LED POUR BANN FANMIR
Ki mannyer ou kapab kontrol ou lakoler?
Ou konzwen i dir oubyen fer en keksoz ki fer ou ankoler. Ou esey kasyet ou santiman, me ou konzwen i remarke ki en keksoz i mal. Alor i konmans rode ki problenm. Sa i irit ou plis ankor. Ki mannyer ou kapab kontrol ou lakoler dan sa bann kalite sityasyon?
Sa ki ou devret konnen
Lakoler i kapab afekte ou lasante. Resers i montre ki si ou pa kontrol ou lakoler, i annan plis risk ki ou pou ganny tansyon o, maladi leker, depresyon ek problenm dizesyon. Resers in osi montre ki lakoler i kapab anpes ou dormi, fer ou enkyet tro bokou, annan problenm lapo e ganny latak laservel. I pour sa rezon ki Labib i dir: “Aret ankoler . . . parski sa i anmenn zis ditor.”—Psonm 37:8, not dan NWT.
Kasyet ou lakoler osi i kapab fer ou ditor. Si ou kontinyen ankoler, sa i kapab vin parey en maladi ki fer ou ditor anndan. Par egzanp, ou kapab devlop en move pwennvi lo lezot oubyen konmans kontan kritike. Si sa i arive, lezot i kapab vwar li difisil pour viv avek ou e i kapab afekte ou lavi maryaz.
Sa ki ou kapab fer
Rod bann bon kalite ki ou konzwen i annan. Ekri trwa keksoz ki ou kontan dan ou konzwen. Laprosenn fwa ki i fer ou ankoler, mazin sa bann kalite ki ou’n ekri. Sa i kapab ed ou kontrol ou lakoler.
Prensip Labib: “Toultan montre zot rekonesans.”—Kolosyen 3:15.
Aprann pardonnen. Premyerman, esey met ou dan plas ou konzwen. Sa pou ed ou konpran santiman ou konzwen. (1 Pyer 3:8) Apre sa, demann ou lekor, ‘Eski rezon ki mon ankoler i sitan serye ki mon pa kapab pardonn li?’
Prensip Labib: “I en zoli keksoz pour . . . les pase en lofans.”—Proverb 19:11, NWT.
Eksprim ou santiman dan en fason dous e avek bon zizman. Ler ou pe koze, dir “mon” olye “ou.” Par egzanp, olye dir, “Ou pa pran mon santiman an konsiderasyon ler ou pa telefonnen pour dir mwan kot ou ete,” ou kapab dir, “Mon trakase ler i tar e mon pa konnen si ou oke.” Eksprim ou santiman dan en fason dous i kapab ed ou kontrol ou lakoler.
Prensip Labib: “Zot parol i devret touzour agreab, konmsi i asezonnen avek disel.”—Kolosyen 4:6.
Avek respe, ekout li. Ler ou’n fini dir sa ki ou santi, les ou konzwen eksprim li san enteronp li. Ler ou konzwen in fini koze, repet sa ki i’n dir dan ou prop mo pour gete si ou’n konpran li byen. Zis ekoute i kapab ed ou kontrol ou lakoler.
Prensip Labib: “Pare pour ekoute, me . . . pran letan avan koze.”—Zak 1:19.