Aprann ki mannyer pour donn konsey

1. Lekel ki bezwen donn konsey e akoz?

KI MANNYER ou santi konsernan donn konsey lezot? Serten dimoun i kontan pour donn konsey. Lezot i ezite pour donn konsey e zot santi zot enkonfortab ler zot pe donn konsey. Nenport fason ki ou santi, nou tou nou oblize donn konsey tanzantan. Akoz? Parski Zezi ti dir ki dimoun ti pou konn son bann vre disip par sa lanmour ki zot demontre anver kanmarad. (Zan 13:35) En fason ki nou montre ki nou kontan nou bann frer ek ser i par donn zot konsey ler zot bezwen. Parol Bondye i dir ki ler nou donn “konsey ki senser,” sa i fer nou lanmitye avek lezot vin pli for.—Prov. 27:9.

2. Ki bann ansyen i bezwen kapab fer e akoz? (Vwar bwat “Bann konsey ki ganny donnen pandan renyon lasemenn.”)

² Bann ansyen i bezwen kapab donn bon konsey lezot. Zeova ek Zezi in donn sa bann zonm sa responsabilite pour pran swen avek kongregasyon. (1 Pyer 5:2, 3) En fason ki zot fer sa, i ler zot fer bann diskour ki enkli bann konsey ki sorti dan Parol Bondye. Zot osi bezwen donn konsey bann frer ek ser endividyelman. Sa i enkli bann ki’n kit kongregasyon. Ki mannyer bann ansyen e nou osi, nou kapab donn bann bon konsey?

3. (a) Ki mannyer nou kapab aprann pour donn bann bon konsey lezot? (Izai 9:6; vwar bwat “Swiv legzanp Zezi ler ou pe donn konsey.”) (b) Ki nou pou vwar dan sa lartik?

³ Nou kapab aprann ki mannyer pour donn bann bon konsey par etidye legzanp bann dimoun dan Labib ki ti donn konsey lezot. Zezi ti toultan donn bann pli bon konsey. Enn bann tit ki Zezi i annan i “Konseye merveye.” (Lir Izai 9:6.) Dan sa lartik, nou pou vwar ki nou kapab fer ler nou ganny demande pour donn konsey e ki nou kapab fer ler nou bezwen donn konsey en dimoun menm si i pa’n demann nou. Nou pou osi vwar akoz i enportan pour donn konsey dan sa bon moman e dan sa bon fason.

LER NOU GANNY DEMANDE POUR DONN KONSEY

4-5. Ler en dimoun i demann nou konsey, ki kestyon nou devret demann nou lekor avan nou donn li konsey? Donn en legzanp.

⁴ Ler en dimoun i demann nou konsey, kwa ki devret nou premye reaksyon? Petet nou kontan ki nou zanmi i annan konfyans dan nou e nou anvi ed li deswit. Me avan ki nou donn konsey, nou devret demann nou lekor: “Eski mon konn ase lenformasyon lo sa size pour mwan kapab donn li bann bon konsey?” Parfwa sa pli bon fason ki nou kapab ed nou zanmi, i pa donn li konsey. O kontrer nou devret ed li pour trouv en dimoun ki konn sa size byen pour donn li konsey.

⁵ Annou vwar en legzanp. Meton enn ou bon zanmi i tonm malad e sa maladi i grav. I dir ou ki i’n konmans fer resers konsernan bann tretman ki disponib e apre i demann ou, ou lopinyon konsernan ki tretman ou krwar i pli bon. Petet ou prefer enn parmi sa bann tretman me ou pa en dokter e ou pa’n ganny okenn formasyon lo ki mannyer pour tret sa maladi. Dan sa ka, sa pli bon fason ki ou kapab ed ou zanmi i pour ed li trouv en dimoun ki kalifye pour ed li.

6. Akoz nou kapab swazir pour esper en pe letan avan nou donn konsey?

⁶ Parfwa nou kapab santi ki nou kalifye pour donn nou zanmi konsey me petet nou swazir pour esper en pe letan avan ki nou donn li sa konsey. Akoz? Proverb 15:28 i dir ki “en bon dimoun i reflesir avan i reponn.” Alor, menm si nou krwar nou konnen ki pour dir li, i ti pou byen ki nou premyerman fer resers, priye e reflesir lo sa konsey ki nou pe al donnen. Koumsa nou kapab asire ki nou larepons i an armoni avek pwennvi Zeova lo sa size. Annou vwar legzanp profet Natan.

7. Ki ou aprann avek legzanp profet Natan?

⁷ Lerwa David ti dir profet Natan ki i ti anvi konstri en tanp pour Zeova. Deswit Natan ti dir David ki sa ti en bon keksoz pour fer. Me Natan ti’n devret premyerman demann Zeova si i ti anvi David i fer sa. Akoz? Parski Zeova pa ti anvi ki David ki konstri tanp. (1 Kron. 17:1-4) Parey nou vwar dan sa legzanp, ler en dimoun i demann nou konsey, i saz ki nou “pran letan avan koze.”—Zak 1:19.

8. Ki en lot rezon akoz nou bezwen fer atansyon ler nou pe donn konsey?

⁸ Annou vwar en lot rezon akoz nou devret fer atansyon ler nou pe donn en dimoun konsey. Si sa konsey ki nou donnen i fer en dimoun fer en desizyon ki anmenn bann move konsekans, dan en serten fason nou osi nou kapab responsab pour sa ki’n arive. I kler alor ki i vreman enportan ki nou reflesir byen avan ki nou donn konsey.

KI MANNYER NOU KAPAB DONN KONSEY MENM SI SA DIMOUN PA’N DEMANN KONSEY?

9. Ki bann ansyen i bezwen fer sir avan ki zot donn en dimoun konsey? (Galat 6:1)

⁹ Parfwa bann ansyen i bezwen pran linisyativ pour apros en frer oubyen ser ki’n pran “en move semen” pour donn li konsey. (Lir Galat 6:1.) En not letid dan Labib an Angle pour sa verse i dir ki i kapab ki sa dimoun pa ankor fer en pese grav me i pe fer bann move desizyon ki kapab fer li fer en pese grav. Lobzektif bann ansyen i pour ed sa dimoun pour kontinyen reste lo sa semen ki anmenn ver lavi eternel. (Zak 5:19, 20) Me pour sa konsey kapab annan en lefe, bann ansyen i bezwen premyerman fer sir ki sa dimoun in vreman pran en move semen. Zot realize ki tou dimoun i fer desizyon dapre zot konsyans e ki sa pa vedir ki sa dimoun pe fer en keksoz ki pa fer Zeova plezir. (Rom. 14:1-4) Me si bann ansyen i realize ki sa dimoun in vreman pran en move semen, ki mannyer zot kapab pran linisyativ pour konsey sa dimoun?

10-12. Ki bann ansyen i devret fer ler zot pe donn konsey en dimoun ki pa’n demann konsey? Eksplike. (Vwar portre.)

¹⁰ I pa fasil pour bann ansyen donn konsey en dimoun ki pa’n demann zot konsey. Akoz? Zapot Pol ti dir ki en dimoun i kapab pran en move semen san ki i realize. Alor, avan ki bann ansyen i donn sa dimoun konsey, i annan serten keksoz ki zot devret fer pour fer li pli fasil pour sa dimoun aksepte sa konsey.

¹¹ Ler bann ansyen i bezwen donn konsey en dimoun ki pa’n demann konsey, sa i kapab parey ler en fermye i esey fer en plant pouse dan en later ki dir. Avan ki sa fermye i konmans senm lagrenn, i bezwen kas sa later. Sa i prepar sa later e i fer sa later mou pour sa fermye kapab plant sa lagrenn. Apre sa fermye i plant sa lagrenn. Ler i fini fer sa, i aroz sa lagrenn pour fer li pouse. Dan menm fason, ler bann ansyen i bezwen donn konsey en dimoun ki pa’n demann konsey, dan en sans li osi i bezwen prepar later, setadir fer li fasil pour sa dimoun aksepte sa konsey. Par egzanp, i esper en moman apropriye e apre i asir sa dimoun ki i kontan li e i dir li ki i annan en keksoz ki i anvi koz avek li lo la. Si sa dimoun ki pe donn konsey i annan en repitasyon konman en dimoun ki demontre lanmour ek labonte, sa pou fer li pli fasil pour lezot aksepte son konsey.

¹² Pandan ki sa ansyen pe koz avek sa dimoun, i kapab kontinyen fer li fasil pour sa dimoun aksepte konsey, par fer li rapel ki tou dimoun i fer fot e ki nou tou nou bezwen konsey parfwa. (Rom. 3:23) Sa ansyen i koz dan en fason kalm e avek respe i servi bann verse Labib pour montre sa dimoun ki i’n pran en move semen. Enn fwa ki sa dimoun in rekonnet ki i’n fer en fot, sa ansyen i “plant sa lagrenn” par eksplik li dan en fason senp ki i bezwen fer pour aranz sa sityasyon. Finalman i “aroz” sa lagrenn par senserman felisit sa dimoun pour bann bon keksoz ki i pe fer e par priy avek li.—Zak 5:15.

13. Ki mannyer bann ansyen i kapab fer sir ki sa dimoun in konpran konsey ki i’n gannyen?

¹³ Parfwa, sa ki sa dimoun ki pe donn konsey i dir e sa ki sa dimoun ki pe ganny konsey i tande, i de diferan keksoz. Ki bann ansyen i kapab fer pour anpes sa arive? Dan en fason zantiy, sa ansyen i kapab demann kestyon pour vwar si sa dimoun in konpran sa konsey e si i konnen ki mannyer pour aplik sa konsey.—Ekle. 12:11.

DONN KONSEY DAN SA BON MOMAN E DAN SA BON FASON

14. Eski nou devret donn konsey ler nou ankoler? Eksplike.

¹⁴ Nou tou nou enparfe alor parfwa i kapab arive ki nou dir oubyen fer en keksoz ki ofans lezot. (Kol. 3:13) Labib i dir ki lezot i kapab dir oubyen fer en keksoz ki fer nou ankoler. (Efe. 4:26) Me nou pa devret donn konsey ler nou ankoler. Akoz? Parski “ler en dimoun i pran lakoler, i pa azir an armoni avek ladrwatir Bondye.” (Zak 1:20) Si nou donn konsey dan lakoler, i kapab ki nou fer sa sityasyon vin pli grav. Sa pa vedir ki nou pa devret zanmen eksprim nou santiman avek en dimoun ki’n fer nou ankoler. Me nou devret espere ziska ki nou’n kalm avan nou koz avek sa dimoun. Nou kapab aprann avek legzanp Eliou ki ti donn Zob bann bon konsey.

15. Ki nou aprann avek legzanp Eliou? (Vwar portre.)

¹⁵ Pour plizyer zour, Zob ti esey defann son lekor ler son bann swadizan zanmi ti fer bann fo lakizasyon kont li. Pandan sa bann zour, Eliou ti ekout Zob koze e i ti annan konpasyon pour li. Me Eliou ti osi ankoler parski Zob ti pe dir bann keksoz ki pa ti vre lo Zeova e i ti pe konsantre tro bokou lo son lekor. Me kantmenm sa, Eliou ti esper son tour pour koze e ler i ti donn Zob konsey, i ti koz dan en fason kalm e avek respe. (Zob 32:2; 33:1-7) Legzanp Eliou i ansenny nou en keksoz enportan. I pli bon pour donn konsey dan sa bon moman e dan sa bon fason avek respe ek lanmour.—Ekle. 3:1, 7.

KONTINYEN DONN E AKSEPTE KONSEY

16. Ki nou aprann dan Psonm 32:8?

¹⁶ Dan verse tenm pour sa lartik, Zeova i dir: “Mon pou donn ou konsey e mon pou vey lo ou.” (Lir Psonm 32:8.) Sa i vedir ki i kontinyen ed nou. I pa zis donn nou konsey me i osi ed nou pour aplik konsey. Sa i en bon legzanp pour nou. Ler nou annan sa privilez pour donn konsey lezot, annou swiv legzanp Zeova par vey lo zot e par kontinyen donn zot sa led ki zot bezwen pour reisi.

17. Dapre Izai 32:1, 2, bann ansyen ki donn bann konsey spesifik sorti dan Labib i ganny konpare avek kwa? Eksplike.

¹⁷ Plis ki zanmen oparavan, nou bezwen donn konsey e aksepte bon konsey. (2 Tim. 3:1) “Parey bann pti larivyer dan en landrwa kot napa delo” i rafresir en dimoun, bann ansyen ki donn bann konsey spesifik ki sorti dan Labib, i ankouraz nou e ed nou pour kontinyen servi Zeova. (Lir Izai 32:1, 2.) Nou vreman rekonesan pour bann zanmi ki menm si zot konnen ki nou anvi tande, zot pa ezite pour dir nou sa ki nou bezwen tande. Zot parol i parey “bann ponm annor dan bann resipyan annarzan.” (Prov. 25:11) Ki nou tou, nou kontinyen devlop sa lasazes ki nou bezwen pour donn e aksepte bann bon konsey.