“Lager i pour Zeova”

Sa problenm ti konmanse tar dan bann lannen 1990 ler gouvernman Lafrans ti dir ki biro brans Temwen Zeova dan sa pei ti bezwen pey taks lo bann donasyon ki zot ti’n gannyen ant 1993 ek 1996. Nou ti esey rod lazistis devan bann lakour Lafrans me nou pa ti gannyen. Apre ki nou ti’n perdi nou ka devan en lakourdapel, gouvernman ti pran larzan lo kont labank biro brans Lafrans lavaler apepre 4.5 milyon ero (6,300,000 dolar Ameriken). Sa sel mwayen ki nou ti kapab reganny sa larzan i par anmenn sa ka devan lakour ECHR. Me avan ki sa lakour ti pas zizman lo nou ka, zot ti dir ki nou devret zwenn avek bann avoka gouvernman Lafrans ansanm avek en reprezantan sa lakour pour vwar si nou ti kapab tonm lo en lagreman avan ki sa ka i al ankour.

Nou ti mazinen ki sa madanm ki ti pe reprezant Lakour Eropeen ti pou met presyon lo nou pour rezourd sa sityasyon deswit par agree pour pey en porsyon sa larzan ki gouvernman Lafrans ti pe demande. Me nou ti konpran ki si nou ti pey menm en ero, sa pou al kont bann prensip Labib. Bann frer ek ser ti’n volonterman fer kontribisyon pour siport sa travay Rwayonm e sa ti fer ki zot kontribisyon pa ti pour gouvernman. (Mat. 22:21) Me kantmenm sa, nou ti al sa renyon pour montre ki nou respekte lareg Lakour Eropeen.

Nou ti zwenn pour sa renyon dan enn bann zoli lasanm konferans ki Lakour Eropeen i annan. Me sa renyon ti mal konmanse. Dek ki sa reprezantan ti konmans koze, i ti dir ki i ti ekspekte ki Temwen Zeova Lafrans i pey en porsyon sa taks ki gouvernman ti’n demande. En sel kou nou ti demann li: “Eski ou konnen ki gouvernman in fini pran apepre 4.5 milyon ero dan nou kont labank?”

Lekspresyon lo son figir ti montre nou ki i ti soke pour tann sa. Ler bann reprezantan gouvernman ti konfirmen ki zot ti’n pran sa larzan, latitid sa madanm ti sanz konpletman. I ti reprimann zot e aret sa renyon deswit. Dan sa moman mon ti realize, ki dan en fason ki nou pa ti pou’n zanmen kapab mazinen, Zeova ti’n sanz tou keksoz pour nou kapab ganny nou ka. Nou ti kit sa renyon avek leksitasyon e nou pa ti kapab krwar sa ki ti’n arive!

Le 30 Zen 2011, Lakour Eropeen ti fer en desizyon kot tou bann ziz ti dakor e nou ti ganny nou ka. Zot ti dir ki sa taks ti ilegal e zot ti donn lord gouvernman pour rann tou sa larzan ki zot ti’n pran e zot ti devret osi pey lentere. Sa desizyon legal i vreman enportan e i protez ladorasyon pir Lafrans ziska ozordi. Sa kestyon ki nou pa ti ni menm plàn pour demande ti parey sa ros ki ti anfons dan latet Golyat. I ti sanz rezilta sa ka. Akoz nou ti ranport laviktwar? Parski zis parey David ti dir Golyat, “lager i pour Zeova.”—1 Sam. 17:45-47, not.

Sa pa ti sa sel fwa ki nou ti ranport laviktwar ankour. Menm si bann gouvernman ek larelizyon pwisan in opoz nou, ziska aprezan nou’n ranport laviktwar dan apepre 1,225 ka dan bann lakour pli o dan 70 pei e dan plizyer lakour enternasyonal. Sa bann laviktwar i protez nou bann drwa fondamantal. Par egzanp, nou drwa legal konman en larelizyon, pour fer sa travay predikasyon, pour refize partisip dan bann seremoni patriyotik e pour refize aksepte transfizyon disan.

Ki mannyer mon enplike dan bann ka legal Lerop menm si mon ti servi dan Biro prensipal Temwen Zeova ki baze New York, Leta-z-ini Lanmerik?

MON TI GANNY ELVE PAR BANN PARAN DEVOUE

Mon paran ti apel George ek Lucille e zot ti asiste 12yenm laklas Lekol Gilead. Mon ti ne an 1956, ler zot ti pe servi Letyopi. Zot ti apel mwan Philip, parey sa predikater dan premye syek. (Akt 21:8) Son lannen answit, gouvernman ti enterdi nou ladorasyon. Menm si mon ti ankor en zanfan, mon rapel ki nou ti ador Zeova an sekre. Konman en zanfan, mon ti krwar ki sa ti eksitan! Malerezman an 1960, bann zofisye ti fors nou pour kit sa pei.

Nou fanmir ti al reste Wichita, Kansas, Leta-z-ini Lanmerik e mon paran ti anmenn en keksoz vreman spesyal avek zot, setadir sa lanmour ki zot ti annan pour sa travay predikasyon parey ler zot ti misyonner. Zot ti viv dapre bann standar laverite e zot ti ansenny mwan, mon gran ser Judy ek mon pti frer, Leslie, ki zot osi zot ti’n ne Letyopi, pour kontan Zeova e pour servi li avek tou nou leker. Mon ti batize ler mon ti annan 13 an. Trwa-z-an apre, nou fanmir ti al reste Arequipa, Perou, kot ti annan bezwen pour plis proklanmater.

An 1974 ler mon ti annan zis 18 an, biro brans Perou ti demann mwan ansanm avek kat frer pour servi konman pionye spesyal. Nou ti ganny demande pour al pres dan bann teritwar kot personn pa ti’n deza prese, anler dan bann montanny santral Andes. Sa ti enkli koz avek bann dimoun ki koz Quechua ek Aymara. Nou ti vwayaz dan en transpor ki nou ti osi reste ladan. Nou ti apel sa transpor Lars parski i ti parey en gro bwat. Mon kontan mazin bann moman kot nou ti servi Labib pour montre bann dimoun ki byento Zeova pour tir lapovrete, maladi ek lanmor. (Rev. 21:3, 4) En kantite zot ti aksepte sa mesaz Rwayonm.

MON TI GANNY ANVOYE BIRO PRENSIPAL

An 1977 pandan ki Albert Schroeder, ki ti en manm Konsey Direkter Temwen Zeova, ti pe vizit Perou, i ti ankouraz mwan pour fer laplikasyon pour al servi dan Betel kot biro prensipal. Mon ti fer sanmenm e le 17 Zen 1977, mon ti konmans mon servis dan Betel Brooklyn. Pandan sa prosenn kat-r-an, mon ti servi dan departman netwayaz ek mentenans.

An Zen 1978, mon ti zwenn Elizabeth Avallone dan en lasanble enternasyonal ki ti ganny fer New Orleans, Louisiana. Li osi i ti’n ganny elve par bann paran ki ti servi Zeova avek tou zot leker. Sa letan, Elizabeth ti’n en pionye ordiner pour kat-r-an e i ti anvi kontinyen servi Zeova a plen tan tou son lavi. Nou ti gard kontak. Nou ti aprann konn kanmarad e nou ti tonm anmoure. Nou ti marye le 20 Oktob 1979 e nou ti konmans servi ansanm dan Betel.

Nou premye kongregasyon ti Brooklyn Spanish e bann frer ek ser dan sa kongregasyon ti demontre lanmour anver nou. Pandan trwa-z-an, nou ti servi dan trwa lezot kongregasyon e zot tou zot ti akeyir nou e siport nou dan nou servis Betel. Nou vreman apresye zot sipor ek sipor nou bann zanmi ek fanmir ki ti ed nou pran swen avek nou paran dan zot vye zour.

MON TI ED LORGANIZASYON AVEK BANN KA ANKOUR

An Zanvye 1982, mon ti sirprann pour ganny demande pour al servi dan Departman Legal dan Betel. Trwa-z-an pli tar, mon ti ganny demande pour al liniversite pour mwan kapab vin en avoka. Pandan bann laklas liniversite, mon ti sirprann pour aprann ki dimoun Leta-z-ini ek dan lezot pei i annan sa liberte pour fer bokou keksoz akoz bann laviktwar ki Temwen Zeova in gannyen ankour. Sa bann ka enportan ti ganny diskite an detay pandan laklas.

An 1986 ler mon ti annan 30 an, mon ti ganny apwente konman sirveyan pour Departman Legal. Mon ti santi ki i en loner ki Betel ti annan konfyans dan mwan menm si mon ti ankor vreman zenn. Me mon ti osi santi ki i pou en travay difisil parski i ti annan en kantite keksoz ki mon pa ti konnen.

An 1988, mon ti kalifye konman en avoka me mon pa ti realize ki mon ti’n les sa lakonplisman annan en lefe lo mwan e lo mon lanmitye avek Zeova. Ler nou fer letid avanse, sa i kapab fer nou vin en dimoun ki toultan anvi vin pli enportan e santi ki nou pli siperyer ki lezot ki pa’n annan menm ledikasyon. Elizabeth ti ed mwan pour repran mon routin spirityel ki mon ti annan avan mon ti al liniversite. I ti pran en pe letan me ptitapti mon ti santi mwan pros avek Zeova ankor. Atraver mon leksperyans, mon’n aprann ki zis annan en ta konnesans, i pa sa keksoz pli enportan dan lavi. Sa ki fer nou lavi vreman presye i ler nou annan en bon lanmitye avek Zeova e nou kontan li ek son pep en kantite.

MON TI EDE DEFANN E ETABLI NOU DRWA LEGAL POUR ANONS SA BON NOUVEL

Vi ki mon ti nepli liniversite, mon ti konsantre lo ede organiz bann travay ki nou departman ti pou fer dan Betel e pour defann lorganizasyon Zeova ek nou drwa pour anons sa bon nouvel. Mon travay ti vreman eksitan me i ti osi difisil parski bann keksoz ti pe sanz vitman dan lorganizasyon. Par egzanp, oparavan nou ti abitye demann dimoun kontribisyon pour nou bann piblikasyon me apartir 1991, Departman Legal ti ganny demande pour ede donn bann lenstriksyon lo ki mannyer nou kapab aret fer sa. Apre sa, Temwen Zeova ti fer sa bann keksoz disponib gratwitman. Sa ti senplifye keksoz Betel e dan predikasyon e ziska ozordi, sa i ede pour protez sa bann aktivite e evite ki nou ganny problenm konsernan taks. Serten dimoun ti krwar ki sa sanzman ti pou fer nou perdi bokou larzan ki ti pou fer nou napa ase piblikasyon pour donn dimoun e sa ti pou diminyen lakantite dimoun ki ti pou aprann konsernan Zeova. Me pa sa ki ti arive. Depi 1990, lakantite dimoun ki servi Zeova in plis ki double e ozordi tou dimoun i kapab ganny akse avek sa manze spirityel ki sov lavi, gratwitman. Mon’n vwar personnelman ki sa bann sanzman in reisi zis akoz sipor Zeova ek sa gidans ki i donn nou atraver sa lesklav fidel.—Egz. 15:2; Mat. 24:45.

Nou pa ranport laviktwar ankour zis akoz nou annan bann bon avoka. Souvandfwa, i bon kondwit pep Bondye ki motiv bann ki annan lotorite pour ed nou. Mon ti vwar en legzanp ki montre sa an 1998 ler trwa manm Konsey Direkter ek zot madanm ti asiste bann lasanble spesyal Kiba. Zot ti demontre labonte ek respe e zot fason fer ti konvenk bann zofisye gouvernman ki nou pa mel dan bann zafer politik, plis ki okenn keksoz ki nou ti dir dan bann miting.

Me ler bann lenzistis pa kapab ganny rezourd dan en fason amikal, nou ti “defann e etabli nou drwa legal pour anons sa bon nouvel” ankour. (Fili. 1:7) Par egzanp, pour plizyer dizenn lannen, bann gouvernman Lerop ek Sid Kore pa ti aksepte ki nou annan drwa pour pa fer servis militer. Sa i fer ki apepre 18,000 frer Lerop ek plis ki 19,000 frer Sid Kore ti ganny met dan prizon parski zot konsyans pa ti permet zot pour fer servis militer.

Finalman le 7 Zilyet 2011, ECHR ti fer en desizyon istorik dan ka Bayatyan v. Armenia. Sa desizyon ti dir ki tou pei Eropeen i devret permet bann ki refize fer servis militer akoz zot krwayans relizye, fer en lot servis dan sa pei. Apre sa, le 28 Zen 2018, Lakour Konstitisyonnel Sid Kore ti fer en desizyon en pe parey. Sa laviktwar pa ti pou’n posib si en pti group parmi nou bann zenn frer pa ti’n reste fidel.

Departman Legal kot biro prensipal e dan lezot biro brans partou dan lemonn pe travay dir pour defann nou drwa pour ador Zeova e anons sa mesaz Rwayonm. I en loner pour nou defann nou bann frer ek ser ki pe ganny opoze par bann gouvernman. Ki swa nou ranport laviktwar ankour oubyen non, sa ki nou fer i donn en temwannyaz avek bann gouverner ek lerwa ek dimoun lezot nasyon. (Mat. 10:18) Bann ziz, reprezantan gouvernman, medya e piblik an zeneral, i bezwen reflesir lo bann verse Labib ki nou enkli dan tou nou bann dokiman e ki nou koz lo la ankour ler nou pe defann nou ka. Bann ki annan leker senser i aprann konsernan Temwen Zeova e ki nou krwayans i baze lo Labib. Serten parmi sa bann dimoun in vin bann Kretyen.

MERSI ZEOVA!

Pandan sa 40 an ki’n pase, mon’n annan sa privilez pour travay lo bann ka legal avek bann biro brans partou dan lemonn e pour pas devan plizyer gran lakour e o zofisye. Mon kontan e annan respe pour bann frer ek ser ki travay dan Departman Legal kot biro prensipal e dan lezot departman legal partou dan lemonn.

Pandan sa dernyen 45 an, Elizabeth in demontre lanmour anver mwan e fidelman siport mwan, dan botan e dan movetan. Mon apresye li parski i’n fer sa menm si i annan en maladi ki afebli son sistenm defans e fer li napa bokou lenerzi.

Nou’n vwar personnelman, ki nou pa ganny lafors ek laviktwar akoz bann abilite ki nou annan. Parey David ti dir: “Zeova i sa Enn ki donn lafors son pep.” (Ps. 28:8) San okenn dout, “lager i pour Zeova.”