Akoz nou bezwen rod konsey?

1. Ki mannyer nou kapab fer bann desizyon ki saz e fer nou bann plan reisi? (Proverb 13:10; 15:22)

NOU tou nou anvi fer bann desizyon ki saz e nou tou nou anvi nou bann plan i reisi. Parol Bondye i dir nou ki nou bezwen fer pour sa arive.—Lir Proverb 13:10; 15:22.

2. Ki Zeova i promet pour fer pour nou?

² Zeova i nou Papa e i sa Enn ki kapab donn nou bann pli bon konsey. Alor nou bezwen priye e demann li pour donn nou lasazes. I promet ki i pou ed nou e i dir: “Mon pou donn ou konsey e mon pou vey lo ou.” (Ps. 32:8) Sa verse i montre ki Zeova pa zis donn nou konsey me i osi enterese avek nou e i ed nou pour aplik son konsey.

3. Ki nou pou vwar dan sa lartik?

³ Dan sa lartik, nou pou servi Parol Bondye pour ed nou reponn kat kestyon: (1) Ki kalite mon bezwen annan si mon anvi ganny bann byenfe avek bann konsey ki mon gannyen? (2) Lekel ki kapab donn mwan bann bon konsey? (3) Ki mannyer mon kapab montre ki mon vreman anvi ganny konsey? (4) Akoz mon pa devret demann lezot pour fer desizyon pour mwan?

KI KALITE MON BEZWEN ANNAN?

4. Ki kalite ki nou bezwen annan pour nou kapab ganny bann byenfe avek bann konsey ki nou gannyen?

⁴ Pour nou ganny bann byenfe avek bann bon konsey ki nou gannyen, nou bezwen modes e annan limilite. Nou bezwen rekonnet ki parfwa lo nou menm nou napa sa leksperyans oubyen sa konnesans pour fer en desizyon saz. Si nou napa limilite, Zeova pa pou ed nou.Sa pou fer ki konsey ki nou gannyen ler nou lir Parol Bondye pou glise lo nou parey delo lo fey sonz. (Mik. 6:8; 1 Pyer 5:5) Me si nou annan limilite, nou pa pou tarde pour ekout e aplik bann konsey sorti dan Labib.

5. Ki Lerwa David ti’n fer ki ti’n kapab fer li vin orgeye?

⁵ Annou vwar sa ki nou kapab aprann avek legzanp Lerwa David. David ti’n fer en kantite bon keksoz ki ti’n kapab fer li vin orgeye. Bokou lannen avan ki i ti vin lerwa, dimoun ti konn li konman en bon mizisyen. I ti menm ganny demande pour zwe lanmizik pour lerwa. (1 Sam. 16:18, 19) Apre ki Zeova ti’n swazir David pour vin lerwa, Zeova ti donn li son lespri sen ki ti fer li vin for. (1 Sam. 16:11-13) I ti popiler parmi son pep parski i ti touy zot bann lennmi, enkli Golyat ki ti en zean Filisten. (1 Sam. 17:37, 50; 18:7) Si David ti orgeye, i ti’n kapab krwar ki vi ki i ti’n fer tou sa bann keksoz, i pa ti bezwen ekout konsey lezot. Me David pa ti koumsa.

6. Ki mannyer nou konnen ki David ti kontan ekout konsey lezot? (Vwar portre.)

⁶ Apre ki David ti’n vin lerwa, i ti kontinyen reste zanmi avek bann zonm ki ti donn li konsey. (1 Kron. 27:32-34) Sa pa sirprann nou parski David ti abitye ekoute ler lezot ti donn li konsey. I pa ti zis aksepte konsey sorti kot bann zonm me osi avek en madanm ki apel Abigel. Abigel ti’n marye avek Nabal, en zonm ki ti orgeye, ki pa ti rekonesan e ki ti napa respe pour lezot. De lot kote, David ti annan limilite e i ti aplik konsey Abigel. Sa ti anpes David fer en fot grav.—1 Sam. 25:2, 3, 21-25, 32-34.

7. Ki nou kapab aprann avek legzanp David? (Eklezyas 4:13) (Vwar portre.)

⁷ Nou kapab aprann serten leson avek legzanp David. Par egzanp, i kapab ki nou annan serten abilite oubyen nou annan serten lotorite lo lezot. Kantmenm sa, nou pa devret krwar ki nou konn tou keksoz e ki nou pa bezwen konsey. Parey David, nou devret pare pour ekoute ler lezot i donn nou bann bon konsey, nenport ki ki donn nou sa konsey. (Lir Eklezyas 4:13.) Si nou fer sa, i tre probab ki nou pa pou fer bann fot grav ki kapab anmenn problenm pour nou e pour lezot.

LEKEL KI KAPAB DONN MWAN BANN BON KONSEY?

8. Akoz Zonatan ti kapab donn David bann bon konsey?

⁸ Annou vwar en lot leson ki nou kapab aprann avek legzanp David. I ti ekout konsey bann dimoun ki ti annan en bon lanmitye avek Zeova e ki ti konpran byen sityasyon ki i ti pe pas ladan. Par egzanp, ler David ti anvi konnen si Lerwa Sail ti pare pour fer lape avek li. David ti ekout konsey Zonatan ki ti garson Sail. Akoz Zonatan ti kapab donn David bann bon konsey? Parski Zonatan ti annan en bon lanmitye avek Zeova e i ti osi konn Sail byen. (1 Sam. 20:9-13) Ki nou kapab aprann?

9. Avek lekel ki nou devret demann konsey? Donn en legzanp. (Proverb 13:20)

⁹ Ler nou bezwen konsey, i ti pou byen ki nou rod konsey avek en dimoun ki annan en bon lanmitye avek Zeova e ki konn sa problenm ki nou pe pas ladan.a (Lir Proverb 13:20.) Par egzanp, meton en zenn frer i anvi trouv en ser ki pou vin en bon konzwen pour li. Lekel ki kapab donn li bon konsey? Si i demann en zanmi ki en selibater parey li menm, i kapab donn li bann bon konsey si i donn li bann konsey ki baze lo bann prensip Labib. Si sa frer i demann konsey avek en koup matir ki konn li byen, ki’n marye pour en pe letan e ki ere dan zot maryaz, i tre probab ki i pou ganny bann konsey ki pli spesifik. Sa koup i kapab dir li ki mannyer pour aplik bann konsey sorti dan Labib e osi ki zot in aprann dan zot prop maryaz.

10. Ki nou pou vwar aprezan?

¹⁰ Ziska aprezan, nou’n vwar bann kalite ki nou bezwen annan e lekel ki kapab donn nou bann bon konsey. Aprezan annou vwar ki mannyer nou kapab montre ki nou vreman anvi ganny konsey e si nou devret demann lezot pour fer bann desizyon pour nou.

KI MANNYER MON KAPAB MONTRE KI MON VREMAN ANVI GANNY KONSEY?

11-12. (a) Ki serten dimoun i fer? (b) Ki Lerwa Reoboam ti fer ler i ti bezwen fer en desizyon enportan?

¹¹ Parfwa, en dimoun i kapab fer konmsi i pe rod konsey me an realite i’n fini deside ki i anvi fer e i pe zis gete si lezot i dakor avek sa ki i’n deside. En dimoun koumsa pa vreman anvi ganny konsey. Sa dimoun i devret aprann avek sa ki ti arive avek Lerwa Reoboam.

¹² Reoboam ti vin lerwa Izrael apre Lerwa Salomon. Ler Reoboam ti vin lerwa, nasyon Izrael ti pe prospere me bann dimoun ti santi ki Salomon ti fer zot travay tro dir. Bann dimoun ti vin kot Reoboam e zot ti sipliy li pour fer zot travay vin pli fasil. Reoboam ti demann zot pour donn li letan pour li reflesir lo ki desizyon i pou fer. Premyerman, i ti demann konsey avek bann zonm pli aze ki ti’n ed Salomon e sa ti en bon keksoz. (1 Rwa. 12:2-7) Malerezman i pa ti aksepte konsey sa bann zonm pli aze. Petet akoz i ti fer sa? Eski i ti’n fini deside ki i pou fer e aprezan i ti pe rod en dimoun ki ti pou dakor avek sa desizyon ki i ti’n fer? Si wi, i ti kontan ler i ti demann konsey son bann zanmi ki ti pli zenn e zot ti dakor avek sa ki i ti’n deside. (1 Rwa. 12:8-14) Reoboam ti dir bann dimoun sa ki son bann zanmi ti’n dir. Sa ti fer ki serten dimoun ti rebele e zot ti swazir en lot lerwa. Depi sa zour, Reoboam ti kontinyen ganny problenm.—1 Rwa. 12:16-19.

13. Ki mannyer nou kapab konnen si nou vreman anvi ki lezot i konsey nou?

¹³ Ki nou kapab aprann avek sa ki Reoboam ti fer? Ler nou rod konsey, nou pa’n devret fini fer nou desizyon. Nou devret pare pour ekout sa konsey ki nou gannyen. Alor demann nou lekor: “Eski mon demann konsey e apre mon inyor sa konsey parski i pa sa ki mon anvi tande?” Annou vwar en legzanp.

14. Ler nou ganny konsey, ki nou bezwen gard antet? Donn en legzanp. (Vwar portre.)

¹⁴ Meton en frer i ganny ofer en travay ki pey byen. Avan i aksepte sa travay, i demann en ansyen konsey. Sa frer i mansyonnen ki si i aksepte sa louvraz, i pou pas en kantite letan lwen avek son fanmir. Sa ansyen i fer sa frer rapel sa prensip Labib ki dir ki son responsabilite prensipal i pour pran swen avek son fanmir spirityelman. (Efe. 6:4; 1 Tim. 5:8) Meton sa frer pa dakor avek sa ki sa ansyen in dir e i demann lezot frer konsey, ziska ki enn i dir li sa ki i anvi tande. Eski sa frer pe vreman rod konsey oubyen eski i’n fini deside ki i pou fer e i pe zis rod en dimoun pour dakor avek sa ki i’n deside? Nou bezwen gard antet ki nou leker i tret. (Zer. 17:9) Parfwa sa konsey ki nou pli bezwen, i sa enn ki nou pli pa anvi tande.

ESKI MON DEVRET DEMANN LEZOT POUR FER DESIZYON POUR MWAN?

15. Ki nou pa devret fer e akoz?

¹⁵ Nou tou nou annan sa responsabilite pour fer nou prop desizyon. (Gal. 6:4, 5) Parey nou’n vwar, en dimoun ki saz pou rod konsey dan Parol Bondye e avek bann Kretyen matir avan i fer en desizyon. Me nou pa devret demann lezot pour fer desizyon pour nou. Serten i kapab fer sa par demann en dimoun ki zot annan konfyans ladan: “Ki ou ti pou fer si ou ti dan mon plas?” Lezot i kapab zis fer menm desizyon ki en lot dimoun in fer, san reflesir pour zot menm.

16. Ki ti arive Korent konsernan lavyann ki ti’n ganny sakrifye avek zidol e lekel ki ti annan sa responsabilite pour deside si ou kapab manz sa lavyann? (1 Korentyen 8:7; 10:25, 26)

¹⁶ Mazin sa ki ti arive dan kongregasyon Korent dan premye syek. Bann Kretyen ti bezwen fer en desizyon konsernan lavyann ki petet ti’n ganny sakrifye avek bann zidol. Pol ti dir sa bann Kretyen: “Nou konnen ki en zidol pa nanryen ditou e i annan en sel Bondye.” (1 Kor. 8:4) Vi ki Pol ti’n dir sa, serten dan kongregasyon ti deside ki zot ti kapab manz lavyann ki petet ti’n ganny ofer avek zidol e ki apre ti ganny vann dan bazar. Me lezot ti deside ki zot pa ti pou kapab manz sa lavyann akoz sa ti pou fatig zot konsyans. (Lir 1 Korentyen 8:7; 10:25, 26.) Sa ti en desizyon personnel. Pol pa ti zanmen konsey bann frer ek ser Korent pour fer desizyon pour lezot oubyen pour fer menm desizyon ki lezot. Sakenn ti pou “rann kont avek Bondye pour son prop lekor.”—Rom. 14:10-12.

17. Ki i kapab arive si nou fer sa ki lezot i fer? Donn en legzanp. (Vwar portre.)

¹⁷ Ki mannyer en keksoz koumsa i kapab arive ozordi? Pran par egzanp, sa size disan. Sak Kretyen i bezwen deside pour li menm si i pou aksepte oubyen refiz bann fraksyon disan.b Petet nou vwar li difisil pour konpran sa size me nou tou nou bezwen fer nou prop desizyon konsernan sa size. (Rom. 14:4) Si nou fer sa ki lezot i fer, nou kapab afebli nou konsyans e nou pa pou zanmen vin saz. Pour nou kapab vin saz, nou bezwen fer nou prop desizyon baze lo sa ki Labib i dir. (Ebr. 5:14) Alor kan ki nou devret demann en Kretyen matir konsey? Nou kapab demann konsey apre ki nou’n fer nou prop resers me nou ankor bezwen led pour konpran ki mannyer bann prensip Labib i relye avek nou sityasyon.

KONTINYEN ROD KONSEY

18. Ki Zeova in fer pour nou?

¹⁸ Zeova in montre ki i annan konfyans dan nou par les nou fer nou prop desizyon. I’n donn nou son Parol, Labib e i’n donn nou bann zanmi saz ki kapab ed nou konpran ki mannyer pour aplik bann prensip Labib. Dan sa fason, i desarz son responsabilite konman nou Papa. (Prov. 3:21-23) Ki mannyer nou kapab montre Zeova ki nou rekonesan pour son gidans?

19. Ki mannyer nou kapab kontinyen fer Zeova kontan?

¹⁹ Bann paran i kontan pour vwar zot zanfan grandi e vin bann serviter Zeova ki saz e ki ed lezot. Dan menm fason, Zeova i kontan ler i vwar nou pe kontinyen vin pli matir, ler i vwar nou demann konsey e fer bann desizyon ki montre ki nou kontan li.