Ki mannyer ou kapab amelyor ou lapriyer?

1-2. (a) Kwa ki kapab anpes nou devid nou leker avek Zeova? (b) Ki mannyer nou konnen ki Zeova i ekout nou lapriyer?

ESKI parfwa ou santi ki dan ou bann lapriyer, ou repet menm keksoz, ki ou lapriyer i alalezer e ki in vin zis parey en routin? Si wi, ou pa tousel. Vi ki nou annan en kantite keksoz pour fer, sa i kapab fer nou fer lapriyer vitman. Oubyen nou kapab vwar li difisil pour devid nou leker avek Zeova parski nou santi ki nou pa merite koz avek li dan lapriyer.

² Labib i asir nou ki sa ki enportan pour Zeova i pa ki nou dir bann gran gran mo dan nou lapriyer me ki nou lapriyer i senser. I tann “lapriyer bann ki annan limilite.” (Ps. 10:17) I ekout byen tou sa ki nou dir parski i vreman enterese avek nou.—Ps. 139:1-3.

3. Ki bann kestyon nou pou reponn dan sa lartik?

³ Petet nou kapab demande: Akoz nou kapab santi nou lib pour priy Zeova? Ki mannyer nou kapab fer nou lapriyer pli profon? Ki mannyer ler nou reflesir lo bann lapriyer ki’n ganny rikorde dan Labib, sa i kapab ed nou pour amelyor nou prop lapriyer? Ki nou kapab fer si nou sitan enkyet ki nou pa kapab eksplik Zeova ki mannyer nou pe santi? Annou vwar larepons sa bann kestyon.

SANTI OU LIB POUR PRIY AVEK ZEOVA

4. Kwa ki kapab ed nou pour santi nou lib pour priy Zeova? (Psonm 119:145)

⁴ Si nou vwar Zeova konman en zanmi fidel ki anvi nou reisi, sa pou fer nou santi nou lib pour koz avek li. Ekriven Psonm 119 ti fer zefor pour annan sa kalite lanmitye avek Zeova. Sa ekriven ti annan problenm. Bann move dimoun ti dir bann mansonz lo li. (Ps. 119:23, 69, 78) Parfwa i ti dekouraze akoz bann fot ki i ti fer. (Ps. 119:5) Kantmenm sa, i pa ti per pour devid son leker avek Zeova.—Lir Psonm 119:145.

5. Akoz nou pa devret les bann santiman negatif anpes nou priye? Donn en legzanp.

⁵ Zeova i envit menm bann ki’n fer bann fot grav pour koz avek li dan lapriyer. (Iza. 55:6, 7) Alor, nou pa devret les bann santiman negatif anpes nou priye. Pour ed nou konpran sa, annou vwar en legzanp. En pilot i konnen ki i kapab koz avek bann kontroler dan erport si i bezwen led. Eski i pou ezite pour kontakte zot parski i anbarase ki i’n perdi oubyen ki i’n fer en fot? Non. Dan menm fason, si parfwa ou santi ki ou pa konnen ki pour fer oubyen ou’n fer pese, pa bezwen per pour koz avek Zeova dan lapriyer.—Ps. 119:25, 176.

KI MANNYER OU KAPAB FER OU LAPRIYER PLI PROFON?

6-7. Ki mannyer ler nou medit lo bann kalite ki Zeova i annan, sa i ed nou pour fer nou lapriyer pli profon? Donn en legzanp. (Vwar not.)

⁶ Ler nou santi nou lib pour koz avek Zeova e nou dir li sa ki nou pe vreman mazinen e santi, sa pou fer nou lapriyer vin pli profon. Ki mannyer nou kapab fer sa?

⁷ Medit lo bann kalite ki Zeova i annan.a Pli nou medit lo son bann kalite, pli i pou fasil pour nou eksprim nou. (Ps. 145:8, 9, 18) Annou vwar legzanp en ser ki apel Kristine ki son papa ti vyolan. I dir: “I ti difisil pour mwan vwar Zeova konman en papa e pour koz avek li. Mon ti krwar ki mon bann lenperfeksyon ti pou fer li abandonn mwan.” Ki kalite ki Zeova i annan ki ti ed Kristine? I dir: “Mon ti reflesir lo lanmour fidel Zeova e sa ti reasir mwan ki Zeova i kontan mwan. Mon konnen ki i pa pou larg mon lanmen. Menm si mon fer fot, i pou kontinyen kontan mwan e ed mwan. Sa i fer li pli fasil pour mwan koz avek li lo sa ki fer mwan zwaye e sa ki fer mwan sagren.”

8-9. Ki serten byenfe nou kapab gannyen ler nou reflesir lo sa ki nou pou dir avan nou priye? Donn en legzanp.

⁸ Reflesir lo sa ki ou pou dir. Avan ou priye, petet ou kapab demann ou lekor serten kestyon. Par egzanp: ‘Ki problenm spesifik mon pe fer fas avek la konmela? Eski i annan en dimoun ki mon bezwen pardonnen? Eski i annan en keksoz ki’n sanze dan mon lavi e mon bezwen led Zeova pour fer fas avek?’ (2 Rwa. 19:15-19) Nou kapab swiv sa model lapriyer ki Zezi in kite e reflesir lo sa ki nou kapab dir Zeova konsernan Son non, Son Rwayonm ek Son lavolonte.—Mat. 6:9, 10.

⁹ Ler en ser ki apel Aliska ti aprann ki son msye pa ti pou viv lontan parski i ti annan kanser laservel, i ti vwar li difisil pour priye. I dir: “Mon ti sitan enkyet ki i ti difisil pour reflesir lo ki mon pou dir dan lapriyer.” Kwa ki ti ed li? I dir: “Avan mon priye, mon mazin lo sa ki mon pou dir Zeova e sa i ed mwan pour fer sir ki mon lapriyer pa baze zis lo mwan. Ler mon fer sa, mon pli kalm e mon pli kapab koz avek Zeova dan lapriyer.”

10. Akoz nou devret pran letan e fer nou lapriyer pli long? (Vwar portre.)

¹⁰ Pa bezwen fer lapriyer vitman vitman. Menm si bann lapriyer kourt i kapab profon, ler nou pran letan e fer nou lapriyer pli long, i tre probab ki nou pou pli byen kapab eksplik Zeova sa ki nou pe mazinen e santi.b Elijah, msye Aliska i dir: “Mon esey fer lapriyer plizyer fwa pandan lazournen. Mon’n vwar ki mon’n vin pli pros avek Zeova ler mon pran letan e fer mon lapriyer pli long. Zeova pa enpasyan, konmsi i pe esper mwan fini priye. Alor mon kapab pran mon letan.” Esey fer sa: Desid lo en ler ek en landrwa kot ou kapab priye, kot ou pa pou ganny distrer e kot ou kapab fer en lapriyer pli long. Petet ou kapab menm priy aotvwa. Esey fer sa regilyerman.

REFLESIR LO BANN LAPRIYER KI’N GANNY RIKORDE DAN LABIB

11. Ki byenfe nou gannyen ler nou reflesir lo bann lapriyer ki’n ganny rikorde dan Labib? (Vwar bwat “Eski ou pe santi parey zot?”)

¹¹ Ler ou reflesir lo bann lapriyer, kantik oubyen psonm ki’n ganny rikorde dan Labib, sa i kapab ed ou. Anmezir ou reflesir lo lafason ki bann serviter Bondye ti eksprim zot bann panse ek santiman pli profon, sa pou motiv ou pour fer parey ou osi. Petet ou kapab osi dekouver bann nouvo lekspresyon ki ou kapab servi pour loue Zeova dan ou lapriyer. Ou kapab osi vwar bann lapriyer ki relye avek ou sirkonstans.

12. Anmezir ki nou reflesir lo en lapriyer, ki bann kestyon nou kapab demann nou lekor?

¹² Anmezir ki ou reflesir lo en lapriyer ki’n ganny rikorde dan Lekritir, demann ou lekor: ‘Lekel ki’n dir sa bann parol e ki sityasyon i ti ladan? Eski mon kapab konpran sa bann santiman ki’n ganny eksprimen dan sa lapriyer? Ki mon kapab aprann avek sa lapriyer?’ Petet ou bezwen fer plis resers pour ganny larepons pour sa bann kestyon. Me ou zefor i vo lapenn. Annou vwar detrwa legzanp.

13. Ki en leson nou kapab aprann avek legzanp Ana konsernan lapriyer? (1 Samyel 1:10, 11) (Vwar portre.)

¹³ Lir 1 Samyel 1:10, 11. Ler Ana ti fer sa lapriyer, i ti pe fer fas avek de gro problenm. I pa ti kapab fer zanfan e lot madanm son msye ti pe fer son lavi difisil. (1 Sam. 1:4-7) Si ou pe kontinyen fer fas avek menm problenm, ki ou kapab aprann avek lapriyer Ana? I ti pran letan pour fer en lapriyer pli long e i ti devid son leker avek Zeova. Sa ti fer li santi li pli byen. (1 Sam. 1:12, 18) Ler nou “zet [nou] fardo lo Zeova” e nou dir li ki mannyer nou santi konsernan nou bann problenm, nou osi nou kapab santi nou pli byen.—Ps. 55:22.

14. (a) Ki en lot keksoz nou kapab aprann avek legzanp Ana? (b) Ki mannyer ler nou medit lo Parol Bondye, sa i ed nou pour annan plis keksoz pour dir dan nou lapriyer? (Vwar not.)

¹⁴ Detrwa lannen apre nesans son garson, Samyel, Ana ti anmenn li kot Granpret Eli. (1 Sam. 1:24-28) Dan en lapriyer, i ti dir ki i asire ki Zeova i protez e pran swen avek son bann serviter fidel.c (1 Sam. 2:1, 8, 9) I kapab ki i ti ankor annan problenm kot lakour me i ti konsantre lo lafason ki Zeova ti’n beni li. Ki nou kapab aprann? Si nou konsantre lo lafason ki Zeova in ed nou ziska aprezan, nou pou pli byen kapab fer fas avek bann problenm ki dire.

15. Ki nou kapab aprann avek lapriyer profet Zeremi ler nou pe fer fas avek lenzistis? (Zeremi 12:1)

¹⁵ Lir Zeremi 12:1. I ti annan en moman dan lavi profet Zeremi kot i ti dekouraze parski i ti vwar bann move dimoun pe reisi. I ti osi dekouraze parski bann Izraelit pa ti tret li byen. (Zer. 20:7, 8) Nou kapab konpran lafason ki i ti santi parski nou osi nou vwar bann dimoun malonnet pe prospere oubyen dimoun i monk nou. Menm si Zeremi ti eksprim son fristrasyon, i pa ti zanmen akiz Zeova konmkwa i enzis. Ler i ti vwar ki mannyer Zeova ti disiplin son pep rebel, sa ti fer li annan plis konfyans dan lazistis Zeova. (Zer. 32:19) Dan nou lapriyer, nou osi nou kapab eksprim nou fristrasyon e annan konfyans ki dan sa moman ki Zeova in deside, i pou fer en keksoz konsernan bann lenzistis ki nou fer fas avek.

16. Ki nou kapab aprann avek lapriyer sa Levit ki ti’n ganny egzile si nou sirkonstans pa permet nou fer serten keksoz? (Psonm 42:1-4) (Vwar portre.)

¹⁶ Lir Psonm 42:1-4. Sa kantik ti’n ganny ekrir par en Levit ki ti’n ganny egzile e ki pa ti kapab ador Zeova kot tanp ansanm avek lezot Izraelit. Sa psonm i montre lafason ki sa Levit ti pe santi. Petet nou kapab konpran son santiman si nou pa kapab kit nou lakour oubyen si nou dan prizon akoz nou lafwa. Parfwa nou kapab santi nou byen me parfwa nou kapab dekouraze. Me nenport fason ki nou santi, i ti pou byen pour nou koz avek Zeova dan lapriyer. Sa i kapab ed nou pour konpran nou santiman e pour vwar nou sityasyon dan en lot fason. Par egzanp, sa Levit ti realize ki son sityasyon ti pou donn li bann nouvo loportinite pour loue Zeova. (Ps. 42:5) I ti osi reflesir lo lafason ki Zeova ti pe pran swen avek li. (Ps. 42:8) Ler nou priy Zeova senserman, sa i kapab ed nou pour konpran nou santiman pli byen, ed nou pour vin kalm e pour ganny sa lafors pour andire.

17. (a) Ki nou kapab aprann avek lapriyer profet Zonas? (Zonas 2:1, 2) (b) Ki mannyer serten lekspresyon dan bann Psonm i kapab ed nou ler nou pe fer fas avek problenm? (Vwar not.)

¹⁷ Lir Zonas 2:1, 2. Profet Zonas ti fer sa lapriyer ler i ti dan vant en gro pwason. Menm si i ti’n dezobei Zeova, i ti asire ki Bondye ti pou tann son lapriyer. Dan son lapriyer, Zonas ti servi en kantite lekspresyon ki ganny trouve dan bann Psonm.d I paret ki i ti konn byen sa bann Psonm. Ler i ti reflesir lo sa bann Psonm, sa ti asir li ki Zeova ti pou ed li. Dan menm fason, si nou esey aprann serten verse parker, nou pou mazin sa bann verse ler nou priy Zeova dan bann moman difisil e zot pou rekonfort nou.

KONTINYEN PRIY ZEOVA E VIN PLI PROS AVEK LI

18-19. Si parfwa nou vwar li difisil pour nou eksplik Zeova ki mannyer nou pe santi, ki panse rekonfortan ki ganny trouve dan Romen 8:26, 27? Donn en legzanp.

¹⁸ Lir Romen 8:26, 27. Parfwa nou kapab sitan enkyet ki nou pa kapab eksplik Zeova ki mannyer nou pe santi. Me nou annan led. Dan bann moman koumsa, lespri sen Bondye i “pled” pour nou. Ki sa i vedir? Zeova ti servi son lespri sen pour enspir bann ekriven Labib pour rikord bann lapriyer dan son Parol. Ler nou pa kapab eksprim sa ki nou pe mazinen, Zeova i kapab pran serten lekspresyon ki dan bann lapriyer ki’n ganny rikorde dan Labib konmsi i sanmenm ki nou anvi demande e i kapab reponn sa bann lapriyer pour nou.

¹⁹ Sa nide ti ed en ser Larisi ki apel Yelena. I ti ganny met dan kaso parski i ti pe priye e lir Labib. Yelena ti sitan strese ki i ti vwar li difisil pour priye. I dir: “Mon ti rapel ki ler mon sitan enkyet e mon pa konnen ki mon pou dir dan mon lapriyer, Zeova pou konsider bann lapriyer ki son bann serviter dan lepase ti fer . . . konmsi i sanmenm ki mon pe demande. . . . Sa ti rekonfort mwan en kantite pandan en moman vreman difisil.”

20. Ki mannyer nou kapab prepar nou lespri pour priye ler nou strese?

²⁰ Ler nou strese, nou kapab vwar li difisil pour konsantre ler nou pe priye. Pour prepar nou lespri, nou kapab ekout bann lanrezistreman odyo liv Psonm. Nou osi kapab ekri sa ki nou pe santi parey Lerwa David ti fer. (Ps. 18; 34; 142; lentrodiksyon.) Byensir, napa okenn lareg lo ki mannyer nou devret prepar nou lekor pour priye. (Ps. 141:2) Fer sa ki bon pour ou.

21. Akoz nou kapab priy avek tou nou leker?

²¹ I vreman rekonfortan pour konnen ki Zeova i konpran nou bann santiman menm avan ki nou eksprim nou lekor. (Ps. 139:4) I kontan ler nou dir li ki nou annan konfyans dan li. Alor pa ezite pour priy avek ou Papa ki dan lesyel. Aprann avek bann lapriyer ki’n ganny rikorde dan son Parol. Priy avek tou ou leker. Fer li konnen kwa ki fer ou zwaye e kwa ki fer ou sagren. Zeova i ou bon Zanmi e i pou toultan la pour ou.