pornografi. Me apre ki mon ti’n tann en diskour konsernan konsyans, mon ti konfes mon pese avek mon madanm e avek bann ansyen. Apre ki mon ti’n koz avek zot, mon ti santi mwan soulaze e mon ti nepli annan en konsyans sarze. Me mon ti ankor sagren akoz sa ki mon ti’n fer. Bann ansyen ti fer mwan rapel ki Zeova pa ti’n rezet mwan. Zeova i disiplin nou parski i kontan nou. Sa ki zot ti dir mwan, ti reasir mwan e ed mwan pour konpran ki Zeova in vreman pardonn mwan.” Ozordi, Arthur i en pionye e i osi en serviter kongregasyon. I vreman rekonfortan pour konnen ki Zeova i pran pitye pour nou si nou repantir senserman!
ZEOVA I DONN NOU LESPWAR
8. (a) Ki lespwar Zeova ti donn bann Zwif ki ti’n ganny anmennen Babilonn? (b) Dapre Izai 40:29-31, ki lefe lespwar ti pou annan lo bann Zwif ki repantir?
8 Bann Zwif ki ti Babilonn ti’n kapab mazinen ki zot pa ti pou zanmen kapab retourn dan zot pei. Normalman, bann Babilonnyen pa ti les bann prizonnyen retourn dan zot pei. (Iza. 14:17) Me Zeova ti donn son pep lespwar. I ti promet pour liber son pep e i napa nanryen ki ti pou kapab anpes li fer sa. (Iza. 44:26; 55:12) Pour Zeova, Babilonn ti parey lapousyer. Ler ou soufle lapousyer, sa lapousyer i ale. (Iza. 40:15) I ti pou koumsanmenm ki Zeova ti pou liber son pep. I ti pou fasil pour li. Ki lefe sa ti pou annan lo bann Zwif? I ti pou rekonfort zot. Me i ti pou osi fer plis ki sa. Izai ti dir: “Bann ki annan lespwar dan Zeova pou reganny lafors.” (Lir Izai 40:29-31.) Zot ti pou parey bann leg ki pe anvole dan lesyel parski sa lespwar ti pou donn zot lafors.
9. Ki laprev bann Zwif ti annan ki promes Zeova ti pou vin vre?
9 Zeova ti osi donn bann Zwif ki ti’n ganny anmennen Babilonn bann rezon akoz zot kapab annan konfyans dan son bann promes. Ki laprev i ti donn zot? Mazin bann profesi ki ti’n fini ganny akonplir. Par egzanp, zot ti konnen ki Asiri ti’n ranport laviktwar lo sa dis tribi Izrael e zot ti’n anmenn bann dimoun an egzil. (Iza. 8:4) Zot ti vwar ler bann Babilonnyen ti detri Zerizalenm e anmenn zot Babilonn. (Iza. 39:5-7) Zot ti konnen ki lerwa Babilonn ti’n fer Lerwa Zedekya vin aveg e anmenn li Babilonn. (Zer. 39:7; Ezek. 12:12, 13) Tou sa ki Zeova ti’n predir ti’n vin vre. (Iza. 42:9; 46:10) I bezwen ki sa bann promes ti’n ed sa bann Zwif pour annan plis konfyans ki sa promes ki Zeova ti’n fer pour liber zot, ti pou osi vin vre.
10. Kwa ki kapab ed nou pour kontinyen gard nou lespwar antet pandan bann dernyen zour?
10 Ki nou aprann? Ler nou dekouraze, nou lespwar pour lavenir i kapab rekonfort nou e ed nou pour reganny lafors. Nou pe viv dan bann letan ki vreman difisil e bann lennmi Bondye ki pwisan pe opoz nou. Me nou pa devret dekouraze. Zeova in donn nou en lespwar merveye. I’n promet nou ki nou pou viv pour touzour dan Paradi kot nou pou viv dan lape ek sekirite. Nou bezwen kontinyen gard sa lespwar antet. Si nou pa fer sa i pou parey nou pe get en zoli peizaz atraver en vit sal. Nou pa vwar sa peizaz byen parski sa vit i sal. Me ki mannyer nou kapab netway sa vit setadir kontinyen gard sa lespwar antet? Nou kapab fer letan regilyerman pour reflesir lo ki mannyer nou lavi pou gou dan nouvo lemonn. Nou kapab lir bann lartik, get bann video e ekout bann sanson ki koz lo nou lespwar. Osi nou kapab koz avek Zeova dan lapriyer konsernan bann keksoz ki nou pe espere pour vwar dan Paradi.
11. Kwa ki ed en ser ki annan bann maladi kronik pour reganny lafors?
11 Annou vwar leksperyans en ser ki apel Joy, ki annan bann maladi kronik. Sa lespwar ki Joy ti annan ti rekonfort li e ed li pour annan lafors. I ti dir: “Ler mon santi ki mon annan tro bokou problenm, mon dir Zeova tou sa ki mon pe santi e mon konnen ki i konpran mwan. Dan sa bann moman, Zeova i donn mwan sa ‘lafors . . . ki pli pwisan ki mon prop lafors.’” (2 Kor. 4:7) Joy i osi imazin li dan nouvo lemonn kot “personn pa pou dir: ‘Mon malad.’” (Iza. 33:24) Si nou osi nou dir Zeova tou sa ki nou pe santi e nou gard nou lespwar antet, nou pou kapab reganny lafors.
12. Ki rezon nou annan pour annan konfyans dan bann promes Zeova? (Vwar portre.)
12 Zis parey Zeova ti donn bann Zwif ki ti Babilonn plizyer rezon pour krwar dan son bann promes, ozordi Zeova i fer menm parey avek nou. Mazin bann profesi ki nou vwar pe ganny akonplir. Par egzanp, nou vwar en pouvwar mondyal ki “for e an menm tan fay.” (Dan. 2:42, 43) Nou osi pe tann konsernan bann “tranblemandter dan en landrwa apre lot” e nou anons sa bon nouvel avek “tou nasyon.” (Mat. 24:7, 14) Sa bann profesi ek lezot ankor i ed nou pour annan plis konfyans ki tou bann promes Zeova pou vin vre.
Bann profesi ki nou vwar pe ganny akonplir ozordi i donn nou rezon pour annan konfyans dan bann promes Zeova (Vwar paragraf 12)
ZEOVA I ED NOU POUR ARET PER
13. (a) Ki problenm bann Zwif ti pou fer fas avek anmezir ki sa letan kot zot ti pou ganny libere ti aprose? (b) Dapre Izai 41:10-13, ki mannyer Zeova ti rekonfort bann Zwif ki ti Babilonn?
13 Menm si Zeova ti donn bann Zwif ki ti pe reste Babilonn lespwar ki zot ti pou ganny libere, i ti konnen ki sa bann Zwif ti pou fer fas avek bann problenm anmezir ki sa letan ti aprose. Zeova ti dir ki en lerwa pwisan ti pou atak e ranport laviktwar lo bann nasyon otour Babilonn e apre i ti pou atak Babilonn. (Iza. 41:2-5) Eski bann Zwif ti annan rezon pour per? En kantite letan avan sa ti arive, Zeova ti rekonfort son pep. I ti dir: “Pa bezwen per, parski mon avek ou. Pa bezwen enkyet, parski mwan mon ou Bondye.” (Lir Izai 41:10-13.) Ki Zeova ti pe esey dir ler i ti dir “Mon ou Bondye”? I pa ti pe fer bann Zwif rapel ki zot bezwen ador li parski zot ti deza konn sa. O kontrer, i ti pe fer zot rapel ki i ti avek zot e ki i ti pou ed zot.—Ps. 118:6.
14. Kwa ankor ki Zeova ti fer pour ed bann Zwif ki ti Babilonn pour aret per?
14 Zeova ti osi ed bann Zwif ki ti Babilonn pour aret per par fer zot rapel ki son pwisans ek konnesans napa okenn limit. I ti demann bann Zwif pour get dan lesyel. I ti dir zot ki i pa’n zis kree sa bann zetwal me i osi konn non tou sa bann zetwal. (Iza. 40:25-28) Si Zeova i konn non sak zetwal, nou kapab asire ki i konn non sakenn parmi son bann serviter! Si Zeova i annan sa pouvwar pour kree bann zetwal, nou kapab asire ki i annan sa pouvwar pour ed son pep. I kler ki bann Zwif ki ti Babilonn ti napa rezon pour enkyet oubyen per.
15. Ki mannyer Zeova ti prepar bann Zwif ki ti Babilonn pour sa ki ti pou arive?
15 Zeova ti osi prepar son pep pour sa ki ti pou arive apre. Pli boner, dan liv Izai, Zeova ti dir son pep: “Antre dan ou bann lasanm anndan e ferm ou bann laport par deryer ou. Kasyet pour en pti moman ziska ki mon aret ankoler.” (Iza. 26:20) I kapab ki bann Zwif ti aplik sa bann lenstriksyon ler Lerwa Siris ti atak Babilonn. En istoryen Grek ki ti viv dan letan lontan i dir ki ler Siris ti antre Babilonn, i ti “donn lord bann [solda] pour touy tou bann ki ti deor.” I bezwen ki bann zabitan Babilonn ti per sa letan! Me i kapab ki bann Zwif ti ganny eparnyen parski zot ti obeir lenstriksyon Zeova.
16. Akoz nou pa devret per pour sa ki pou arive dan lavenir? (Vwar portre.)
16 Ki nou aprann? Byento, gran ladetres pou konmanse e i pou sa moman pli difisil ki bann imen in deza eksperyanse. Ler i konmanse, bann dimoun dan lemonn pou konfize e zot pou per. Me pep Zeova pa pou ni per e ni konfize. Nou konnen ki Zeova i nou Bondye. Nou pou annan kouraz parski nou konnen ki “[nou] delivrans pe aprose.” (Lik 21:28) Menm ler en group nasyon ki’n ralye ansanm i atak nou, nou pou kontinyen annan konfyans dan Zeova. Zeova pou servi son bann lanz pour protez nou e i pou donn nou bann lenstriksyon ki pou sov nou lavi. Ki mannyer nou pou ganny sa bann lenstriksyon? Nou pa ankor konnen me i tre probab ki nou pou ganny sa bann lenstriksyon atraver nou kongregasyon. Dan en sans, nou kongregasyon pou parey nou “lasanm anndan” kot nou pou an sekirite. Ki mannyer nou kapab prepar nou pour sa ki pou arive byento? Nou devret vin pli pros avek nou bann frer ek ser, pare pour obeir bann lenstriksyon sorti kot lorganizasyon Zeova e annan konfyans ki Zeova ki pe diriz nou lorganizasyon.—Ebr. 10:24, 25; 13:17.
Ler nou reflesir lo pwisans Zeova ek son abilite pour sov nou, nou pa pou tro per pandan gran ladetres (Vwar paragraf 16)b
17. Ki mannyer ou kapab les Zeova rekonfort ou?
17 Menm si lavi pa ti fasil pour bann Zwif ki ti Babilonn, Zeova ti donn zot sa rekonfor ki zot ti bezwen. Zeova pou fer parey pour nou. Alor nenport keksoz ki arive dan lavenir, kontinyen les Zeova rekonfort ou. Annan konfyans ki Zeova i pardonn son bann serviter e i pou pran swen avek ou. Kontinyen gard ou lespwar antet. Pa zanmen oubliye ki Zeova i ou Bondye e ou napa nanryen pour per.
KANTIK 3 Nou lafors, nou lespwar, nou konfyans
a Serten non in sanze.
b LEKSPLIKASYON PORTRE: En pti group frer ek ser in zwenn ansanm. Zot asire ki Zeova i pwisan e i kapab protez son pep nenport landrwa kot zot reste lo later.