Pa oubliye priy pour lezot

1. Ki mannyer nou konnen ki nou lapriyer i enportan pour Zeova?

LAPRIYER i en provizyon merveye. Zis mazin sa: Zeova in donn bann lanz serten travay pour fer pour li. (Ps. 91:11) I’n osi donn son Garson serten responsabilite enportan. (Mat. 28:18) Me ki nou pou dir konsernan ekout nou lapriyer? Sa i en keksoz ki Zeova in swazir pour fer li menm. Zeova i “sa Enn ki ekout lapriyer” e i ekout nou personnelman.—Ps. 65:2.

2. Ki legzanp zapot Pol in kite konsernan priy pour lezot?

² Menm si nou lib pour koz avek Zeova konsernan nou bann problenm, nou devret osi priy pour lezot. I sanmenm ki zapot Pol ti fer. Par egzanp, dan sa let ki i ti ekri pour kongregasyon Efez, i ti dir: “Mon kontinyen priy pour zot.” (Efe. 1:16) Pol ti osi priy pour bann dimoun endividyelman. Par egzanp, i ti dir Timote: “Mon vreman rekonesan anver Bondye . . . [e] mon toultan mazin ou e sipliy Bondye pour ou lizour konman aswar.” (2 Tim. 1:3) Pol ti annan son prop problenm pour priy lo la. (2 Kor. 11:23; 12:7, 8) Kantmenm sa, i ti pran letan pour priy pour lezot.

3. Akoz parfwa nou kapab oubliye priy pour lezot?

³ Parfwa i kapab arive ki nou oubliye priy pour lezot. Akoz? En ser ki apel Sabrinaa i donn en rezon akoz. I dir: “Lavi dan sa sistenm i fer nou vreman bizi. Nou kapab sitan okipe avek nou prop problenm ki nou priy zis pour nou lekor.” Eski parfwa sa i arive avek ou? Si wi, sa lartik i kapab ed ou. Sa lartik pou (1) eksplike akoz i enportan pour priy pour lezot e (2) pour donn serten sizesyon lo ki mannyer nou kapab fer sa.

AKOZ NOU BEZWEN PRIY POUR LEZOT?

4-5. Ki mannyer ler nou priy pour lezot, sa i kapab “annan bokou lefe”? (Zak 5:16)

⁴ Ler nou priy pour lezot, sa i “annan bokou lefe.” (Lir Zak 5:16.) Eski ler nou priy pour lezot, sa i vreman kapab sanz sa ki arive avek zot? Wi i kapab. Par egzanp, Zezi ti konnen ki zapot Pyer ti pe al trai li. Alor i ti dir: “Mon’n sipliy Bondye pour ou pour ki ou lafwa pa afebli konpletman.” (Lik 22:32) Pol osi ti konnen ki lapriyer i kapab fer en diferans. Ler i ti ganny anprizonnen dan en fason enzis Ronm, i ti ekri Filemon e dir: “Mon swete ki gras a zot lapriyer mon pou kapab retourn kot zot.” (Filem. 22; vwar not letid “for I am hoping that through your prayers” dan nwtsty-E.) Sanmenm sa ki ti arive. Pa bokou letan apre sa, Pol ti ganny large e i ti kapab repran son travay predikasyon.

⁵ Byensir, sa pa vedir ki Zeova i bezwen toultan fer sa ki nou demann li pour fer. I remark sa lentere ki son bann serviter i demontre e parfwa i swazir pour fer sa ki zot demann li. Ler nou konn sa, sa i kapab ed nou pour priy Zeova avek tou nou leker konsernan en sityasyon e pour annan konfyans ki i pou azir dan sa pli bon fason.—Ps. 37:5; vwar 2 Korentyen 1:11 ek not letid.

6. Ki mannyer ler nou priy pour lezot, sa i annan en lefe lo lafason ki nou santi anver zot? (1 Pyer 3:8)

⁶ Ler nou priy pour lezot, sa i ed nou pour devlop “tandres ek konpasyon.” (Lir 1 Pyer 3:8.) En dimoun ki annan konpasyon, i remarke ler en dimoun pe soufer e i anvi fer en keksoz pour ed sa dimoun. (Mark 1:40, 41) En ansyen ki apel Michael i dir: “Ler mon priy pour lezot konsernan sa ki zot bezwen, mon konpran pli byen bann difikilte ki zot pe pas ladan e sa i fer mwan kontan zot plis. Mon santi mwan pli pros avek zot menm si zot, zot pa konnen.” En ansyen ki apel Richard i koz lo en lot byenfe. I dir: “Ler nou priy pour en dimoun, nou pli anvi fer en keksoz pour ed li.” I osi dir: “Ler nou ed en dimoun ki nou’n priy pour li, dan en sans nou pe ede reponn nou lapriyer.”

7. Ki mannyer ler nou priy pour lezot, sa i ed nou pour annan sa bon pwennvi lo nou problenm? (Filipyen 2:3, 4) (Vwar portre.)

⁷ Ler nou priy pour lezot, sa i ed nou pour annan sa bon pwennvi lo nou problenm. (Lir Filipyen 2:3, 4.) Dan sa lemonn ki ganny kontrole par Dyab, nou tou nou fer fas avek problenm. (1 Zan 5:19; Rev. 12:12) Ler nou fer li en labitid pour priy pour lezot, sa i fer nou rapel ki “tou [nou] bann frer dan lemonn pe pas atraver menm soufrans.” (1 Pyer 5:9) En pionye ki apel Katherine i dir: “Ler mon priy pour lezot, sa i fer mwan rapel ki lezot osi i annan problenm. Sa i osi ed mwan pour pa tro konsantre lo mon problenm.”

ZOT BEZWEN NOU LAPRIYER

8. Pour lekel nou kapab priye?

⁸ Pour lekel nou kapab priye? Nou kapab priy pour en group dimoun par egzanp, bann ki malad, bann zenn ki pe ganny sikannen e ki zot kanmarad lekol pe met presyon lo zot pour fer sa ki mal oubyen bann ki pe soufer akoz lavyeyes. En kantite frer ek ser i ganny opoze avek zot fanmir oubyen avek gouvernman. (Mat. 10:18, 36; Akt 12:5) Serten in bezwen kit zot lakour parski i annan lager dan sa landrwa kot zot reste. Lezot pe soufer akoz dezas natirel. Petet nou pa konn sa bann frer ek ser personnelman. Me ler priy pour zot, nou montre ki nou pe swiv sa lord ki Zezi ti donnen pour “kontan kanmarad.”—Zan 13:34.

9. Akoz nou devret priy pour bann ki pe dirize dan lorganizasyon Zeova e osi pour zot madanm?

⁹ Nou osi kapab priy pour bann ki pe dirize dan lorganizasyon Zeova. Sa i enkli Konsey Direkter ek zot bann asistan, Komite Biro Brans, bann diferan sirveyan dan Betel, bann sirveyan rezyonal, bann ansyen dan kongregasyon ek bann serviter kongregasyon. Sa bann frer i fer fas avek zot prop problenm anmezir zot travay dir pour ed nou. (2 Kor. 12:15) Par egzanp, en sirveyan rezyonal ki apel Mark i dir: “Mon pli gran lenkyetid i ki mon reste lwen avek mon paran ki aze. Tou le de i annan problenm lasante. Menm si mon ser ek son msye pe pran swen avek zot, mon leker i fermal parski mon pa kapab fer plis pour ed zot.” Ki swa nou konnen ki sa bann frer pe pas ladan oubyen non, i ti pou byen ki nou kontinyen priy pour zot. (1 Tesa. 5:12, 13) Nou kapab osi priy pour madanm sa bann frer parski zot siport zot msye fidelman e sa i permet zot msye pour kontinyen travay dir pour kongregasyon.

10-11. Eski ler nou fer bann lapriyer zeneral, sa i fer Zeova plezir? Eksplike.

¹⁰ Parey nou’n vwar, souvandfwa, nou priy pour bann group frer ek ser. Par egzanp, menm ler nou pa pe mazin en dimoun spesifik, nou kapab demann Zeova pour ed bann ki dan prizon oubyen pour rekonfort bann ki’n perdi en dimoun ki zot kontan dan lanmor. En ansyen ki apel Donald i dir: “Nou annan sitan en kantite frer ek ser ki pe pas dan bann problenm ki parfwa nou fer en lapriyer zeneral pour nou enkli tou bann ki pe soufer.”

¹¹ Eski bann lapriyer koumsa i fer Zeova plezir? Byensir. Nou pa konn egzakteman ki sak frer ek ser i bezwen. Alor i apropriye pour fer en lapriyer zeneral pour bann group frer ek ser. (Zan 17:20; Efe. 6:18) Bann lapriyer koumsa i montre ki nou “annan lanmour pour lasosyasyon tou bann frer.”—1 Pyer 2:17.

LER NOU PRIY POUR EN DIMOUN SPESIFIK

12. Ki mannyer ler nou obzerv byen, sa pou ed nou fer bann lapriyer pli spesifik?

¹² Obzerv byen. Apard ki priy pour bann group frer ek ser, nou devret osi priy pour bann dimoun spesifik e mansyonn zot non. Eski i annan en dimoun dan ou kongregasyon ki annan en maladi kronik? Eski i annan en zenn ki dekouraze akoz son bann kanmarad lekol pe met presyon lo li pour fer sa ki mal? Eski i annan en paran tousel ki pe travay dir pour fer grandi son zanfan “dapre disiplin ek gidans Zeova”? (Efe. 6:4) Ler ou obzerv byen, ou pou konpran santiman lezot pli byen e ou pou kontan zot plis e sa pou motiv ou pour priy pour zot.b—Rom. 12:15.

13. Ki mannyer nou kapab priy pour bann ki nou pa konnen personnelman?

¹³ Priy pour bann dimoun spesifik e mansyonn zot non. Nou kapab fer sa, menm pour bann dimoun ki nou pa’n zanmen zwenn. Par egzanp, mazin bann frer ek ser ki dan prizon Crimea, Eritre, Larisi ek Sengapour. Ou kapab trouv non bann frer ek ser ki dan prizon lo jw.org.c En sirveyan rezyonal ki apel Brian, i dir: “Mon vwar ki ler mon ekri non en frer oubyen en ser ki dan prizon e mon dir son non aotvwa, sa i ed mwan pour rapel sa dimoun e pour enkli li dan mon lapriyer personnel.”

14-15. Ki mannyer nou kapab fer nou bann demann spesifik?

¹⁴ Fer bann demann spesifik. Michael, ki’n ganny mansyonnen pli boner, i dir: “Ler mon lir bann lartik lo jw.org konsernan bann frer ki dan prizon, mon esey imazin lafason ki mon ti pou santi si mon ti dan zot sityasyon. Mon konnen ki mon ti pou enkyet konsernan mon madanm e mon ti pou anvi fer sir ki i annan sa ki i bezwen. Sa i ed mwan pour annan en keksoz spesifik pour demann Zeova ler mon pe priy pour bann frer marye ki dan prizon.”—Ebr. 13:3, not.

¹⁵ Ler nou reflesir lo ki mannyer lavi i ete pour nou bann frer ek ser ki dan prizon, nou kapab mazin lezot keksoz spesifik ki nou kapab demann Zeova dan lapriyer. Par egzanp, nou kapab priye ki bann gard prizon i tret zot byen e ki bann ki annan lotorite i permet nou bann frer pour ador Zeova libreman. (1 Tim. 2:1, 2) Nou kapab priye ki legzanp bann frer ek ser ki dan prizon i ankouraz bann kongregasyon e ki bann ki pa ador Zeova i vwar zot bon kondwit e zot ekout nou mesaz. (1 Pyer 2:12) Nou kapab fer en keksoz en pe parey ler nou priy pour nou bann frer ek ser ki pe fer fas avek bann lezot kalite problenm. Ler nou obzerv byen, nou priy pour kanmarad e mansyonn zot non e nou fer bann demann spesifik, nou montre ki nou “annan en kantite lanmour pour kanmarad.”—1 Tesa. 3:12.

ANNAN EN BON PWENNVI LO NOU LAPRIYER

16. Ki mannyer nou kapab kontinyen annan en bon pwennvi lo nou lapriyer? (Matye 6:8)

¹⁶ Parey nou’n vwar, nou lapriyer i kapab annan en lefe e petet ede pour sanz en sityasyon. Me nou bezwen annan en bon pwennvi. Ler nou priye, nou pa pe dir Zeova en keksoz ki i pa konnen e nou pa pe donn li konsey lo ki mannyer pour adres en sityasyon. Zeova i konnen ki son bann serviter i bezwen menm avan ki zot oubyen nou, nou konnen. (Lir Matye 6:8.) Alor akoz nou bezwen priy pour lezot? Apard sa bann rezon ki’n ganny mansyonnen dan sa lartik, nou priy pour lezot parski i sanmenm sa ki dimoun ki kontan lezot i fer. Lanmour i motiv nou pour priy pour kanmarad. Osi, Zeova i kontan ler i vwar son bann serviter pe demontre lanmour parey li.

17-18. Ki legzanp ki montre sa ki arive ler nou priy pour nou bann frer ek ser?

¹⁷ Menm si i paret ki nou lapriyer napa okenn lefe lo en sityasyon, zot montre ki nou kontan nou bann frer ek ser e Zeova i remark sa. Annou vwar en legzanp ki pou ed nou konpran sa. Imazin en fanmir ki annan en pti garson ek en pti fiy e sa pti garson i malad. Sa pti fiy i sipliy son papa: “Silvouple fer en keksoz pour mon frer. I vreman malad.” Sa papa i deza pe fer en keksoz. I kontan son garson e i pe pran swen avek li. Me sa papa i kontan pour vwar ki son fiy i sitan kontan son frer ki i sipliy li pour ed son frer.

¹⁸ I sanmenm sa ki Zeova i ankouraz nou pour fer. I anvi ki nou demontre lentere dan kanmarad e priy pour kanmarad. Ler nou fer sa, nou montre ki nou pa enterese zis avek nou prop lekor, ki nou vreman kontan nou bann frer ek ser e Zeova i remark sa. (2 Tesa. 1:3; Ebr. 6:10) Osi parey nou’n vwar, parfwa nou lapriyer i kapab annan en lefe e ede sanz en sityasyon. Alor annou pa oubliye pour priy pour kanmarad.